Kenehe 13

Kua Olo kehekehe ia Apelamo ma Lota

1Oi na fano ai ia Apelamo āgai ki te itū ki mātū mai Aikupito, ki te kogāfenua ki haute o Kanana; ko ia ma tana āvaga ma ana meatōtino uma lele, na fano ai foki ma Lota. 2I te taimi tēnā ko Apelamo kua maukoloa lele i te lahi o ana māmoe, ana oti, ana pōvi, vēnā ma ana hiliva ma aulo. 3Oi na fano kehe ai mai kinā ma kua malaga atu mai tēia koga ki tēia koga āgai ki Peteli. Na taunuku atu ki te koga i te vā o Peteli ma Ai, te mea na api ai foki muamua 4ma na ia faua ai he fata faitāulaga; ma ko kinā na tāpuaki atu ai ia ki te Aliki.

5Ko Lota foki, tēia na olo ma Apelamo, nae iei ana māmoe, ana oti ma ana pōvi, ma nae iei foki tona kaukāiga ma ana kaukauna. 6Ona ko te lahi o a lā lafumanu kua hē lava ai te kelekele mo kilāua toka lua ma a lā lafu. 7Oi na kāmata ai kua tauaimiha pea lava nā tauhi manu a Apelamo ma nā tauhi manu a Lota. (I te taimi tenā koi nonofo ai lava i te fenua tēnei nā tino ha-Kananā ma ha-Pelehī.)

8Kua pa ki tētahi aho, oi na lea atu ai ia Apelamo kia Lota, “Ko kitāua e kāiga, oi e hē tatau lele ke tauaimiha kitāua pe ko nā tauhi manu a kitāua. 9Ko te mea ia, keina tā olo kehekehe loa. Filifili e koe hō he vāega o te fenua e fofou koe ki ei, oi fano ai ki ei kae fano au ki hētahi mea.”

10Na tau kikila holo ia Lota, ma na ia kitea ai ko te Vanu kātoa o te Iolitana, ke pa lele ki Hoala, nae lahi lele te vai nae iei, e vē ko te Fātoaga o te Aliki,#13.10 Fātoaga o te Aliki He fakakupuga e uiga ki te Fātoaga ko Etena pe vē foki ko te fenua ko Aikupito. (Ka ko hēki fakatāugāgia ai e te Aliki nā kakai ko Hotoma ma Komola.)#Ken 2.10 11Oi na filifili ai e Lota te kogāfenua kātoa o te Vanu o te Iolitana mo ia, ma fano āgai ki te itū ki hahae. Na vēnā la oi olo kehekehe ia Apelamo ma Lota. 12Na nofo ia Apelamo i te fenua ko Kanana, ka ko Lota kua fano ki nā koga nae iei nā kakai i nā fenua laugatahi, e pili ki te kakai ko Hotoma. 13Ko nā tino o Hotoma ni tino nae fai āmio mātagā, ma na agahala lahi ai kilātou i mua o te Aliki.

Kua Fano ia Apelamo ki Hepelona

14Kua fano kehe ia Lota oi na vāgana ai te Aliki kia Apelamo, “Mai te mea e iei ai koe, kikila lelei atu ō mata ki te itū ki mātū ma te itū ki haute, te itū ki hahae ma te itū ki hihifo; 15ma ko te fenua kātoa uma e kitea e koe, ka fōki atu e au ke fai mo koe ma nā lāpuna o koe ke pa ki te hēgata.#Gāl 7.5 16Ka fōki atu e au ni lāpuna mo koe e vē ko te pefu o te kelekele te tokalahi; ma kāfai e mafai e he tino oi faitau nā pefu o te kelekele, ka mafai foki ke faitau nā lāpuna o koe. 17Tū loa ki luga, fano oi havali i luga o te fenua kātoa, te loaloaga ma te lauefa, auā ka kō fōki atua uma lele kia te koe.” 18Oi na kave ai e Apelamo tona falekie, kua fano oi nofo tafapili ki nā aoa#13.18 aoa pe telepini he lākau lālā falala, ma i lalo o tona paolo nae fai ai nā tāpuakiga, ma nae takua ai foki he lākau tapu o Mamele i Hepelona; ma i kinā, na fau ai e ia he fata faitāulaga ki te Aliki.

Currently Selected:

Kenehe 13: TOKU

Highlight

Copy