Kenehe 20

Ko Apelaamo ma Apimeleka

1Kua teka atu he taimi, oi na olo ai ia Apelaamo ma tona kāiga āgai ki te koga i haute o Kanana. Na fakatū te lātou api i te vā o Kateha ma Hula. Mulimuli ake, oi na fano ai kua nofo i Kelala mo he taimi pukupuku. 2Ma na lea vē atu ai ia Apelaamo ki nā tino e uiga ki tana āvaga ko Hala, “Ko he tuafafine e ōku tēnei.” Oi na fakatonu ai e Apimeleka te tupu o Kelala, ke kaumai ia Hala kia te ia.#Ken 12.13; 26.7 3Kae na fakaali te Atua kia Apimeleka i he miti i te pō, ma vāgana vē atu ki ei, “Kikila, ko koe ka oti, auā kua kē kavea te fafine tēnei; he āvaga e a he tino.”

4Kae ko Apimeleka e hēki momoe ma Hala, ma na lea vē atu ai, “Te Aliki, e fakaumatia nei e koe he tino e hēai hana holi tūlāfono? 5E hēki leamai nei ia Apelaamo kia te au, ‘Ko he tuafafine e ōku tēnei’? Ma ko Hala foki lava na lea vē mai, ‘Ko ia he tuagane e ōku.’ Na kō faia te mea tēnei ma toku lotofuatiaifo e mamā, ma e hēai haku mea hehē kua fai.”

6Na tali ki ei te Atua i te miti, “Io, e iloa e au na kē faia ma tō lotofuatiaifo e mamā; ma ko au te na tāofiagia koe ke nahe agahala mai kia te au, ma na hēki fakataga ai koe ke paki kia Hala. 7Toe fakafoki nei loa te fafine ki tana āvaga; auā ko te tino tēnā he pelofeta, ma ka tatalo ia mo koe kae ke hē oti ai koe. Kae kāfai te fafine e hē kē toe fakafokia ki tana tāne, ke iloa lelei lava la e koe, ko koe ka oti fakatahi ma nā tino uma o tō kaukāiga.”

8I te tāeaopō o te aho alafaki, na fakamāopōpo ai e Apimeleka ana kaukauna ma fakailoa atu kia te kilātou nā mea uma iēnei, oi na mātataku lele ai kilātou. 9Oi na fekau ai e Apimeleka ia Apelaamo, ma lea vē atu ki ei, “Heā ta koe kua fai kia te kimātou? Heā nei haku agahala kia te koe, kua kē fakaekea mai ai tēnei puapuagā ki luga o oku ma toku mālō? Kua kē faia kia te au nā mea e hē tatau ke fai ki he tino. 10Heā te na fai ai e koe?”

11Na tali mai ia Apelaamo, “Na fai e au auā na vēake lava au, e hēai he tino fokotahi i kinei e mataku i te Atua, ma e i nā ka tāmate au e kilātou ona ko taku āvaga. 12E hē gata i tēnā, ko ia ko he tuafafine moni e ōku. He afafine o toku tamana, kae hē o toku mātua ma na kavea ma aku āvaga. 13Ma i te uga kehega o au e te Atua mai te kāiga o toku tamana ke nofo aumau i nā nuku kehe, na lea vē au kia Hala, ‘E mafai ke fakaali tō fakamāoni mai kia te au, kāfai koe e lea ki hō he tino i nā mea e olo kitāua ki ei, ko au he tuagane e o koe.’ ”

14Oi na toe fakafoki ai loa e Apimeleka ia Hala kia Apelaamo. Na ia fōkia foki mā Apelaamo ni māmoe, ni pōvi ma ni kaukauna. 15Ma na lea vē atu ai ia Apimeleka kia Apelaamo, “Kikila, ko toku fenua kātoa tēnei; nofo i hō he mea e fia nofo ai koe.” 16Oi na lea vē ai kia Hala, “Ka fōki e au ki tō tuagane ni tupe hiliva e afe, ke fai ma fakamāoniga ki tagata uma ko koe e hē nofo hala; ka iloa e tagata uma lele e hēai hau mea hehē na fai.”

17-18Ona ko te mea na tupu kia Hala te āvaga a Apelaamo, na fai ai e te Aliki ke nahe mafai he fafine i te fale o te tupu ko Apimeleka ke faitama. Oi na tatalo ai ia Apelaamo mo Apimeleka, ma na fakamālōlō ai ia e te Atua. Na fakamālōlō foki ma tana āvaga ma ana pologa fafine, kae ke maua ni a lātou fānau.

Currently Selected:

Kenehe 20: TOKU

Highlight

Copy