Kenehe 30
30
1I te iloaga e Lahela ko ia e hē manavaola, oi na tumu ai ia i te loto kino ki tona uho, ma na lea vē atu ai kia Iakopo, “Fōki mai haku fānau, kāfai e hēai haku fānau, e hili ai toku oti.”
2Na ita lele ia Iakopo kia Lahela ma na lea vē atu ai ki ei, “Ko au nei ko te Atua? Ko te Atua lava te ia tāofia koe ke nahe iei hau fānau.”
3Oi na lea atu ai ia Lahela kia Iakopo, “Tēia taku tāvini fafine ko Piliha; kave oi momoe ma koe kae ke maua haku fānau e ala ia te ia.” 4Oi na tuku atu ai e Lahela ia Piliha ki tana āvaga, ma na momoe ai kilāua. 5Na faitama ia Piliha oi na fānau ai e ia he ataliki kia Iakopo. 6Ma na lea vē ai ia Lahela, “Kua fakamahino au e te Atua, ma kua ia kitea ko au e hako. Kua lagona e ia taku tatalo ma kua ia fōki maia he ataliki mo oku”; oi na fakaigoa ai e ia kia Tanu.#30.6 Tanu Ko te igoa tēnei e tāli tutuha ma te fakaleoga o nā kupu Epelu e ia fakamahinoa pe e ia fakahaoa mai te fakamahinoga 7Kua toe faitama ia Piliha, ma fānau e ia hētahi ataliki kia Iakopo, ko te toka lua ia. 8Oi na lea vē ai ia Lahela, “Na tāuivi mālohi au ma toku uho, ma na manumālō au”; oi na fakaigoa ai e ia kia Nafatali.#30.8 Nafatali Ko te igoa tēnei e tāli tutuha ma te fakaleoga o te kupu Epelu mo te tāuivi
9I te iloaga e Leaha ko ia kua hē toe mafai ke faitama, oi na fōki ai e ia tana tāvini teine ko Helepa kia Iakopo, ke fai ma ana āvaga. 10Oi na fānau ai e Helepa he ataliki kia Iakopo. 11Ma na lea vē ai ia Leaha, “Ko au te laki”; oi na fakaigoa ai e ia kia Kato.#30.11 Kato Ko te uiga o te igoa tēnei i te gagana Epelu laki 12Na toe fānau e Helepa te tāvini a Leaha hētahi ataliki kia Iakopo, 13oi na lea vē ai ia Leaha, “Kai au te fiafia! Nei, ka kitea e fafine toku fiafia”; oi na fakaigoa ai e ia kia Ahela.#30.13 Ahela Ko te uiga o te igoa tēnei i te gagana Epelu fiafia
14I nā aho na helehele ai te haito, na fano ai ia Leupena ki te fātoaga ma na ia kitea ai nā lākau e igoa ko te tutaima#30.14 tutaima He itūkāiga lākau nae talitonu e mafai ke faitama gōfie ai ia fafine, ma nae fakaaogā e vē ke fakatōhina ai kua ola i te fātoaga, ma na kaumai ai e ia ma fōki ki tona mātua ko Leaha. Oi na lea atu ai ia Lahela kia Leaha, “Fakamolemole, kaumai kō ni aku mea i nā tutaima a tō ataliki na kaumai.”
15Na tali mai ia Leaha, “Oi, e hēki lava lava tēnā kua kave e koe taku āvaga? Ka kua taumafai foki koe ke kē kavea nā tutaima a toku ataliki.”
Oi na lea atu ai ia Lahela, “Kāfai e kē fōki maia ma aku nā tutaima a tō ataliki, e mafai koe ke momoe ma Iakopo i te pō nei.”
16Kua foki mai ia Iakopo mai te fātoaga i te afiafipō, oi fano ai ia Leaha fakafetaui ki ei ma lea vē atu, “Ko koe e hau oi momoe kitāua i te pō nei, auā kua uma te kō totogia o koe i nā tutaima a toku ataliki.” Oi na momoe ai ia Iakopo ma Leaha i te pō tēnā.
17Na tali mai te Atua ki te tatalo a Leaha, ma na faitama ai ma fānau mai e ia he ataliki kia Iakopo, ko te toka lima ia. 18Kua lea vē ia Leaha, “Kua fōki mai e te Atua toku taui, auā na fōki e au taku tāvini fafine ki taku āvaga”; oi na fakaigoa ai e ia tona ataliki kia Ihakala.#30.18 Ihakala Ko te igoa tēnei e tāli vē ko te fakaleoga o te kupu Epelu mo te taui 19Kua toe faitama ia Leaha, ma na fānau mai e ia hētahi ataliki kia Iakopo, ko te toka ono ia. 20Oi na lea vē ai ia Leaha, “Kua fōki mai e te Atua kia te au he meālofa tāua. Nei, ko au ka talia e taku āvaga, auā kua toka ono ona ataliki e kō fānau maia”; oi na fakaigoa ai e ia tona ataliki kia Hepulona.#30.20 Hepulona Ko te igoa tēnei e tāli vē ko te fakaleoga o te kupu Epelu mo te talia ma meālofa 21Mulimuli ake na fānau mai e ia he afafine, ma na fakaigoa e ia kia Tina.
