Kenehe 32
32
Kua Hāuni ia Iakopo ke Feiloaki ma Ehau
1Kua fano te malaga a Iakopo, oi na fetaui ai ma ni āgelu a te Atua. 2I te kiteaga e ia o nā āgelu oi na lea ai vēia, “Ko te api tēnei a te Atua!” Ma na fakaigoa ai e ia te koga tēnā kia Manaima.#32.2 Manaima Ko te uiga o te igoa tēnei i te gagana Epelu lua ia api
3Ma na uga ai e Iakopo ana kavefekau ke muamua atu ia te ia, kia Ehau tona uho i te kogāfenua maugā ko Heili, i Etoma. 4Na fakatonu e ia kilātou ke olo kia Ehau ma te fekau e vēnei: “Ko au ko Iakopo tau kaukauna fakamāoni e fakailoa atu kia te koe toku matai Ehau, ko au nae nofo ia Lapana mo he taimi mataloa, ma ko tēnei au kua toe foki mai. 5E iei aku pōvi, āhini, māmoe, oti ma aku pologa. Kua fakailoa vēnei atu kia te koe toku matai, ma toku fakamoemoe ka talia fiafia au e koe.”
6Kua toe liliu mai nā kavefekau kia Iakopo ma lea vē mai ki ei, “Na pa kimātou ki tō uho ko Ehau, ma kua hau ke fakafetaui mai koe. E toka fa helau ia tāulelea e ōmamai ma ia.” 7Oi na mataku lele ai ia Iakopo ma popole lahi; ma na vāelua ai e ia nā tino na ōmamai ma ia, vēnā ma ana māmoe, oti, pōvi ma nā kāmela, ki ni vāega e lua. 8Na vē ifo i tona māfaufau, “Kāfai ia Ehau e tau mai ki te vāega muamua ma ohofaki e ia, oi ka mafai tētahi vāega ke hōhola kehe.”
9Oi na tatalo ai ia Iakopo, “Te Atua o toku tupuna ko Apelaamo ma te Atua o toku tamana ko Ihaako, fakalogo mai kō kia te au! Na lea mai koe kia te au te Aliki, ko au ke toe foki ki toku fenua ma ki nā tino o toku kāiga, ma ka kē faia nā mea uma ke lelei mo oku. 10E hē aogā lele au ke kō maua te alofa tūnoa ma te fakamāoni, kua fakaali mai e koe kia te au tau kaukauna. I toku hopo atuga ki tētahi itū o te Vaitafe ko te Iolitana, e hēai he mea na fano ma au vāganā ai he tokotoko. Kae nei, ko au kua toe foki mai ma nā vāega iēnei e lua. 11Ko au e fakatagi atu, ke fakahao kō au mai nā lima o toku uho ko Ehau. Ko au e mataku—e mataku auā e i na hau nei oi ohofaki ma tāmate uma kimātou, ke pa ki fafine ma tamaiti. 12Kae ko koe lava te na fai tau folafolaga, e kē faia nā mea uma ke lelei mo oku, ma e kē fōki maia kia te au ni lāpuna e hē mafai ke faitau te tokalahi, e vē ko te lahi o te oneone i te matāfaga.”#Ken 22.17
13-15Oi na moe ai ia Iakopo i kinā i te mea na tatalo ai. I te aho alafaki, na filifili e ia mai tana lafumanu, he meālofa ke kave mā tona uho ko Ehau: E 200 ia oti fafine ma lua hefulu ia oti poa, e 200 ia māmoe fafine ma lua hefulu ia māmoe poa, e 30 ia kaumatua kāmela ma a lātou punua, e 40 ia pōvi fafine ma hefulu ia pōvi poa, e 20 ia āhini fafine ma hefulu ia āhini poa. 16Kua vāevae e ia nā manu ki ni lafumanu, ma tofi e ia ni kaukauna tautokatahi ke kikilāgia nā lafumanu takitahi. Na vē atu tana fakatonuga, “Olo ki mua oi muamua ia te au, ma ke lava he avanoa i te vā o te lafumanu i mua ma te lafumanu e hohoko atu ki ei.” 17Na fakatonu e ia te kaukauna e kikilāgia te lafumanu e pito ki mua vēia, “Kāfai koulua ma toku uho ko Ehau e fetaui kae fehili atu, ‘Ko ai tō matai? Ko koe e fano ki fea? E āi te lafumanu tēnei i mua o koe?’ 18ko koe e tatau ke tali vē atu ki ei, ‘E a tau kaukauna ko Iakopo. Na kaumai e ia nā meālofa ki tona matai ko Ehau. Ko toku matai e mulimuli mai i o mātou tua.’ ” 19Na vēnā foki oi fakatonu e Iakopo te lua o kaukauna, te tolu ma iētahi tino nae kikilāgia nā manu: “Ko koutou e tatau ke lea vēnei kia Ehau kāfai koutou e fetaui, 20‘Io, ko tau kaukauna ko Iakopo e mulimuli mai i o mātou tua.’ ” Na vē ifo ia Iakopo i tona māfaufau, “Ka fakatotoka e au te ita o Ehau i nā meālofa, kāfai la e feiloaki kimāua, oi hōvē ka ia fakamāgaloa au.” 21Oi na momoli ai e ia nā meālofa ke muamua atu ia te ia, kae kua moe i kinā i te api, i te pō tēnā.
