Kenehe 31
31
Kua Hola kehe ia Iakopo mai ia Lapana
1Kua lagona e Iakopo ko nā ataliki o Lapana na lea vē, “Kua kave uma e Iakopo nā mea a to tātou tamana. Ko tona tamaokāiga uma lele, na maua mai i nā mea a to tātou tamana.” 2Ma kua mātau foki e Iakopo, ko Lapana kua hē fiafia lahi ake kia te ia, e vē ko te mea nae iei ai muamua. 3Oi na vāgana atu ai te Aliki kia Iakopo, “Toe foki ki te fenua o nā tupuna o koe ma ki tō kāiga; ma ka fakatahi pea lava au ma koe.”
4Oi na kave ai te faifekau a Iakopo kia Lahela ma Leaha, ke fakafetaui ake ia i te fenua e iei ai ana lafumanu. 5Ma kua lea vē atu ia ki te toka lua, “Kua kitea e au ko te tamana o koulua kua hē fiafia mai kia te au e vē ko muamua; kae ko te Atua o toku tamana, e fakatahi pea lava ma au. 6E iloa lelei lava e koulua, ko au nae galue ma te mālohi mo te tamana o koulua. 7Kae kua fakatogafiti au e ia ma hui fakahefulu e ia toku totogi. Kae e hēki fakatagagia e te Atua ke ia faia he mea ke āfāina ai au. 8Ko nā taimi uma lava na lea vē ai ia Lapana, ‘Ko nā manu takatutututu uma ko tō totogi tēnā,’ oi ko te lafumāmoe uma kua kāmata fānanau mai e kilātou ni punua takatutututu. Kāfai na lea, ‘Ko nā manu takahelehele uma ko tō totogi tēnā,’ oi ko te lafumanu uma kua kāmata fānanau mai e kilātou ni punua takahelehele. 9Kua kave kehe e te Atua nā lafumanu mai te koulua tamana, ma fōki mai kia te au.
10“I nā māhina e feuhuaki ai nā manu, na fai ai taku miti, ma na kō kitea atu ko nā oti poa e tūtaoho ki luga o nā oti fafine e takahelehele, takatutututu ma takapulepule. 11Oi na lea vē mai ai te āgelu a te Atua kia te au i he miti, ‘Iakopo,’ ma na tali atu au, ‘Ko au tēnei!’ 12Ma na leamai ai, ‘Kikila atu, ko nā oti poa uma lele iēnā e tūtaoho ki luga o nā oti fafine e takahelehele, takatutututu ma takapulepule. Kua kō faia ke vēnei, auā kua kō kitea uma lele nā mea a Lapana e fai atu kia te koe. 13Ko au ko te Atua, tē na fakakitea atu kia te koe i Peteli, te koga na fakatū ai e koe te fatu ke fai ma fakamanatuga, ma liligi e koe ki luga te lolo olive, ma fai ai tau tautōga kia te au. I te taimi nei la, hāuni loa oi toe foki ki te fenua na fānau ai koe.’ ”#Ken 28.18-22
14Na tali mai ia Lahela ma Leaha kia Iakopo, “E iei nei he mea koi totoe i te tofi o to mā tamana, mo kimāua? 15E hē ko kimāua nei e vē ni tino kehe kia te ia? Auā na ia fakatau atua kimāua, ma kua fakaaogā uma lele e ia te tupe na maua mai ia te kimāua. 16Ko te tamaokāiga uma lele kua kave kehe e te Atua mai to mā tamana, e a kimāua ma a mā fānau. Ko te mea ia, fai hō he mea kua vāgana mai ai te Atua kia te koe.”
17-18Oi na hāuni ai loa ia Iakopo ke toe foki ki tona tamana i te fenua ko Kanana. Kua fakauta tana fānau ma ana āvaga ki luga o nā kāmela, oi na takitaki uma ai loa ana lafumanu ke muamua ia te ia, ma kave uma lele ana mea tōtino na maua ka koi nofo ai i Mehopotamia. 19I te taimi na fano ai ia Lapana oi hele te fulufulu o tana lafumāmoe, na fano ai ia Lahela oi kaihohoa nā tupua kāiga a tona tamana. 20Ma na fakavalea e Iakopo ia Lapana te ha-Alamā mai Mehopotamia, i te kua hē ia takua ki ei ko ia ka fano kehe. 21Oi na hola kehe vave ai ia Iakopo ma kave uma lele ana meatōtino. Kua aha e ia te Vaitafe ko te Eufilate ma taunuku atu ki tētahi itū, oi na kāmata ai oi fano āgai ki te fenua maugā ko Kileata.
