Kenehe 18

Kua Folafola he Ataliki mo Apelaamo

1Na fakakitea te Aliki kia Apelaamo i tafa o nā aoa#18.1 pe telepini pe lākau tapu o Mamele. E nofo ia Apelaamo i te faitotoka o tona falekie i te taimi o te vevela o te lā, 2kae kikila atu, e toka tolu ia tamāloa e tutū mai i mua o ia. Na ia kitea atu lava oi vili loa oi fakafeiloaki ki ei, ma ifo ki lalo i mua o kilātou #Epe 13.2 3ma lea vē atu, “Nā Tamana, afe mai kō ki toku fale; ko au e i kinei ke kaukauna atu kia te koutou. 4Ke kaumai kō ni mea vai ke fulufulu ai outou vae, oi kua mālōlō mai ai ki lalo o te lākau tēnei. 5Ke kaumai foki e au he tamā mea ke kai ke maua ai he koutou mālohi, oi kua toe fakaauau ai te malaga, auā koutou kua kui mai i te mea e iei ai tautou kaukauna.”

Na tali mai kilātou, “Kua lelei, ke i nā fai vēnā e vē ko tō fakataumuna mai.”

6Ma na fano fakavave loa ia Apelaamo ki loto o te falekie ma lea vē atu kia Hala, “Fakavave, kave he taga o te falaoa mata e hili te lelei, ma tao ni falaoa.” 7Oi tātitili ai loa ia Apelaamo ki tana lafumanu, kua popoki e ia he punuāpōvi peti ma hili te lelei i te kai, ma fōki ki tana kaukauna ke kave oi tāmate ma fakavela vave. 8Kua vela te meakai, oi na kave ai e Apelaamo nā kulimi lololo, nā huhu, ma te punuāpōvi, ke kakai ai nā tamāloa. Ma i lalo o te lākau na laulau ai e ia te lātou meakai; ma na kakai ai kilātou kae kua tū atu ia i o lātou tafa.

9Na fehili mai kilātou kia Apelaamo, “Tēfea tau āvaga, ia Hala?”

Na tali atu ia Apelaamo, “E i loto o te falekie.”

10 # Lom 9.9 Kua leamai hētahi o kilātou, “E iva māhina kāmata atu nei ka toe liliu mai ai au, ma ko tau āvaga ko Hala, ka iei tona ataliki.”

Ko Hala nae i tua o Apelaamo i te faitotoka o te falekie, nae fakalogologo ki nā tala nae fai. 11Ko Apelaamo ma Hala kua mātutua lele, ma kua leva lele foki oi hē toe maua ia Hala i te tauale o fafine. 12Oi na kata ifo ai ia Hala i tona loto ma vē ake, “I te taimi nei ko au kua matua ma vāivai, ma ko taku āvaga foki kua matua. Koi mafai nei au ke fiafia oi toe momoe ma taku āvaga?”#1 Pet 3.6

13Oi na fehili vē mai ai te Aliki kia Apelaamo, “Heā na kata ai ia Hala ma lea vē, ‘E mafai moni nei ke fānau haku tamaiti ka ko au kua matua lele?’ 14E iei nei he mea e faigatā ki te Aliki? E vē ko toku lea atuga, e iva māhina kāmata atu nei, ka toe hau ai au, ma ko Hala ka iei tona ataliki.”#Luk 1.37

15Kae ona ko Hala na mataku, na fakafiti ai ma lea vē, “Ko au e hēki kata.”

Na tali mai te Aliki, “Hēai, ko koe na kata.”

Kua Talohaga ia Apelaamo ke Fakahao ia Hotoma

16Oi na olokehe ai nā tamāloa mai kinā ma kua olo ki he kogāfenua ke kilātou kitea ifo ai ia Hotoma ki lalo, ma na mulimuli atu ki ei ia Apelaamo ke fakahino to lātou auala ma fakatōfā ki ei. 17Ma na vē ifo ai te Aliki kia te ia lava, “E mumuni nei e au taku mea ka fai, mai ia Apelaamo, 18auā ko tēia ko nā lāpuna o Apelaamo ka kavea ma nuku tokalahi ma te mālohi, ma ka fakamanuia e au ia mālō uma e ala ia te ia?#18.18 ka fakamanuia… ia te ia pe ko mālō uma ka lea mai ke fakamanuia kilātou e vē ko te fakamanuiaga e au o ia 19Hēai, auā kua kō filifilia#18.19 filifilia i te tuhituhiga Epelu e leamai iloagia ia, ke takitakia ona ataliki ma ona lāpuna ke uhitaki mai kia te au, ma ke kilātou faia te mea e hako ma tonu; kae ke fakatāunuku ai e au nā mea uma kua folafola e au kia te ia.”