Kua Fakaigoa ia Iakopo kia Ihalaelu
22I te pō lava tēnā na tū ai ki luga ia Iakopo kua kave ana āvaga e toka lua, ana āvagapō e toka lua, ma ana tamaiti e toka hefulu tahi, ma kua aha ki tētahi itū o te Vaitafe ko Iapoka. 23Kua uma te kave e ia o kilātou ki tētahi itū o te vaitafe, oi na fakatonu ai e ia ke kave foki nā mea uma lele a ia ki tētahi itū, 24kae kua nofo tautahi nā ko ia.#Hoh 12.3-4
Oi na hau ai he tamāloa kua fāgatua kilāua ke pa lava ki te tafa mai o ata i te vaveao. 25I te kiteaga e te tamāloa ko ia kua hē mālō i te fāgatuaga, oi na tuki ai e ia te ālaga o Iakopo, ma na heke ai te hokoga. 26Oi na lea vē mai ai te tamāloa, “Tuku mai loa au ke fano, auā ia ata kua tafa.”
Kae na tali atu ia Iakopo, “E hē kō tukua koe ke fano, heiloga kua fakamanuia au e koe.”
27Na fehili mai te tamāloa, “Ko aina kō tō igoa?”
Kua tali atu ia, “Ko Iakopo.”
28Oi na lea atu ai te tamāloa, “Ko koe e hē toe fakaigoa kia Iakopo. Kua tāuivi koe ma te Atua, ma vēnā foki ma tagata ma kua mālō koe; ko te mea ia ko koe ka fakaigoa kia Ihalaelu.”#32.28 Ihalaelu Ko te igoa tēnei e vē ko te fakaleoga o te kupu Epelu mo te e tāuivi ia ma te Atua pe ko te Atua e tāuivi #Ken 35.10
29Oi na fehili vē atu ai ia Iakopo, “Fakamolemole, taku mai la tō igoa.”#Fkm 13.17-18
Kae kua tali mai ia, “Aumā e kē fia iloa ai toku igoa?” Oi na fakamanuia ai loa e ia ia Iakopo.
30Oi na lea vē ai ia Iakopo, “Kua kitea e ōku mata ia fōliga o te Atua, ma ko au koi ola lava”; oi na ia fakaigoa ai te nofoaga tēnei ko Penieli.#32.30 Penieli Epelu Penueli Ko te igoa tēnei e tāli vē ko te fakaleoga o te kupu Epelu mo ko fōliga o te Atua 31Na fano kehe ia Iakopo mai Penieli i te taimi na oho ake ai te lā, ma e havali taketu lava ona nae tīgā tona ālaga. 32Ke pa mai ki te taimi nei, ko nā lāpuna o Ihalaelu e hē kilātou kaia te maho e pipiki ki te hokoga o te ālaga, auā ko te maho ia o te tino o Iakopo na tau ki ei te tuki.
Currently Selected:
Kenehe 32: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