Kua Tuliloa e Lapana ia Iakopo
22Kua tolu ia aho e teka, kae lagona e Lapana te tala ko Iakopo kua hola. 23Oi na kave ai e ia nā tāulelea o tona kaukāiga, kua olo oi tuliloa ia Iakopo i ni aho e fitu, ma na kilātou maua atu ki te fenua maugā ko Kileata. 24Kae na hau te Atua i te pō lava tēnā kia Lapana te ha-Alamā i he miti, ka ko hēki tautala ia Lapana kia Iakopo, ma na vāgana vē mai ki ei, “Koe ke fakaetēte ke nahe fakamatakua lele e koe ia Iakopo i he mea e fokotahi.” 25Na maua atu e Lapana ia Iakopo ki nā koga maugā o Kileata, te mea na api ai. Ko kinā foki te na api ai ia Lapana ma nā tāulelea o tona kaukāiga.
26I te fetauiga o te toka lua, oi na lea atu ai ia Lapana kia Iakopo, “Heā ta koe kua fai? Ko au kua fakavalea e koe, ma kave e koe oku afafine e vē ni tino na puke e koe i te pelu?#31.26 Pe taua 27Heā te kua fakavalea ai au e koe ma fakagalo, kae hē lea mai kia te au? Kana lea mai koe kia te au, moinei ake na fai lelei he tātou fakamāvaega ma pepehe fiafia i nā lūtagi ma nā kītala. 28E hēki kē tuku maia foki he avanoa ke hogi fakamāvae ai au ki nā makopuna o oku, ma fakatōfā ki oku afafine. Kai te fāvalevalea o tau mea na fai! 29E kō mafaia lele oi ohofaki koe ma tau vāega; kae ko te pō kua teka atu nei, na lapataki mai ai kia te au te Atua o tō tamana, ke nahe faia lele e au he mea ke fakamataku ai koe. 30Ma e iloa e au ko koe kua fano kehe ona ko koe kua fia toe foki ki tō kāiga, kae heā te kua kē kaihohoa ai nā tupua a toku kāiga?”
31Na tali atu ia Iakopo kia Lapana, “Ko au na mataku, auā ia koe e i nā hau oi toe kave fakamālohi nā afafine o koe. 32Kae kāfai e maua e koe nā tupua kāiga a koe i he tino o kimātou, ko te tino tēnā e tāmate. Meamanū e molimau nā tāulelea o to tātou kaukāiga pe kāfai e iei ni mea a koe e ia te au, oi e toe kave lava e koe.” E hē iloa e Iakopo na kaihohoa e Lahela nā tupua kāiga a Lapana.
33Oi na fano ai loa ia Lapana oi kikila ki loto o te falekie o Iakopo, ma ki loto o te falekie o Leaha, ma vēnā foki ki loto o te falekie o nā pologa fafine e toka lua, kae e hēki ia maua ai ana tupua kāiga. Oi na fano ai foki ki loto o te falekie o Lahela. 34Kae ko nā tupua kāiga na kave e Lahela oi fafao ki loto o te nofoataga o te kāmela, ma nofo ai ki luga. Na hakili e Lapana ki loto o te falekie kātoa, kae e hēki ia maua. 35Ma kua lea atu ia Lahela ki tona tamana, “Koe kō nahe ita, te tamana, auā ia au e hē mafai ke tū atu ki luga; ko au e maua i te tauale o fafine.” Oi na hakili ai lava e Lapana ana tupua kāiga, kae e hēki ia maua.
36Ma ko Iakopo kua fekai lele, ma kua hē mafai ke tāofiofi tona ita. Oi na lea vē atu ai kia Lapana, “He holitūlāfono ā ta aku kua fai? He tūlāfono vēhea te kua kō holia, kua tulitatao mai ai lava au e koe? 37Tēnei kua uma te vākili uma e koe o aku mea, niā la te kua kē maua? Kaumai ki te mea e kitea fakatahi ai e nā tāulelea o tō itū ma toku itū, ma tuku ai kia te kilātou ke faia te tonu pe ko ai o kitāua e hako. 38Kua kātoa nei te lua hefulu tauhaga talu to tā nonofo fakatahi; ko nā māmoe fafine ma nā oti fafine a koe nae fanafanau pea lava, ma e hēki kō kaia lele he māmoe poa mai tau lafu. 39Ho he taimi lava e kai ai e he manu tāvao he māmoe, nae hui lava e au i haku māmoe. Nae hē kavatua lele e au ke fakahino atu kia te koe, kae ke iloa ai e hē ko he hehē e o oku. E a koe te fakatonuga ke toe totogi lava e au ho he mea e kaihohoa i te ao pe ko te pō. 40Te lahi o nā taimi nae pakia ai au i te vevela o te lā i te ao, ma te mālūlū i te pō. Nae hē mafai au ke moe. 41Nae vēnā lava i te lua hefulu tauhaga kātoa nae nofo ai au fakatahi ma koe. E hefulu fa ia tauhaga na galue ai au kae ke mafai au oi fakaipoipo ki nā afafine e toka lua o koe, ma ono tauhaga mo au lafumanu. Kae kua hē gata i tēnā, na tahuihui fakahefulu e koe toku totogi. 42Ānei ake te Atua o oku tamana, te Atua o Apelaamo ma Ihaako, nae hē fakatahi ma au, e vēnei ake kua kē uga kehea au e augapiu ma he mea. Kae kua kitea e te Atua toku puapuagā ma aku gāluega nae fai, ma na fāitiogia lahi koe e ia i te pō kua teka atu nei.”
