Kenehe 24
24
Kua Hakili e Apelaamo he Āvaga mā Ihaako
1Kua teka na tauhaga e lahi, ma ko Apelaamo kua matua lele; ma nae fakamanuia lava e te Aliki i ana mea uma nae fai. 2Ma kua lea vē atu ia Apelaamo ki tana kaukauna e pito matua ma e pule i nā mea uma a ia, “Fakamolemole tuku mai tō lima ki te vā o oku ālaga#24.2 tuku… ālaga Ko te faiga ia nae fai ai nā takutinoga e mautinoa ai e hē huia lele ma fai hau takutinoga. 3Ko au e fofou ke fai hau takutinoga i te igoa o te Aliki, te Atua o te lagi ma te lalolagi, ka hē kē filifilia he āvaga mo toku ataliki mai nā afafine ha-Kananā, iēnei e nonofo fakatahi kitātou i te fenua tēnei. 4Kae fano ki te nuku na fānau ai au, oi hakili mai he āvaga ma toku ataliki ko Ihaako, mai nā kāiga o oku.”
5Kae kua lea mai te kaukauna, “E vēhea kāfai e hē fofou te tautiti ke ōmamai kimāua ki te fenua tēnei? Ka uga nei la e au te ataliki o koe ki te fenua na hau ai koe?”
6Na tali atu ia Apelaamo, “Hēai, ke mautinoa e koe ko toku ataliki e hē kē toe fakafokia ki kinā! 7Ko te Aliki, te Atua o te lagi, na ia kaumaia au mai te kāiga o toku tamana ma te fenua na fānau ai au. Na takutino mai e ia kia te au ma te fakamāoni, ka fōki e ia te fenua tēnei mo oku lāpuna. Ka uga atu e ia tana āgelu ke muamua ia te koe, kae ke maua e koe i kinā he āvaga mā toku ataliki. 8Kāfai te tautiti e hē fofou ke ōmamai koulua, ko koe la ka māgalo mai te takutinoga tēnei. Kae ia koe lava nā mao oi kave toku ataliki ki ei, e tuha lava pe heā te tupu.” 9Oi na tuku atu ai te lima o te kaukauna ki te vā o nā ālaga o tona matai ko Apelaamo, ma fai tana takutinoga ka ia faia te mea kua lea ake ai ia Apelaamo.
10Oi fano ai te kaukauna ma kave nā kāmela e hefulu, ma nā itūkāiga meālofa mānanaia kehekehe mai tona matai; ma kua fano ki te fenua ko Mehopotamia, ki te kakai nae nofo ai ia Nahoa. 11I te taunuku atuga, oi na fakatōtuli ai ei ia nā kāmela ki lalo i fafo o te kakai, i tafa o te vaikeli. Ko te taimi tēnā kua fakaafiafi lele, ma ko te taimi ia e ōmamai ai ia fafine oi ahu vai. 12Oi na tatalo ai vē, “Te Aliki, te Atua o toku matai ko Apelaamo, fehoahoani mai kō i te aho nei ke manuia te fekau na hau ai au, ma ke fakaalia tō fakamāoni ki tau folafolaga na fai ki toku matai. 13Kikila, ko au tēnei e i tafa o te vaikeli, te mea e ōmamai ki ei ia tautiti o te kakai oi ahu vai ai. 14Ko au ka lea ki hētahi o kilātou, ‘Fakamolemole tuku ifo kō tau faguvai#24.14 faguvai Fagu e fai i te ele e hiki i nā takuau pe i te ulu ke inu au.’ Kāfai ka lea mai, ‘Tago oi inu, ma ka fakainu foki e au ma nā kāmela a koe,’ ke kavea kō ia ia tēnā ko tē kua kē filifilia, mō tau kaukauna ko Ihaako. Kāfai e taunuku te mea tēnei, ka iloa ai e au ko koe e fakamāoni pea lava ki tau folafolaga ki toku matai.”
