Kenehe 11

Ko te Olo o Papelona#11.0 pe Papelu

1I te taimi muamua, nae fokotahi oioti lava te gagana nae tautatala ai ia tagata i te lalolagi kātoa. 2Ma i te kua tukua e kilātou o nā mea nae nonofo ai kae malaga āgai ki hahae, na tau atu kilātou ki he fenua laugatahi i Papelonia,#11.2 Epelu Hinala ma na nonofo ai i kinā. 3Ma na lea vē ai tētahi ki tētahi, “Ōmamai ke fai e kitātou ni piliki ma tao i te ogāumu ke mākeketū.” Oi na iei ai a lātou piliki ma te tā ke fakapipiki fakatahi ai. 4Oi na lea vē ai kilātou, “Ōmamai ke fakatū he kakai mo kitātou ma hona olo e pa ki te lagi te maualuga, kae ke lauiloa ma takutakua ai kitātou, ma ke nahe fakatakapea ai kitātou ki itū uma o te lalolagi.”

5Oi na fanaifo ai te Aliki ke kikila ki te kakai ma te olo na fau e tagata. 6Ma na vāgana vē ai te Aliki, “Kikila, ko nā tino uma iēnei ko he nuku lava e fokotahi ma e fokotahi te gagana e tautatala ai; ma e hē iloa pe ni iētahi mea ā ta kilātou ka fuafua e fai. Toeititi ake nei ka mafai e kilātou oi fai ho he mea lava e fofou kilātou ki ei! 7Ōmamai tātou olo ki lalo oi fakakehekehe te lātou gagana, kae ke hē mālamalama ai tētahi tino i tētahi tino.” 8Oi na fakatakape ai kilātou e te Aliki ki nā itū uma o te lalolagi, ma na tāofi ai foki te fauga o te kakai e kilātou. 9Ko te kakai na fakaigoa kia Papelona,#11.9 Epelu Papelu Ko te igoa tēnei e tāi vē ko te fakaleoga o te kupu Epelu mo te fakakehekehe auā ko kinā na fakakehekehe ai e te Aliki ia gagana a tagata, ma ko kinā na fakatakape ai e ia kilātou ki nā itū uma o te lalolagi.

Nā Lāpuna o Hemu

(1 NT 1.24-27)

10Ko nā lāpuna iēnei o Hemu. I te kua kātoa o te 100 tauhaga o Hemu, ma kua lua ai ia tauhaga talu te teka o te lolo, na fānau ai tona ataliki ko Alapahata; 11ma e 500 iētahi tauhaga nae ola ai lava ia Hemu, ma nae iei iētahi ona ataliki ma ona afafine.

12I te kua kātoa o te 35 tauhaga o Alapahata, na fānau ai tona ataliki ko Helaha; 13ma e 403 iētahi tauhaga nae ola ai lava ia Alapahata, ma nae iei iētahi ona ataliki ma ona afafine.

14I te kua kātoa o te 30 tauhaga o Helaha, na fānau ai tona ataliki ko Epele; 15ma e 403 iētahi tauhaga nae ola ai lava ia Helaha, ma nae iei iētahi ona ataliki ma ona afafine.

16I te kua kātoa o te 34 tauhaga o Epele, na fānau ai tona ataliki ko Peleke; 17ma e 430 iētahi tauhaga nae ola ai lava ia Epele, ma nae iei iētahi ona ataliki ma ona afafine.

18I te kua kātoa o te 30 tauhaga o Peleke, na fānau ai tona ataliki ko Leu; 19ma e 209 iētahi tauhaga nae ola ai lava ia Peleke, ma nae iei iētahi ona ataliki ma ona afafine.

20I te kua kātoa o te 32 tauhaga o Leu, na fānau ai tona ataliki ko Heluka; 21ma e 207 iētahi tauhaga nae ola ai lava ia Leu, ma nae iei iētahi ona ataliki ma ona afafine.

22I te kua kātoa o te 30 tauhaga o Heluka, na fānau ai tona ataliki ko Nahoa; 23ma e 200 iētahi tauhaga nae ola ai lava ia Heluka, ma nae iei iētahi ona ataliki ma ona afafine.

24I te kua kātoa o te 29 tauhaga o Nahoa, na fānau ai tona ataliki ko Telaha; 25ma e 119 iētahi tauhaga nae ola ai lava ia Nahoa, ma nae iei iētahi ona ataliki ma ona afafine.

26I te kua kātoa o te 70 tauhaga o Telaha, na fānau ai ona ataliki ko Apelamo, ko Nahoa ma Halana.

Nā Lāpuna o Telaha

27Ko nā lāpuna iēnei o Telaha te tamana o Apelamo, Nahoa, ma Halana. Ko Halana ko te tamana ia o Lota, 28ma na oti ka koi ola tona tamana ko Telaha i te fenua nā fānau ai i Uli, i Papelonia. 29Na nofo ia Apelamo kia Halai, kae nofo ia Nahoa kia Mileka te afafine o Halana ma ko te tamana foki ia o Ihika. 30Ko Halai nae hē manava ola.

31Na kave e Telaha tona ataliki ko Apelamo, tona makopuna ko Lota te ataliki o Halana, ma Halai te āvaga a tona ataliki ko Apelamo, ma na olo kehe fakatahi uma kilātou mai te kakai ko Uli i te fenua o nā tino Kaletaia, ma na olo ai āgai ki te fenua ko Kanana. Kae i te taunuku atuga o kilātou ki Halana, na nonofo mau ai loa i kinā. 32Ko kinā te na oti ai ia Telaha ka kua kātoa ai te 205 tauhaga o tona matua.

Currently Selected:

Kenehe 11: TOKU

Highlight

Copy