Ko te Māliliega i te vā o Iakopo ma Lapana
43Oi na tali vē atu ai ia Lapana kia Iakopo, “Ko nā teine iēnei ni afafine e o oku; ko nā tamaiti a kilāua ni makopuna e o oku, ko nā lafumanu uma iēnei e a aku, ma ko nā mea uma lele e kitea e koe e a aku. Kae ona kua hēai lava he mea e kō mafaia ke tāofi mai ai oku afafine ma a lā tamaiti, 44kua malie ai au ke fai he tā feagaiga, ma ke iei he molimau i te vā o koe ma au.”
45Oi na kave ai e Iakopo he fatu oi fakatu ki luga i te pito, ke fai ma fakamanatuga. 46Ma na fakatonu ai e ia nā tāulelea o tona kāiga ke ao ni fatu ma fai he fakaputugā fatu. Oi na kakai fakatahi ai i tafa o te fakaputugā fatu. 47Na fakaigoa te fakaputugā fatu tēnei e Lapana i tana gagana, ko Iegala Hahatuta,#31.47 Iegala Hahatuta Ko te uiga o te igoa tēnei i te gagana Alamaika he fakaputuga ke fakamanatu kia te kitāua kae fakaigoa e Iakopo i tana gagana ko Kaleete.#31.47 Kaleete Ko te uiga o te igoa tēnei i te gagana Epelu he fakaputuga ke fakamanatu kia te kitāua 48Kua lea atu ia Lapana kia Iakopo, “Ko te fakaputugā fatu tēnei ka kavea ma fakamanatuga kia te kitāua.” Ko te mea ia na fakaigoa ai te nofoaga tēnā ko Kaleete. 49Kua toe lea atu ia Lapana, “Ke tūmau pea te kikilaga a te Aliki kia te kitāua kāfai kitāua e tēteka.” Ko te mea ia na fakaigoa ai te kogāfenua tēnei kia Mehepa.#31.49 Mehepa Ko te igoa tēnei e tāli vē ko te fakaleoga o te kupu Epelu mo te koga ke tautuku ai 50Kua toe lea atu foki ia Lapana, “Kāfai koe e fai kino ki oku afafine, pe toe āvaga ki ni iētahi fafine, e tuha lava pe hē kō iloa atu, kae ke manatua ko te Atua e taukikila mai lava kia te kitāua. 51Ko iēnei nā fatu kua kō fakaputua i te vā o koe ma au, ma ko tēnei te fatu fakamanatu. 52Ko te fakaputugā fatu tēnei ma te fatu fakamanatu, ni molimau ko au ka hē fakahao lele ki tētahi itū o te fakaputugā fatu tēnei, ke ohofaki koe, ma ko koe foki e hē fakahao lele mai ki te itū tēnei o te fakaputugā fatu, pe o te fatu fakamanatu, ke ohofaki au. 53Ko te Atua o Apelaamo ma te Atua o Nahoa#31.53 Apelaamo… Nahoa Ko Apelaamo ko te tupuna ia o Iakopo ma ko Nahoa ko te tupuna ia o Lapana ka fakamahino e ia kitāua.” Oi na tautō ai ia Iakopo i te igoa o te Atua nae tāpuaki ki ei ia Ihaako tona tamana, ka tauhi ma te fakamāoni e ia te feagaiga. 54Kua tāmate e ia he manuvaefa ma ofo atu ma tāulaga i luga o te mauga, ma na ia valakaulia ai nā tino o tona kaukāiga mo he kaiga. Kua uma te lātou kakai, oi na momoe ai i luga o te mauga i te pō tēnā. 55I te tāeaopō na hohoko ai, na hogi fakamāvae ai ia Lapana ki ona makopuna ma ona afafine ma fakamanuia atu kia te kilātou, ma na toe liliu ai loa ki tona kāiga.
Currently Selected:
Kenehe 31: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
