Kenehe 26
26
Nā Mea na Tutupu i te Olaga o Ihaako
1Na iei he oge i te fenua, e kehe ai ma te oge i mua atu i te vāitaimi o Apelaamo. Ma ko Ihaako na fano kia Apimeleka, te tupu o nā tino Filihitia, i Kelala. 2Kua fakakitea te Aliki kia Ihaako ma vāgana vē atu ki ei, “Ko koe e hē fano ki Aikupito; nofo i te fenua ka kō fakahino atua ke nofo ai koe. 3Nofo i te fenua tēnā, ma ko au ka fakatahi ma koe, ma ka fakamanuia koe e au. Ka kō fōki atua mo koe ma nā lāpuna o koe, te fenua kātoa tēnei. Ka tauhi pea au ki taku tautōga na fai ki tō tamana ko Apelaamo.#Ken 22.16-18 4Ka kō fōki atua ni lāpuna e tokalahi mo koe, e vē ko te lahi o nā fetū o te lagi, ma ka kō fōkia mo kilātou te kogāfenua kātoa uma tēnei. Ko nā nuku uma lele ka leamai kia te au ke fakamanuia kilātou e vē ko te fakamanuiaga e au o nā lāpuna o koe. 5Ka kō fakamanuiagia koe, ona ko Apelaamo na uhitaki ma tauhi ki nā tūlāfono ma nā fakatonuga a aku.”
6Oi na nofo ai loa ia Ihaako i Kelala. 7I te fehiliga o nā tāulelea o te fenua e uiga kia Lepeka, kae na lea ki ei ia Ihaako ko he tuafafine e o ia. Na mataku oi lea ko tana āvaga, auā e i nā ka tāmate ai ia e nā tāulelea ma kave ai e kilātou ia Lepeka, ona ko Lepeka he fafine kaulelei.#Ken 12.13; 20.2 8Na mataloa te nofo o Ihaako i kinā, oi pa ai ki tētahi aho na kikila ifo ai te Tupu ko Apimeleka o Filihitia i te fāmalama o tona fale, kae ia kitea ifo ia Ihaako e huamili kia Lepeka. 9Oi na fekau ai ia Ihaako e Apimeleka ma lea vē atu ki ei, “Kikila, kua kō iloa nei ko Lepeka ko he āvaga e a koe! Heā la te na lea ai koe, ko he tuafafine e o koe?”
Na tali mai ia Ihaako, “Na vēake au, ko au e i nā ka tāmate kāfai au e lea ko he āvaga e aku.”
10Kua lea atu ia Apimeleka, “Heā ta koe kua fai kia te kimātou? Na ono faigōfie lele oi momoe he taulealea o toku nuku ma tau āvaga, ma ko koe lava te na mea e nofohala ai kimātou.” 11Oi na fai ai te fakatonuga a Apimeleka ki nā tino uma lele: “Ho he tino e ia faia he mea ke āfāina ai te tamāloa tēnei pe ko tana āvaga, ko tona ikuga e tāmate.”
12Na totō e Ihaako te haito i te fenua tēnā, ma ko te helehelega i te tauhaga tēnā, na hau tua-helau te lahi atu i lo nā fatu na lūlū, auā na fakamanuia ia e te Aliki. 13Na fakaauau lava te tūtūlelei o Ihaako, ma na kavea ma tagata maukoloa. 14Ona ko te lahi o ana lafumāmoe ma ana lafupōvi, ma te tokalahi o ana kaukauna, na lotokino ai kia te ia nā tino Filihitia. 15Ma na olo ai nā tino Filihitia oi toe tanu uma nā vaikeli na keli e nā kaukauna a Apelaamo te tamana o Ihaako, ka koi ola ai.
16Oi na lea vē atu ai loa ia Apimeleka kia Ihaako, “Fano kehe loa ma to mātou fenua, auā kua hili atu tō mālohi i lo ia te kimātou.” 17Oi na fano kehe ai ia Ihaako, ma kua fano oi fakatū tana api i te vanu o Kelala, ma nofo ai i kinā mo he taimi. 18Na toe keli e Ihaako nā vaikeli na keli i te vāitaimi o Apelaamo, iēia na toe tanu e nā tino Filihitia, ka kua oti ai ia Apelaamo. Na fakaigoa e Ihaako nā vaikeli iēnei, ki nā igoa lava na fakaigoa ai e tona tamana.
