Kalatia 1
1
1Mai ia Paulo, he apohitolo e hēki tōfiagia e tagata pe e ala i he pule faka-te-tagata, kae na kalagagia e Iehu Keliho ma te Atua te Tamana, tē na ia fakatūagia ia Keliho mai te oti. 2E fakafeiloaki atu te kau uho Kelihiano uma i kinei fakatahi ma au, kia te koutou nā Ekalehia i Kalatia:
3Ke ia te koutou te alofa tūnoa ma te fīlēmū mai te Atua to tātou Tamana ma to tātou Aliki ko Iehu Keliho.
4Na fakatāunuku e Iehu Keliho te finagalo o to tātou Atua te Tamana, ma ofo atu tona ola mo a tātou agahala, kae ke maua ai e kitātou te haolotoga mai tēnei lalolagi kino. 5E o te Atua nā vīkiga ke pa lava ki te fakavavau! Amene.
E Fokotahi oioti te Tala Lelei
6Ko au e ofo ki te vave lele oi fulitua o koutou ki tē na kalagagia koutou e ala i te agalelei o Keliho,#1.6 te agalelei o Keliho ko iētahi tuhituhiga e leamai i tona agalelei ma talia hētahi talitonuga e lea nā tino ko he tala lelei. 7Ko te mea moni, e hēai hētahi Tala Lelei! Kae ko au kua lea vēnei atu ona e iei nā tino e fakalavelave atu kia te koutou ma taumafai ke liliu kehe koutou mai te Tala Lelei a Keliho. 8Kae e tuha pe ko kimātou, pe ko he āgelu mai te lagi e ia tālakia he tala lelei e kehe mai i te Tala Lelei na tālaki atu e kimātou kia te koutou, ke fakamālaia e te Atua te tino tēnā. 9Kua uma to mātou lea atu i te mea tēnei, kae ko au e toe lea atu i te taimi nei: kāfai e iei he tino e ia tālaki atua kia te koutou he “tala lelei” e kehe mai i te Tala Lelei kua uma te koutou taliagia, ke fakamālaia e te Atua te tino tēnā.
10Ko au e hē lea vēnei atu ona ko au e fofou ki te mea e fiafia ai ia tagata. Hēai! Ko te mea e fofou au ki ei, ko te mea e fiafia ki ei te Atua. Ko au e hē taumafai ke fiafia mai ia tagata kia te au. Kāfai ko tēnei te mea e fai e au, ko au la e hē ko he kaukauna e a Keliho.
Ko te Kaveaga o Paulo ma Apohitolo
11Te kau uho, e fia fakailoa atu e au kia te koutou, ko te Tala Lelei e tālaki e au, e hēki hau mai tagata. 12E hēki maua e au mai tagata, pe na akoako mai e ni tino kia te au. Na maua e au i te fakailoa maiga o Iehu Keliho kia te au.
13Kua fakalogo koutou ki te olaga nae ola ai au ka koi iei au i te tāpuakiga Iutaia, ki aku fakahāuāga nae fai ki te Ekalehia a te Atua, ma aku taumafaiga ke fakauma. #Gāl 8.3; 22.4-5; 26.9-11 14Nae hili atu toku mālamalama i te tāpuakiga Iutaia i lo te tokalahi o iētahi tino Iutaia o oku tupulaga, ma nae hili atu foki toku pipiki mau ki nā tu a o mātou tupuna.#Gāl 22.3
15Kae i te alofa tūnoa o te Atua na ia filifilia ai au ka ko hēki fānau mai au, ma kalagagia ke kaukauna atu kia te ia. Ma i te tonuga i te ia ke#Gāl 9.3-6; 22.6-10; 26.13-18 16fakailoa mai tona Ataliki kia te au, kae ke mafai ai e au oi tālaki te Tala Lelei a uiga kia te ia ki tagata nukukehe, e hēki hakili fehoahoani au ki he tino, 17pe na fano au ki Ieluhalema ki nā tino na muamua kavea ma apohitolo i lo au. Kae ko au na fano ki te koga e igoa ko Alapi, oi toe liliu ai ki Tamaheko. 18Ina kua kātoa lava te tolu tauhaga, oi fātoā fano ai au ki Ieluhalema oi āhiahi kia Petelu,#1.18 Petelu I te gagana Eleni e lea mai Kefa, he igoa Alamaika ko tona uiga papa. ma nofo ai lava au i kinā mo he lua vaiaho. #Gāl 9.26-30 19Kae e hēki fetaui au ma hētahi apohitolo vaganā ai ia Iakopo,#1.19 hētahi apohitolo vaganā ai ia Iakopo pe hētahi tino o te kau apohitolo; oioti lava tētahi tino na fetaui au ki ei ko Iakopo te taina o te Aliki.
20Ko te mea tēnei kua tuhi atu ai au, e moni lava. E iloa e te Atua ko au e hē tala pepelo.
21Mulimuli ake, oi fano ai au ki ni kogāfenua i Hulia ma Kilikia. 22I te taimi tēnā, ko hēki iloa au e nā tino o nā Ekalehia i Iutea. 23Na fakalogo oioti kilātou ki nā tino e lea vē, “Ko te tagata tēnei nae fakahāuā mai kia te kitātou, kae nei kua tālaki e ia te talitonuga faka-Kelihiano nae teteke lahi ia ki ei muamua.” 24Oi na viviki ake ai kilātou ki te Atua ona ko au.
Currently Selected:
Kalatia 1: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
