Kenehe 12

Kua Kalaga te Atua kia Apelamo

1I tētahi aho, na vāgana atu ai te Aliki kia Apelamo, “Tuku tō nuku, ō kāiga, ma te kāiga o tō tamana, kae fano ki te fenua ka fakahino atu e au kia te koe.#Gāl 7.2-3; Epe 11.8 2Ka fōki atu e au ni lāpuna e tokalahi mo koe, ma ka kavea kilātou ma mālō tokalahi ma te tāua. Ka fakatamaokāiga koe e au, ma ko te takutakua o tō igoa ka fakaaogā ai e tagata ma fakamanuiaga. 3Ka fakamanuia e au kilātou e fakamanuia atu kia te koe,#Kal 3.8 kae ka fetuku e au kilātou e fetukua koe. Ma e ala ia te koe, ka fakamanuia ai e au ia mālō uma.”#12.3 ka fakamanuia… mālō uma pe Ko nuku uma ka lea mai ke fakamanuia kilātou e vē ko te fakamanuiaga o koe e au

4Oi na tukua ai e Apelamo ia Halana e vē ona fakatonu ai ia e te Aliki, ka kua 75 ai ona tauhaga; ma na fano ai foki ma Lota i tana kau. 5Na kave e Apelamo tana āvaga ko Halai, ma Lota te ataliki o tona uho, ma a lātou meatōtino uma nae fakaputu i Halana, fakatahi ai ma nā pologa, ma na kāmata ai te lātou malaga ki Kanana.

I te taunuku atuga o kilātou ki Kanana, 6na fakaauau ai te malaga a Apelamo kui atu i loto o te fenua ma na tau atu ai kilātou ki te lākau tapu#12.6 lākau tapu pe aoa o Molehe, i te koga paia i Hekeme. (I te taimi tēnā koi nonofo ai lava nā tino ha-Kananā i te fenua tēnei). 7Oi na fakakitea ai te Aliki kia Apelamo ma na lea vē atu ki ei, “Ko tēnei te fenua ka kō tuku atua ki nā lāpuna o koe.” Oi na fau ai e Apelamo he fata faitāulaga i kinā ki te Aliki, tēia na fakakitea ake kia te ia.#Gāl 7.5; Kal 3.16 8Mai kinā, na fano ai ia Apelamo āgai ki haute ki te fenua maugā i te itū ki hahae o te kakai ko Peteli, ma na fakatu ai tana api i te vā o Peteli i te itū ki hihifo, ma Ai i te itū ki hahae. Ma ko kinā na fau ai e ia he fata faitāulaga ma tāpuaki ai ki te Aliki. 9Oi na fakaholoholo ai lava te malaga atu o Apelamo mai tēia koga ki tēia koga āgai ki te itū ki haute o Kanana.

Ko Apelamo ma Halai i Aikupito

10Kae na tupu te oge i Kanana, ma ko te kino lahi o te oge na fano lele ai ia Apelamo ki haute ki Aikupito, ma na nofo ai i kinā mo he taimi. 11Kua tāli hopo atu ia Apelamo ki loto o te tuākoi o Aikupito, oi na lea vē atu ai ki tana āvaga ko Halai, “Kikila, ko koe he fafine kaulelei. 12E kitea nei koe e nā tino Aikupito, oi ka vēake ai nei ko koe he āvaga e āku, ma ka kilātou tāmatea ai au, kae tuku koe ke ola. 13Lea kō ki ei ko koe he tuafafine e ōku; ma e ona ko koe, ka hē tāmatea ai au e kilātou kae ka agalelei mai kia te au.”#Ken 20.2; 26.7 14I te taunuku atuga o Apelamo ki Aikupito, na kitea e nā tino Aikupito te kaulelei o Halai. 15Na kitea ia Halai e ni kaukauna a te tupu, oi na olo ai nā kaukauna kua fakavikiviki ia Halai ma tona kaulelei ki te tupu; ma na kave ai ia Halai ki te fale o te tupu. 16Ona ko Halai na agalelei ai te tupu kia Apelamo, ma fōki ana lafumāmoe, oti, pōvi, āhini, kāmela, vēnā ma ana pologa.

17Kae ona na kave e te tupu ia Halai te āvaga a Apelamo, na fakatupu ai e te Aliki ni fāmai kino lahi, ma na tauale ai te tupu ma nā tino uma nae nonofo i tona fale. 18Oi na fekau ai ia Apelamo e te tupu ma fehili vē atu ki ei, “Heā ta koe kua fai mai kia te au? Heā te hēki leamai ai koe, ko te fafine he āvaga e a koe? 19Heā te na leamai ai koe ko he tuafafine e o koe, kua kave ai e au ke fai ma aku āvaga? Tēia tau āvaga; kave ma olo kehe loa ma kinei!” 20Na fakatonu ai loa e te tupu ana kaukauna, ma na kave ai e kilātou ia Apelamo ma tana āvaga ma ana meatōtino uma, kua tuku ki fafo o te tuākoi o te lātou fenua.

Currently Selected:

Kenehe 12: TOKU

Highlight

Copy