Kalatia 2
2
Ko Paulo ma Iētahi o te kau Apohitolo
1Kua teka te hefulu fa tauhaga, oi toe fano ai au ki Ieluhalema, kimāua ma Panapa, ma na kave ai e au ia Tito.#Gāl 11.30; 15.2 2Ko au na ala oi fano, ona na fakailoa mai lava e te Atua kia te au, ko au e tatau ke fano. I ha mātou māfutaga nā ko kimātou ma nā takitaki, na fakamālamalama ai e au kia te kilātou te Tala Lelei kua tālaki e au ki tagata nukukehe. E hē fofou au ko aku gāluega kua uma te fai ma nā gāluega i te lumanaki ke fakahēaogā. 3Ko toku hoa kia Tito, e ui ko he tino Eleni kae e hēki fakamālohiagia ke pelitome, 4e vē ona fofou ki ei ni tino. Ko nā tino iēnei na lea ko kilātou kua talitonu e vē ko kimātou, kae ni hipai na ōmamai kae ke kilātou iloa ai e uiga ki te haolotoga kua kimātou maua, e ala ia Keliho Iehu. Nae fofou ke fai kimātou ke vē ni pologa, 5kae e hēki kimātou tukua lele ki ei he avanoa, auā ko kimātou nae fofou ke tūmau pea lava te moni o te Tala Lelei mo koutou.
6Ko iētahi o kilātou nae lea ko kilātou ni takitaki—ko au e lea vēnei atu auā e hē tāua ia te au pe ko ai kilātou iēnei; ko te Atua e hē fakamahino i te kikila atu i fafo—ko kilātou iēnei e lea atu au, e hēki fakaopōpoa lele he lātou mea fōu e fokotahi ki te Tala Lelei e kō tālakia.#Teu 10.17 7Kae na kilātou iloa ko te tālakiga o te Tala Lelei ki tagata nukukehe, ko he mea na tuku mai e te Atua kia te au ke fai, e vē foki lava oi tuku atu e ia kia Petelu, te tālakiga o te Tala Lelei ki tagata Iutaia.#2.7 Ko kinei te kitea ai te hokotaga o nā tālakiga a Paulo ki tagata nukukehe e uiga ki te pelitome, ma nā tālakiga a Petelu ki tagata Iutaia 8Auā ko te mana o te Atua te na kavea ai au ma apohitolo mo tagata nukukehe, e vē foki lava ona kavea ia Petelu ma apohitolo mo tagata Iutaia. 9Ko Iakopo, ma Petelu#2.9 Petelu Ko nā tuhituhiga i te gagana Eleni e lea mai: Kefa ko te uiga i te gagana Alamaika papa. Kikila ki te 1.18 ma Ioane, e vē ko kilātou lava iēnei ko nā takitaki, na iloa e kilātou ko te gāluega fakapitoa tēnei na fōki mai e te Atua kia te au; ma na fakamautū ta mātou māliliega ke gālulue fakatahi, i te fakatālofa o kimāua ma Panapa ki ei. Na mālilie fakatahi kimātou ko kimāua ma Panapa ke gālulue mo tagata nukukehe, kae gālulue kilātou mo tagata Iutaia. 10Oioti lava te mea na lea mai ai, ke manatua ake pea nā tino mātitiva i te lātou vāega, ma ko te mea foki lava tēnei nae fofou au ke kō faia.
Kua Fakahako e Paulo ia Petelu i Anitioka
11Kae i te fanaifoga o Petelu ki Anitioka, na lea lava au ki ona mata ko ia e hehē. 12Ka ko hēki taunuku mai ki kinei nā tamāloa na uga mai e Iakopo, ko Petelu nae kakai fakatahi lava ma nā tino nukukehe. Kae talu lava te taunuku mai o nā tamāloa, e hēki toe kakai fakatahi ia Petelu ma nā tino nukukehe, auā nae mataku i nā tino nae fofou ke pelitome nā tino nukukehe kua talitonu. 13Ma ko iētahi uho Kelihiano Iutaia, kua kāmata foki oi hui o lātou uiga e vē ko Petelu, ma ke pa foki lava kia Panapa, na mulimuli foki ki nā uiga fakagutugutulua iēnei. 14I te kō kiteaga ko te vāega tēnei e hē hāvavali i te auala hako e tuha ai ma te kupu moni e uiga ki te Tala Lelei, oi lea vēnei ai au kia Petelu i mua o kilātou uma, “Ko koe he tino Iutaia, kae ko koe nae ola lava e vē he tino nukukehe, kae hē vē he tino Iutaia. E vēhea la ona taumafai koe ke fakamālohi ki nā tino nukukehe ke ola e vē ni tino Iutaia?”
Ko Tagata Iutaia ma Tagata Nukukehe e Fakaola e ala i te Talitonu kia Keliho
15Ko kitātou na fānanau mai ni Iutaia, kae hē ni “tagata nukukehe agahala.”#2.15 “tagata nukukehe agahala” Nae iei i te manatu o tagata Iutaia, ho he tino mai hētahi atunuku, ko he tino agahala 16Kae e iloa e kitātou, oioti lava te auala e mafai ai he tino ke fakalelei tona vā ma te Atua, ko te fakatuatua kia Iehu Keliho, ka e hē ko te faia o nā mea e leamai ai te Tūlāfono na kui mai ia Mohe. Ko kitātou foki la kua talitonu kia Keliho Iehu, kae ke fakalelei ai to tātou vā ma te Atua e ala i to tātou fakatuatua kia Keliho, kae hē ona e fai e kitātou nā mea e leamai ai te Tūlāfono. Auā e hēai he tino e mafai ke fakaleleia tona vā ma te Atua e ala i te mulimuli ki nā mea e leamai ai te Tūlāfono.#Hal 143.2; Lom 3.20, 22 17Kāfai la kitātou tagata Iutaia e taumafai ke fakalelei to tātou vā ma te Atua i te tātou hokotaga ma Keliho, kae e iku ifo ko kitātou ni tino agahala e vē foki lava ko tagata nukukehe—ko tona uiga nei la ko kitātou e fakamālohia e Keliho ke fai te agahala? Hēai! 18Kāfai e toe kāmata oi ati ake e au te vāega o te Tūlāfono na kō talepea ki lalo, ko tona uiga kua fakamāonia e au ko au ko he tino holi tūlāfono. 19Kae e tuha ai ma te Tūlāfono, ko au ko he tino kua oti—na tāmate lava e te Tūlāfono—kae ke mafai ai au ke ola mo te Atua. Ko au na tāmate fakatahi ma Keliho i luga o te hātaulo, 20kae ke nahe ko au te ola, kae ko Keliho e ola i loto ia te au. I te olaga tēnei e ola ai au i te faka-te-tino, ko au e ola ona ko toku fakatuatua ki te Ataliki o te Atua, tē e alofa mai kia te au ma na fōki tona ola kae ke ola ai au. 21E hē tetekea e au te alofa tūnoa o te Atua. Kae kāfai he tino e fakaleleia tona vā ma te Atua e ala i te Tūlāfono, ko tona uiga e hēai he uiga na mate ai ia Keliho.
Currently Selected:
Kalatia 2: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