20Oi na vāgana vē atu ai te Aliki kia Apelaamo, “Ona kua kō lagona te kino lahi o nā mōliaga e uiga ki tagata o Hotoma ma Komola, ma te fakamātakutaku o a lātou agahala, 21ko au ka fano ki lalo oi kikila ke kō iloa pe hako nā mōliaga kua lagona e au.”

22Oi na olo ai loa nā tamāloa e toka lua āgai ki Hotoma, ka ko Apelaamo kua tū lava i mua o te Aliki. 23Kua hōhō atu ia Apelaamo ki tafa o te Aliki ma fehili vē atu ki ei, “Ko koe moni ka fano oi fakatāugā nā tino āmiotonu fakatahi ma nā tino agahala? 24Kāfai e iei ni tino āmiotonu e toka lima hefulu i te kakai, ka fakatāugā nei e koe te kakai kātoa? Ka hē fakahaoa nei e koe te kakai, ona ko te toka lima hefulu i loto e āmiotonu? 25E moni nei e mafai ke tāmate e koe nā tino āmiotonu fakatahi ma nā tino agahala. Kāfai e kē faia te mea tēnā, ko tona uiga kua kē fakahalagia fakatahi nā tino e hēai ni holitūlāfono ma nā tino kua holitūlāfono. E hē fetaui te mea tēnā. E hē tatau nei te fakamahino o te lalolagi kātoa ke ia faia te mea e tonu?”

26Na tali vē mai te Aliki, “Kāfai e kō maua ni tino āmiotonu e toka lima hefulu i Hotoma, ka kō fakahaoa te kakai kātoa ona ko te toka lima hefulu tēnā.”

27Kua lea atu ia Apelaamo, “Kikila, fakamāgalo mai au te Tamana, auā ia au e tautala vēnei atu kia te koe. Ko au nei kua nā ko he tagata, ma e hēai lele haku āiā ke tautala ai au ki he mea. 28Kae e vēhea pe kāfai e toka fa hefulu lima ia tino āmiotonu kae hē toka lima hefulu? E fakatāugā nei e koe te kakai ona ko te toka lima kua hē kātoa ai?”

Kua tali mai te Aliki, “E hē kō fakatāugāgia te kakai, kāfai e kō maua ai ni tino āmiotonu e toka fa hefulu lima.”

29Kua toe lea atu ia Apelaamo, “E vēhea pe kāfai e toka fa hefulu.”

Na tali mai te Aliki, “E hē kō fakatāugāgia kāfai e iei he toka fa hefulu.”

30Kua lea atu ia Apelaamo, “Fakamolemole te Tamana, koe kō nahe ita. Ko au e toe fia fehili atu lava. E vēhea pe kāfai e toka tolu hefulu?”

Na tali mai ia, “E hē kō faia kāfai e kō maua he toka tolu hefulu.”

31Kua toe lea atu ia Apelaamo, “Kikila, fakamāgalo mai au auā ia au e tautala vēnei atu lava kia te koe, te Tamana. E vēhea pe kāfai e toka lua hefulu ia tino āmiotonu e maua i te kakai?”

Na tali mai ia, “E hē kō fakatāugāgia te kakai kāfai e kō maua ai he toka lua hefulu.”

32Oi na toe lea atu ai ia Apelaamo, “Fakamolemole te Tamana, koe kō nahe ita kae ke toe fehili tahi atu lava au. E vēhea la pe kāfai e toka hefulu oioti e maua ai?”

Ma na tali mai ia, “E hē kō fakatāugāgia kāfai e kō maua ai he toka hefulu.” 33Oi na fano ai loa te Aliki i tona auala, kae toe foki ia Apelaamo ki te mea nae nofo ai.

Currently Selected:

Kenehe 18: TOKU

Highlight

Copy