Kenehe 21

Ko te Fānau maiga o Ihaako

1Na fakamanuia e te Aliki ia Hala e vē ona folafola e ia, 2ma na faitama ai ia Hala ma fānau mai e ia he ataliki mo Apelaamo, ka kua matua lele ai ia Apelaamo. Ko te tama na fānau mai i te taimi na lea te Atua e fānau mai ai.#Epe 11.11 3Na fakaigoa e Apelaamo tona ataliki mai ia Hala kia Ihaako, 4ma i te kātoaga o te valu o aho te matua o Ihaako, na pelitome ai e Apelaamo e vē ko te fakatonuga a te Atua.#Ken 17.12; Gāl 7.8 5Kua helau ia tauhaga o Apelaamo i te taimi na fānau mai ai ia Ihaako. 6Ma na lea vē ai ia Hala, “Kua kaumai e te Atua kia te au te fiafia ma te kata.#21.6 kata Ko te uiga o te igoa Ihaako i te gagana Epelu kua kata (kikila foki ki te 17.17-19) Ho he tino e ia lagona te mea tēnei ka kata fakatahi ma au.” 7Oi na toe lea vē ai, “Ko ai te na vēake e lea he tino kia Apelaamo, ko Hala e fakahuhu pepe? Kae ko tēnei kua fānau e au tona ataliki ka kua matua lele.”

8Na tuputupu pea te matua o te tamaiti, ma i te aho na fakateka ai ma te huhu, na hāunia ai e Apelaamo he kaiga lahi.

Kua Tuli kehe ia Hākā ma Ihamaeli.

9I tētahi aho, na kitea atu e Hala ko te ataliki o Hākā te fafine Aikupito, tēia na fānau ia Apelaamo, e faitāfaoga ma#21.9 faitāfaoga ma pe taufakalili ki tona ataliki ko Ihaako.#21.9 Ko iētahi fakaliliuga tuai e leamai tona ataliki ko Ihaako E hē i te tuhituhiga Epelu nā kupu iēnei 10Oi na lea atu ai ia Hala kia Apelaamo, “Tuli kehe te fafine pologa ma tona ataliki; auā ko te ataliki o te fafine tēnei, e hē tatau ke fai tofi fakatahi ma toku ataliki ko Ihaako.”#Kal 4.29-30 11Na fakanoanoa lahi lele ia Apelaamo i te mea tēnei, auā ko Ihamaeli foki he ataliki e o ia. 12Kae kua vāgana mai te Atua kia Apelaamo, “Koe nahe popole ona ko te tama a tau pologa ko Hākā. Kae fai e koe ho he mea e lea atu ai ia Hala, auā e ala ia Ihaako ka maua ai e koe nā lāpuna na folafola atu e au kia te koe.#Lom 9.7; Epe 11.18 13Ma ka kō faia foki nā lāpuna o te ataliki o te fafine pologa ke kavea ma mālō, auā ko he ataliki foki lava e o koe.”

14I te tāeaopō na hohoko ai, na kave ai e Apelaamo ni meakai ma he tagavai pakumanu ma fōki kia Hākā. Kua fakauta e ia te tamaiti ki te tua o te fafine oi uga ai ke olo. Oi na fano kehe ai te fafine, kua fano oi tāevaeva holo i te vao o Pelehepa. 15I te umaga o nā vai nae i loto o te tagavai pakumanu, oi na tuku ai e Hākā te tamaiti ki lalo o ni tamā lākau, 16kae kua fano oi nofo mamao mai, pe tuha e helau mita mai te mea nae iei ai te tamaiti. Kua lea ve ifo i tona loto, “E hē kō nafatia ke kikila oku mata ki taku tama i te taimi e oti ai.” Ma ka koi nofo lava i kinā, ka kua kāmata oi tagi.#21.16 kāmata oi tagi e fokotahi te fakaliliuga tuai e leamai tagi te tamaiti

17Mulimuli ake, oi na lagona ai e te Atua te tagi a te tamaiti, ma na vāgana vē mai ai te āgelu a te Atua mai te lagi kia Hākā, “Hākā, heā te kua tupu kia te koe? Ia koe nā mataku auā kua lagona e te Atua te tagi a te tamaiti. 18Tū ki luga, fano oi hiki te tamaiti ma fehoahoani ki ei; auā ka kō faia ona lāpuna ma mālō tokalahi.” 19Oi na fakapupula ai e te Atua ia mata o Hākā, ma na ia kitea ai he vaikeli. Kua utu fakatumu e ia te tagavai pakumanu i te vai, ma fakainu ai te tamaiti. 20Ma ko te Atua nae fakatahi pea lava ma te tamaiti i tona tuputupu ake. Na ola ake te tamaiti i te vao o Palana ma na kavea ma tagata tuli manu takutakua. 21Na maua e tona mātua he fafine Aikupito ke fai ma āvaga a tona ataliki.

Ko te Māliliega i te vā o Apelaamo ma Apimeleka

22I tētahi aho, na olo ai ia Apimeleka ma Pikolo tana takitakikau kia Apelaamo, ma lea vē atu ki ei, “Ko te Atua e fakatahi pea ma koe i nā mea uma e fai e koe.#Ken 26.26 23Ko te mea la ia, tautō i mua o te Atua, ko koe ka hē fai mea fakatogafiti mai kia te au, ki taku fānau, pe ki nā lāpuna o oku. Ko au e fakamāoni lava i nā mea uma e kō faia mo koe, ma ko au e fofou ke takutino mai e koe kia te au, ko koe foki ka fakamāoni mai kia te au, ma ki nā tino o te fenua tēnei e nofo ai koe i te taimi nei.”

24Ma kua lea atu ia Apelaamo, “Ko au e tautō atu.”

25Na fai te fakaheā a Apelaamo kia Apimeleka, ona ko te vaikeli na puke fakamālohi e nā kaukauna a Apimeleka. 26Kae na tali mai ia Apimeleka, “E hē kō iloa pe na fai e ai te mea tēnā. E hēki lea lele mai ai koe, ma e fātoā kō lagona atu nei he mea vēnā.” 27Oi na fōki ai e Apelaamo ni māmoe ma ni pōvi kia Apimeleka, ma na fakamautū ai loa te feagaiga i to lā vā. 28Kua tuku kehe e Apelaamo ni punuāmāmoe fafine e fitu mai tana lafumāmoe, 29ma kua fehili atu ki ei ia Apimeleka, “Heā te uiga kua vavae kehe ai e koe nā punuāmāmoe fafine e fitu?”

30Na tali mai ia Apelaamo, “Ko nā punuāmāmoe fafine iēnei e fitu ka tuku atu e au kia te koe, kae ke fai ai koe ma molimau, ko te vaikeli tēnei na kō kelia.” 31Ma ko te mea ia na fakaigoa ai te mea tēnā ko Pelehepa,#21.31 Pelehepa Ko te uiga o te igoa i te gagana Epelu Vaikeli o te Tautōga pe Vaikeli o te Fitu (kikila foki ki te 26.33) ona ko kinā te na fai ai te lā tautōga.

32Kua uma te fai o te lā feagaiga i Pelehepa, oi na toe foki ai ia Apimeleka ma Pikolo ki Filihitia. 33Na totō ai e Apelaamo he lākau e igoa ko te tamalihi i Pelehepa, ma tāpuaki atu ki te Aliki, te Atua o te Fakavavau. 34Ma na lahi nā tauhaga na nofo ai ia Apelaamo i Filihitia.

Currently Selected:

Kenehe 21: TOKU

Highlight

Copy