19Oi na keli ai e nā kaukauna a Ihaako he vaikeli i te vanu, ma na maua ai te huāvai e puna ake ki luga i kinā. 20Na fai fīnauga ai nā leoleomāmoe o Kelala ma nā leoleomāmoe a Ihaako, ma na lea vē nā tino o Kelala, “Ko te vai tēnei e ō mātou.” Oi na fakaigoa ai e Ihaako te vaikeli kia Eheke#26.20 Ko te uiga Fīnauga ona na fai fīnauga kilātou ma ia.
21Mulimuli ake, na toe keli e nā kaukauna a Ihaako hētahi vaikeli, ma na toe fai fīnauga ai foki kilātou e uiga ki te vai tēnei, ma na fakaigoa ai e Ihaako te vaikeli tēnei kia Hitana.#26.21 Ko te uiga Tauaimihaga 22Oi na fano kehe ai ia Ihaako mai kinā, ma kua fano oi keli hētahi foki vaikeli, ko te tolu ia. E hēki toe iei ni tauaimihaga e uiga ki te vaikeli tēnei; oi na fakaigoa ai e ia kia Lehopo,#26.22 Ko te uiga Koga avanoa lahi ma na lea vē ai, “I te taimi nei, kua fōki mai e te Aliki he koga avanoa lahi i te fenua tēnei, ke nonofo ai kitātou, ma ke maua ai e kitātou te tamaokāiga.”
23Oi na fano kehe ai mai kinā, ma kua fano ki Pelehepa. 24I te pō lava o te aho tēnā, na fakakitea ai te Aliki kia Ihaako ma na vāgana vē mai ki ei, “Ko au ko te Atua o tō tamana ko Apelaamo. Ia koe nahe mataku, auā ko au e fakatahi pea ma koe. Ka kō fakamanuiagia koe, ma fōki atu ni ō lāpuna e tokalahi, ona ko taku folafolaga na fai ki taku kaukauna ko Apelaamo.” 25Oi na fau ai e Ihaako he fata faitāulaga ma viviki ake ai ki te Aliki. Kua fakatū tana api i kinā, ma na toe keli ai foki e ana kaukauna hētahi vaikeli i kinā.
Te Māliliega i te vā o Ihaako ma Apimeleka
26Ka koi nofo ia Ihaako i Pelehepa, kae ōmamai kia te ia mai Kelala, ia Apimeleka te tupu, fakatahi ma Ahuhata tana faufautua ma Pikolo tana takitakikau.#Ken 21.22 27Na fehili atu ki ei ia Ihaako, “Heā te kua ōmamai ai koutou kia te au i te taimi nei, oi ka ko koutou nae ita mai kia te au ma koutou tuli kehea au mai te koutou fenua?”
28Na tali mai kilātou, “Kua kimātou iloa nei ko te Aliki e fakatahi ma koe, oi kua manatu ai kimātou ke fai he tātou feagaiga i te vā o koe ma kimātou. Ko kimātou e fofou ke takutino mai e koe, 29ka hē kē faia lele he mea ke āfāina ai kimātou, e vē lava oi hē kimātou faia he mea ke āfāina ai koe. Na alolofa atu kimātou kia te koe ma tuku atu koe ke fano ma te fīlēmū. Nei kua kitea lelei lava, ko koe kua fakamanuiagia e te Aliki.” 30Oi hāuni ai e Ihaako he kaiga lahi mo kilātou, ma na kakai ai ma feinu kilātou. 31I te tāeaopō na hohoko ai, na fai ai te tautōga i te vā o kilātou. Oi na fakamāvae ai loa ia Ihaako kia te kilātou, ma na olokehe ai kilātou ma te fīlēmū.
32Ko te aho lava tēnā na ōmamai ai nā kaukauna a Ihaako, ma lea kia te ia e uiga ki te vaikeli na kilātou kelia. Kua lea vē mai kilātou kia te ia, “Kua maua e kimātou te huāvai.” 33Na fakaigoa e Ihaako te vaikeli ko Hipaha (ko te uiga “tautōga”), ma ko te mea ia na fakaigoa ai te kakai ko Pelehepa#26.33 Pelehepa Ko te uiga o te igoa tēnei i te gagana Epelu Vaikeli o te Tautōga pe Vaikeli o te Fitu (kikila foki ki te 21.31) ke pa mai nei.
Nā Āvaga Nukukehe a Ehau
34I te kātoaga o te 40 tauhaga o Ehau, na fakaipoipo ai ki ni fafine e toka lua o te kau ha-Hitē, ko Iutita te afafine o Peeli ma Pahemata te afafine o Elona. 35Na kavea nā fafine iēnei ma fakafītāuli lahi kia Ihaako ma Lepeka.
Currently Selected:
Kenehe 26: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
