Kenehe 23
23
Ko te Mate o Hala
1Na mate ia Hala kua 127 ona tauhaga. 2Na mate i Kiliata Alapa (ko Hepelona tēnā) i te fenua ko Kanana; ma na fano ai ia Apelaamo ki te kaitagi o Hala, ma na tagi ai i tona fakanoanoa.
3Kua fano kehe ia Apelaamo mai te mea nae takoto ai te tinooti o tana āvaga, ma kua fano ki nā tino ha-Hitē ma lea vē atu ki ei, 4“Ko au nei ko he tino kehe e nofo aumau i te koutou fenua; tuku mai kō he fenua ke fakatau e au ke tanu ai taku āvaga.”#Epe 11.9, 13; Gāl 7.16
5Na tali mai kilātou kia te ia, 6“Te tamana, fakalogo tahi mai ake kia te kimātou! I te tātou nonofo i kinei, ko koe ko he takitaki takutakua. Fano oi tanu tau āvaga i te tugamau e hili te lelei i kinei. Ka fiafia lele ho he tino o kimātou, ke fōki atu kia te koe he tugamau, ke mafai ai e koe oi tanu tau āvaga.”
7Oi na tū ai ki luga ia Apelaamo, kua ifo atu ki mua o kilātou 8ma lea vē atu ki ei, “Kāfai koutou e mālilie ke tanu e au taku āvaga i kinei, fakamolemole kō oi lea kia Epelona te ataliki o Hohala, 9pe mafai ke fakatau mai kia te au te Ana o Makapela, tēia e tafapili ki te pito o tona fenua. Lea ki ei ke fakatau mai kia te au i te tau kātoa o te fenua, i kinei i mua o koutou, ke fai ma fenuatanu o oku.”
10Ka koi tautala ia Apelaamo ka ko Epelona nae nonofo fakatahi mai lava ma iētahi tino ha-Hitē i te malae fono i te alapupuni o te kakai; ma na lagona e nā tino uma nae iei, te tali vē atuga o Epelona kia Apelaamo, 11“Heai kō, te tamana. Fakalogo tahi mai ake! Ka kō fōki atua kia te koe te kelekele kātoa fakatahi ma te ana e i loto. I kinei i mua o oku tagata, ka fōki atu e au kia te koe, ke tanu ai tau āvaga.”
12Oi na ifo atu ai ia Apelaamo ki mua o nā tino o te fenua, 13ma lea vē atu kia Epelona kae ke lagona uma e nā tino nae iei, “Fakamolemole, fakalogo mai kō ke lea atu au kia te koe. Ka tuku atu e au kia te koe te tau kātoa o te fenua. Talia kō e koe te totogi, oi kua tanu ai e au taku āvaga i kinā.”
14Na tali mai ia Epelona, 15“Te tamana, ko te tau o te fenua e nā ko te fa helau tupe hiliva—kia te koe ma au, e hēai lele he uiga! Tanu tau āvaga i kinā.” 16Na malie ia Apelaamo, oi na fua ai e ia te tupe kātoa na lea ai kia Epelona i mua o tagata—e fa helau ia tupe hiliva, e tuha ai ma te fua māhani nae fakaaogā e nā tino fakatau koloa i te vāitaimi tēnā.
17Oi ko te fenua la o Epelona i Makapela, i te itū ki hahae o Mamele, te fenua kātoa nae i loto ai te ana ma nā lākau nae iei, na tuku atu ke kavea ma fenua o 18Apelaamo, i mua o nā tino ha-Hitē nae iei i te malae fono i te alapupuni o te kakai.
19Kua uma atu tēnā, oi na tanu ai e Apelaamo tana āvaga ko Hala, i te ana i loto o te fenua i Makapela e fakahaga ki Mamele (pe ko Hepelona tēnā,) i te fenua ko Kanana. 20Ma ko te fenua nae o nā tino ha-Hitē vēnā ma te ana i loto, kua kavea ma fenua tōtino o Apelaamo, ke fai ma fenuatanu.
Currently Selected:
Kenehe 23: TOKU
Highlight
Share
Copy
Want to have your highlights saved across all your devices? Sign up or sign in
Bible Society New Zealand Charitable Trust