15Ka ko hēki uma tana tatalo kae pa mai ia Lepeka ki te vaikeli ma he faguvai i luga o tona takuau. Ko ia he afafine e o Petueli te ataliki o te uho o Apelaamo e igoa kia Nahoa, ma tana āvaga ko Mileka. 16Ko he tautiti kaulelei ma ko he tāupou. Kua fano ia Lepeka ki lalo o te vaipuna oi utu tana faguvai, ma toe fanake ai ki luga. 17Oi na vili atu ai ki ei te kaukauna oi fakafeiloaki ki ei ma lea vē atu, “Fakamolemole kō oi fakainu mai au i tau faguvai.”
18Na tali mai ia Lepeka, “Io te tamana, tago oi inu,” ma tuku fakavave ifo ki lalo tana faguvai mai tona takuau ma tāofi i nā lima o ia, ke inu te kaukauna. 19Kua uma te inu o te kaukauna, oi na lea atu ai ki ei te tautiti, “Ke fano au oi kaumai ni vai e lava ke fakainu ai nā kāmela a koe.” 20Oi na liligi fakavave ai e ia tana faguvai ki loto o te tānoa e fakainu ai nā manu, kae toe vili ki te vaikeli oi kaumai ni iētahi vai; ma na fakainu uma lele e ia nā kāmela. 21Nae taukikila lava te kaukauna ki te tautiti e aunoa ma he vaivaia, kae ke ia kitea pe kua fakamanuiagia tana faigāmalaga e te Aliki pe heai.
22Kua uma te fakainu o nā kāmela e te tautiti, oi na tōake ai ki luga e te kaukauna mai loto o tana taga, he mama-ihu aulo#24.22 E tuha ma te 6 kalama te mamafa ma ni taulima aulo e lua.#24.22 E tuha ma te 114 kalama te mamafa 23Kua lea vē atu te kaukauna, “Fakamolemole, taku mai ake pe ko koe he afafine e o ai? E iei nei he avanoa i te fale o tō tamana ke momoe ai kimātou?”
24Kua tali mai te tautiti, “Ko toku tamana ko Petueli, he ataliki e o Nahoa ma Mileka. 25E lahi nā meakai mo nā kāmela a koutou i to mātou fale, e iei foki te avanoa ke momoe ai koutou.”
26Oi na tōtuli ifo ai ki lalo te kaukauna ma fakafetai ki te Aliki, 27ma lea vē, “Ke vīkia te Aliki, te Atua o toku matai ko Apelaamo, tē kua hē uma tona alofa tūnoa ma tona fakamāoni ki toku matai. Kua ia takitaki maia au ki te kāiga o toku matai.”
28Oi na vili ai te tautiti ki te fale o tona mātua, ma taku ki ei nā mea uma iēnei. 29Nae iei he tuagane matua o Lepeka ko Lapana te igoa, kua vili ki te vaikeli ki te mea nae iei ai te kaukauna a Apelaamo. 30Kua kitea e ia te mama-ihu ma nā taulima i nā lima o tona tuafafine, ma kua ia iloa foki te fakamatalaga a te kaukauna na fai ki tona tuafafine ko Lepeka. Oi na fano ai ki te kaukauna a Apelaamo, ma na tau atu ki ei e tū i tafa o ana kāmela e pili ki te vaipuna. 31Kua lea vē atu ki ei, “Hau tā olo ki te fale. Ko koe kua fakamanuia e te Aliki. Heā te tū ai koe i fafo? Kua uma te hāuni o te fale vēnā ma he mea ke tuku ai nā kāmela a koe.”
32Oi na fano ai te kaukauna ki lotofale, kae kua fakatonu e Lapana ke laku ki lalo nā uta a nā kāmela ma ke fafaga ma fakainu. Na fakatonu foki e ia ke kaumai ni vai ki te kaukauna ma nā tāulelea na ōmamai ma ia, ke fulufulu ai o lātou vae. 33Kua hāuni te meakai ka kakai, kae kua lea vē atu te kaukauna a Apelaamo, “Ko au e hē mafai ke kai, heiloga kua lea atu au i te fekau na hau ai au.”
