Kenehe 25
25
Iētahi Lāpuna o Apelaamo
(1 NT 1.32-33)
1Kua toe fakaipoipo ia Apelaamo ki hētahi fafine, ko tona igoa ko Ketula. 2Na fānau e ia nā ataliki iēnei o Apelaamo; ko Himilana, Iokahana, Metana, Mitiana, Ihipaka ma Huaha. 3Ko Iokahana ko te tamana ia o Heepa ma Tetana, ma ko nā lāpuna o Tetana ko nā tino ha-Ahulī, ha-Letuhī ma ha-Leumā. 4Ko nā ataliki o Mitiana ko Efaha, Epele, Hanoka, Apita, ma Eletaaha. Ko kilātou uma iēnei ni lāpuna e o Ketula.
5Ko nā mea uma lele a Apelaamo, na fakatofi ai e ia ia Ihaako. 6Kae i te taimi ka koi ola ai, na fōki e ia nā meālofa ki iētahi ona ataliki mai iētahi ana āvagapō, ma na uga kehe ai kilātou e ia mai tona ataliki ko Ihaako, ke olo ki te fenua i Hahae.
Te Otiga ma te Tanuga o Apelaamo
7-8Na oti ia Apelaamo kua matua lele ma kua kātoa tona 175 tauhaga. 9Na tanu ai e ona ataliki ko Ihaako ma Ihamaeli i te Ana i Makapela, i te fenua o Epelona te ataliki o Hohala o te kau ha-Hitē, i hahae o Mamele. 10Ko te fenua ia na fakatau mai e Apelaamo mai nā tino ha-Hitē; ko Apelaamo ma tana āvaga ko Hala na tanu uma i kinā.#Ken 23.3-16 11Kua oti ia Apelaamo, oi na fakamanuia ai e te Atua ia Ihaako tona ataliki, tēia nae nofo tafapili ki Peele-Lahai-Loi.#25.11 Kikila ki te 16.14
Nā Lāpuna o Ihamaeli
(1 NT 1.28-31)
12Ko nā lāpuna iēnei o Ihamaeli te ataliki o Apelaamo, ko tona mātua ko Hākā, te pologa Aikupito a Hala. 13Ko nā igoa iēnei o nā ataliki o Ihamaeli, i te fakahologa nā fānanau mai ai: Ko Nepaiota te ulumatua, ko Ketala, ko Atapeele, ko Mipihamu, 14ko Mihima, ko Tumaha, ko Maha, 15ko Hatata, ko Tema, ko Ietulu, ko Napihi ma Ketema. 16Ko kilātou iēnei ko nā tupuna o nā puikāiga e hefulu lua, ma ko nā igoa iēnei na fakaigoa ai o lātou nuku ma nā nofoaga nae api ai. 17Na oti ia Ihamaeli kua kātoa te 137 tauhaga te matua. 18Ko nā lāpuna o Ihamaeli na nonofo i te kakai i te vā o Havila ma Hula, i te itū ki hahae o Aikupito, i te fano āgai ki Ahulia. Na nonofo kehekehe ma iētahi lāpuna o Apelaamo.
Te Fānau maiga o Ehau ma Iakopo
19Ko te tala tēnei o Ihaako te ataliki o Apelaamo. 20Kua 40 ia tauhaga te matua o Ihaako i te fakaipoipoga kia Lepeka, te afafine o Petueli (he tino ha-Alamā mai Mehopotamia), ma ko he tuafafine e o Lapana. 21Ona ko Lepeka nae hē manava ola, nae tatalo ai ia Ihaako ki te Aliki mo ia. Na tali mai te Aliki ki ana tatalo, ma na faitama ai ia Lepeka i he māhaga. 22Ka ko hēki fānau ia Lepeka, ko te māhaga i loto o ia nae taufai tūfēke; ma na lea vē ai ia Lepeka, “Heā te kua tupu ai he mea vēnei kia te au?” Oi na fano ai kua fehili ki te Aliki mo he tali.
23Ma na vāgana mai te Aliki kia te ia,#Lom 9.12
“E lua ia mālō i loto o tō moegātama,
ma ko nā tino e fānau mai e koe ka fevaevaeaki;
ko tētahi ka mālohi atu i tētahi,
ko te tino matua ka tautua ki te tino tamaiti.”
24I te taimi na tuku e fānau ai, oi na fānau mai ai e Lepeka he māhaga tama. 25Ko te pepe muamua nae tai kulakula tona tino ma taufulufulua e vē he kofu pakumanu, oi na fakaigoa ai kia Ehau.#25.25 Ehau Ko te igoa tēnei e fakaaga kia Heili, te fenua na nofoia mulimuli e nā lāpuna o Ehau; ko Heili e tāli vē ko te fakaleoga o te kupu Epelu mo te taufulufulua 26Ko te lua o pepe na fānau mai e pipiki mau ki nā mulivae o Ehau, ma na fakaigoa ai kia Iakopo.#25.26 Iakopo Ko te igoa tēnei e tāli vē ko te fakaleoga o te kupu Epelu mo te mulivae Kua ono hefulu ia tauhaga o Ihaako i te taimi na fānau mai ai te māhaga.
Kua Fakafehuiaki e Ehau Tona Tofi Ulumatua
27Kua mātutua nā tama, ma kua kavea ia Ehau ma tagata poto i te tuli manu tāvao, ma nae lahi lava oi nofo i te vao. Kae ko Iakopo nae kehe; he tagata fīlēmū ma matamuli, ma nae nofo lava i te fale. 28Ko Ihaako nae hili atu tona fiafia kia Ehau, auā nae fiafia lele oi kai ki nā manu tāvao nae tāmate e Ehau; kae ko Lepeka nae hili atu tona alofa kia Iakopo. 29I tētahi aho, ko Iakopo nae tunu he hitiū e fai i ni fatu lākau kukula, kae pa mai ia Ehau i tana tuligā manu tāvao, ma kua fia kaia lele. 30Oi na lea atu ai ia Ehau kia Iakopo, “Ko au ka mate i te fia kaia, tuku mai ake ni aku mea kukula ke kai!” (Ma ko te mea ia na fakaigoa ai ia Ehau kia Etoma.#25.30 Etoma Ko te igoa tēnei e tāli vē ko te fakaleoga o te kupu Epelu mo te kukula)
31Na tali mai ia Iakopo, “Fōki mai muamua mo oku tō tofi ulumatua, oi kua fōki atu ai e au hau hitiū lenitili.”
32Oi na lea vē atu ai ia Ehau, “Kikila, ko au nei ka mate ona ko toku fia kaia; heā nei te aogā o te tofi ulumatua kia te au?”
33Na tali mai ia Iakopo, “Tautō mai kia te au muamua, ka fōki mai e koe tō tofi ulumatua mo oku.”#Epe 12.16
Oi fai ai te tautōga a Ehau ma tuku atu tona tofi ulumatua mō Iakopo. 34Oi na fōki ai loa e Iakopo kia Ehau ni mea falaoa ma te hitiū lenitili. Kua uma te kai ma inu o Ehau, oi na tū ai ki luga kua fano. Na kitea i te mea tēnei na fai e Ehau, te hē tāua kia te ia, o tona tofi ulumatua.
Currently Selected:
Kenehe 25: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