22Oi na manatua ai e te Atua ia Lahela; na tali mai ki tana tatalo ma na ia faia ai ke manavaola. 23Na iku lava kua faitama ia Lahela, ma na fānau mai ai tona ataliki ma na lea vē ai, “Kua kave kehe e te Atua toku māhiahi, ona kua ia fōki maia hoku ataliki. 24Ke toe fōki mai e te Aliki kia te au hētahi ataliki”; oi na fakaigoa ai e ia tona ataliki kia Iohefa.#30.24 Iohefa Ko te igoa tēnei e tāli vē ko te fakaleoga o te kupu Epelu mo te ke toe fōki mai e ia hētahi ma kua ia kave kehea
Māliliega i te vā o Iakopo ma Lapana
25Kua teka atu he taimi talu te fānau mai o Iohefa, oi na lea atu ai ia Iakopo kia Lapana, “Tuku mai au ke toe foki ki toku kāiga. 26Kua uma nā tauhaga nae galue ai au ma te fakamāoni mo koe. Tuku mai la aku āvaga ma aku fānau, ke olo kimātou. E iloa lelei lava e koe taku tautua nae fai atu kia te koe.”
27Kae na tali mai ia Lapana, “Ke lea atu au i te mea tēnei: Kua iloa e au e ala i nā mea fakalauatau, ko au kua fakamanuiagia e te Aliki, ona ko koe. 28Lea mai pe fia tō totogi, oi totogi atu ai e au.”
29Kua lea atu ki ei ia Iakopo, “E iloa lelei lava e koe taku tautua nae fai atu kia te koe, ma te tupu olaola o au lafumanu i lalo o taku tauhiga. 30Auā nae hē lahi tau lafumanu i te taimi ka ko hēki hau ai au, kae nei kua lahi lele, ma ko koe kua fakamanuia e te Aliki i ho he mea e fano au ki ei.#30.30 i ho he mea e fano au ki ei pe ona ko au Kae i te taimi nei, kua tatau ke kikila lava e au toku kāiga.”
31Kua lea atu ia Lapana, “E fia la he tupe e fofou koe ke totogi atu e au kia te koe?”
Kua tali mai ia Iakopo, “Ko au e hē fofou ki hoku totogi. Ka kō tauhia pea nā lafumanu a koe, kāfai koe e malie ki te mea tēnei ka lea atu ai au: 32Fakataga mai au ke fano oi hiaki uma te lafumanu a koe i te aho nei, ma kave kehe uma mai nā māmoe takapulepule ma takatutututu, nā punuāmāmoe uliuli uma lele, ma nā oti uma lele e takapulepule ma takatutututu. Ko tēnā oioti lava toku totogi e fofou au ki ei. 33I te lumanaki, ka faigōfie oi iloa e koe pe nae fakamāoni au, kāfai koe e hau oi hiaki toku totogi. Kāfai e iei haku oti e hē takapulepule pe takatutututu, pe he punuāmāmoe e hē uliuli, ka iloa ai e koe ko te manu tēnā na kaihohoa mai i tau lafumanu.”
34Kua lea atu ia Lapana, “Kua lelei la! Fai te mea tēnā kua lea mai ai koe.” 35Kae ko te aho lava tēnā na kave kehe ai e Lapana nā oti poa uma e takahelehele pe takatutututu, ma nā oti tānoa e takapulepule ma takatutututu, pe e iei ni mea paepae; na kave kehe foki e ia ma nā punuāmāmoe uliuli uma. Kua tuku e ia tana lafumanu ke kikila e nā ataliki o ia, 36ma na olo kehe vave ai mai ia Iakopo ma a lātou lafumanu, ma tātitili lele i ni aho e tolu ke mamao kehe lele kilātou. Kae kua kikila e Iakopo te vāega o te lafumanu a Lapana na totoe.
37Oi na fano ai ia Iakopo oi ta mai ni tamā lālā lākau mata mai ni itūkāiga lākau e tolu, kua hae loaloa ni vāega o te paku, ma na iei ai nā tuhi papae i nā lālā lākau. 38Kua tuku e ia nā lākau ki loto o te tānoa e fakainu ai nā lafumanu, te mea e mafai ke kitea ai e nā manu kāfai e ōmamai oi feinu. 39Kāfai la nā oti poa e feuhuaki ma nā oti fafine i mua o nā lālā lākau, e kilātou kitea nā lālā lākau ma fānanau mai ai e kilātou ni punua e takahelehele, takapulepule ma takatutututu.
40Kua tuku kehekehe e Iakopo nā māmoe fafine mai iētahi māmoe ma nā oti i te lafumanu a Lapana. Kāfai nā māmoe fafine iēnei e uhu ki ei nā māmoe poa, e fakahaga e ia ki te mea nae iei ai nā manu takahelehele ma uliuli o te lafumanu a Lapana, kae ke fānanau mai ai e kilātou ni punua e takahelehele pe takatutututu. I te faiga tēnei, na tuputupu ai lava tana lafumanu, ma nae tauhi kehe lava e ia mai te lafumanu a Lapana.
41Kāfai nā manu tino mālolohi ma ola lelei e feuhuaki, oi e tuku e Iakopo nā lālā lākau ki loto o nā tānoa e fakainu ai nā manu, ke kitea e nā manu iēnei, ma ke mafai ai oi feuhuaki kilātou i te mea e iei nā lālā lākau. 42Kae nae hē ia tukua nā lālā lākau ki mua o nā manu e hē tino mālolohi ma ola lelei; ma na iku ai kua maua e Lapana nā manu uma e hē tino mālolohi ma hē ola lelei, kae maua e Iakopo nā manu uma e tino mālolohi ma ola lelei. 43Ma na kavea ai ia Iakopo ma tagata maukoloa. Na lahi lele ana lafumanu, ana pologa, ana kāmela, ma ana āhini.
Currently Selected:
Kenehe 30: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