Kua lea mai ia Lapana ki ei, “Leamai ake la pe ko heā!”
34Oi na lea vē atu ai te kaukauna, “Ko au he kaukauna e a Apelaamo. 35Kua fakamanuia lahi e te Aliki toku matai, ma kua tamaokāiga lele ai. Kua fōki e ia ki toku matai, nā lafumāmoe, nā lafuoti, nā lafupōvi, nā hiliva ma nā aulo, nā kaukauna tagata ma nā kaukauna fafine, nā kāmela ma nā āhini. 36Na fānau e Hala, te āvaga a toku matai, he ataliki ka kua matua lele ai; ma kua tuku e toku matai ana mea uma lele ki tona ataliki. 37Na fakatautō au e toku matai ko au ke uhitaki ake ki tana fakatonuga ma na lea vē mai ai, ‘E hē kē filifilia lele he āvaga mā toku ataliki, mai nā afafine o ha-Kananā e o lātou te fenua tēnei e nofo ai au. 38Kae fano ki nā kāiga o toku tamana, oi filifili mai ai he āvaga mā toku ataliki.’ 39Ma na fehili au ki toku matai, ‘E vēhea kāfai te tautiti e hē fofou ke ōmamai kimāua?’ 40Kae na tali vē mai ia, ‘Ko te Aliki, tē e uhitaki pea lava au ki ei, ka ia uga atua tana āgelu ke olo ma koe kae ke iku manuia te fekau. Ka kaumai e koe he āvaga ma toku ataliki mai oku tagata, mai te kāiga o toku tamana. 41E fokotahi oioti lava te auala ka māgalo ai koe mai tau tautōga. Kāfai koe e pa ki oku kāiga kae teteke mai koe, oi kua māgalo ai koe.’
42“I toku pa maiga la ki te vaikeli i te aho nei, ko au na tatalo, ‘Te Aliki, te Atua o toku matai ko Apelaamo, fakamolemole fehoahoani mai ke iku manuia te fekau na uga mai ai au. 43Tēnei au e i te vaikeli. Kāfai he tautiti e hau oi utuvai, ko au ka lea ki ei ke fakainu au i tana faguvai. 44Kāfai e fakainu au e ia ma kaumai foki e ia ni vai mo aku kāmela, ke kavea kō ia ia tēnā, ko tē kua filifilia e te Aliki ke fai ma āvaga a te ataliki o toku matai.’ 45Ko hēki uma taku tatalo i toku loto, kae hau ia Lepeka ma he faguvai i tona takuau, ma kua fano ki lalo i te vaikeli oi utu. Kua lea atu au ki ei, ‘Inu kō au, fakamolemole.’ 46Na tuku vave e ia te faguvai ki lalo mai tona takuau, ma lea vē mai, ‘Ia oi inu, ma ka fakainu foki e au nā kāmela a koe.’ Oi na inu ai loa au, ma na fakainu foki e ia nā kāmela. 47Oi na fehili atu ai au ki ei, ‘Ko koe he afafine e o ai?’ Na tali mai ia, ‘Ko au he afafine o Petueli te ataliki o Nahoa ma Mileka.’ Oi na tuku ai e au te mama ki tona ihu ma nā taulima ki ona lima, 48ma tōtuli ifo ai au ki lalo oi fakafetai ki te Aliki. Na viviki ake au ki te Aliki, te Atua o toku matai ko Apelaamo, tē na ia takitaki hako maia au ki te kāiga o toku matai, ke kave tona afafine ma āvaga a te ataliki o toku matai. 49Nei la, kāfai e fofou koulua ke fakatāunuku ma te fakamāoni oulua tiute ki toku matai, fakamolemole leamai ake kia te au; kāfai e hēai, lea mai, oi kua kikila ai au pe ko heā ta aku ka fai.”
50Na tali vē atu ki ei ia Lapana ma Petueli, “Ona ko te mea tēnei e hau mai te Aliki, e hē faia la e kimāua he tonu. 51Kikila, tēia ia Lepeka; kave oi olo, ke kavea ia ma āvaga a te ataliki o tō matai, e vē ona vāgana ai te Aliki.” 52I te lagona atuga e te kaukauna a Apelaamo te mea tēnei, oi na punou ifo loa ki lalo ma viviki ki te Aliki. 53Ma na tōake ai e ia ki luga nā kie, nā mea teuteu e fai i te hiliva ma te aulo, ma tuku atu kia Lepeka. Na ia fōkia foki ki te tuagane ma te mātua o Lepeka, nā meālofa taugatā.
54Oi na kakai ai loa te kaukauna a Apelaamo ma nā tāulelea na ōmamai ma ia, ma momoe ai i kinā i te pō. Kua āla kilātou i te tāeao, oi na lea atu ai te kaukauna, “Ke toe fano kō au ki toku matai.”
55Na tali mai te tuagane ma te mātua o Lepeka, “Tuku kō te tautiti ke nonofo tahi kimātou mo hina taimi, pe he vaiaho pe ni aho e hefulu, oi kua tuku ai ke fanatu.”
56Kae kua lea vē atu te kaukauna, “Ia au kō nahe tāofia, auā kua fakamanuiagia e te Aliki te fekau na hau ai au; tuku mai au ke toe fano ki toku matai.”
57Na tali mai kilāua, “Ke kalaga la ki te tautiti pe vēhea mai.” 58Oi na kālalaga ai kilāua kia Lepeka ma fehili vē atu ki ei, “E fia fano koe nei i te kau a te tamāloa tēnei?”
Na tali mai ia Lepeka, “Io, ko au ka fano.”
59Oi na tuku ai loa e kilāua ia Lepeka ma te kaukauna fafine nae ia kikilāgia ia Lepeka mai tona pepe, ke olo ma te kaukauna a Apelaamo ma nā tāulelea na ōmamai kilātou. 60Ma na tuku atu te lā fakamanuiaga kia Lepeka e ala i nā kupu iēnei:
“Ke kavea koe, te tuafafine, ma mātua o ni fānau e miliona ma miliona!
Ke fakatōkilalo e nā lāpuna o koe, o lātou fili!”
61Oi na hāuni ai loa ia Lepeka ma ana kaukauna teine, ma kua tiketike i luga o nā kāmela, ma na olo ai loa ma te kaukauna a Apelaamo.
62I te taimi ka koi fakaauau te lātou faigāmalaga, ko Ihaako kua fanaifo mai Peele-Lahai-Loi#24.62 Kikila ki te 16.14 ma kua fano oi nofo i te itū ki haute o Kanana. 63I te fakaafiafi, na fano ai ia Ihaako oi hāvalivali i te fenua, kae ia kitea atu nā kāmela ma nā tino e tiketike ai, e ōmamai. 64I te kitea atuga o Ihaako e Lepeka, oi na fano ai ki lalo o te kāmela 65ma fehili vē atu ki te kaukauna a Apelaamo, “Ko ai te taulealea tēnā e havali āgai mai kia te kitātou?”
Na tali mai te kaukauna, “Ko toku matai!” Oi na tago ai loa ia Lepeka oi tatao ona mata i tona pulupulu.
66Kua fakamatala e te kaukauna kia Ihaako nā mea uma na ia faia. 67Oi na kaumai ai e Ihaako ia Lepeka ki loto o te falekie nae nofo ai ia Hala tona mātua, ma na kavea ai ia Lepeka ma ana āvaga. Nae alofa lele ia Ihaako kia Lepeka, ma na kavea ia ma fakamāfanafanaga lahi ki te ia, i te otiga o tona mātua.
Currently Selected:
Kenehe 24: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
