Ehoto 9
9
Nā Lafumanu kua Mamate
1Oi na vāgana ai te Aliki kia Mohe, “Fano ki te tupu ko Falao ma lea ki ei ko te Aliki te Atua o nā tino Epelu e lea mai, ‘Tuku oku tagata ke olo kae ke mafai ke tāpuaki mai kilātou kia te au. 2Kāfai e hē kē tukua kilātou ke olo, 3ka kō fakatupua he fāmai pēhi fakamātakutaku ki au lafumanu i luga o te fenua—au holofanua, āhini, kāmela, pōvi, māmoe, ma au oti. 4Ma ka kō faia he mea ke kitea ai te kehekehega o nā manu tauhi a nā tino Ihalaelu ma nā manu tauhi a nā tino Aikupito, ma e hēai he manu a he tino Ihalaelu e mate. 5Ko au, te Aliki, kua fakailoga e au te aho tāeao, ke fakatino ai e au nā mea iēnei.’ ”
6I te aho na hohoko ai, na fai ai e te Aliki e vē ko tana vāgana, ma na mamate uma ai nā manu a nā tino Aikupito, kae e hēai he manu e fokotahi a he tino Ihalaelu na mate. 7Na fehili ia Falao pe heā te kua tupu, ma na fakailoa kia te ia, e hēai he manu e fokotahi o nā manu a nā tino Ihalaelu na mate. Kae na tūmau lava te makaka o te loto o Falao ma hē ia tukua nā tino Ihalaelu ke olo.
Nā Fakafoa
8Oi na vāgana ai te Aliki kia Mohe ma Alona, “Olo ma kave ni lulukugā lefulefu mai loto o he ogāumu, ma fōki kia Mohe ke togi e ia ki luga i te ea, i mua o Falao. 9Ka takape ma halalau te lefulefu e vē ko te pefu ki luga o te fenua kātoa o Aikupito, ma ka tutupu ai nā fakafoa papala ki tagata vēnā ma nā manu tauhi uma.” 10#Fkl 16.2Oi na olo ai ia Mohe ma Alona ki mua o Falao ma kave nā lefulefu; na togi e Mohe nā lefulefu ki luga i te ea, ma na tutupu ai nā fakafoa papala ki tagata Aikupito ma a lātou manu. 11Ma na hēki mafai nā taulāitu ke iei fakatahi ma Mohe, ona kua hokohoko o lātou tino i te fakafoa, vēnā foki ia tagata uma o Aikupito. 12Kae na fakamakaka pea lava e te Aliki te loto o Falao, ma e vē lava ko te vāgana a te Aliki kia Mohe, na hēki fia fakalogo ia Falao kia Mohe ma Alona.
Te Ua Aiha
13Oi na toe vāgana ai te Aliki kia Mohe, “Ala vave ki luga tāeao, ma fano kia Falao ma lea vē ki ei, ‘Ko te Aliki, te Atua o nā tino Epelu e lea mai: Tuku oku tagata Ihalaelu ke olo, kae ke mafai ke tāpuaki mai kilātou kia te au. 14I te taimi tēnei, ka kō fakatupua nā mala uma, ma e hē gata ka puapuagā ai nā kaukauna a koe ma tagata Aikupito, kae ka vēnā foki ma koe, kae ke iloa ai e koe e hēai lele hētahi e vē ko au, i te lalolagi kātoa. 15Kana he mea na pakū toku lima ki luga o koe ma ō tagata ma fakapēhia koutou i nā tauale, e vēnei ake kua tafi kehe koutou mai te lalolagi kātoa. 16#Lom 9.17Kae ke mafai ke fakaali atu kia te koe toku mālohi, kua kō tukua ai koe ke ola, kae ke halalau ai toku takutakua ki te lalolagi kātoa. 17Kae koi fai lava tō fakamaualuga, ma hē tukua e koe oku tagata Ihalaelu ke olo. 18Kikila, i te taimi vēnei tāeao, ka kō faia ke tō ifo ni ua aiha mamafa lele, ni ua aiha mamafa ko hēki kitea lele i Aikupito i tona tala tuku fakaholo. 19I te taimi nei la, fakatonu loa ke kave nā lafumanu ma iētahi manu fafaga e i fafo i te lau fenua, ki ni mea e malu ai. Auā ka tō te ua aiha ki luga o tagata vēnā ma nā manu koi fafo ma hē i ni mea e malu ai, ma ka mamate uma ai kilātou.’ ” 20Ko iētahi o kaukauna a Falao na mātataku lele i te fakalogoga o kilātou ki te vāgana a te Aliki, ma na olo ai kua kaumai nā pologa ma nā manu a kilātou nae i fafo ki loto, ke fakamamalu. 21Kae ko iētahi kaukauna, nae hē fia fakalogo ki te vāgana a te Aliki, ma na tuku vē lava a lātou pologa ma a lātou manu i fafo i te lau fenua.
22Oi na vāgana ai te Aliki kia Mohe, “Hiki te lima o koe āgai ki te lagi i luga, kae ke tō ifo te ua aiha ki te fenua uma o Aikupito—ki luga o tagata, nā manu, ma nā lākau uma o te fenua.” 23Oi na hiki ake ai e Mohe tona tokotoko āgai ki te lagi, ma na fakatupu ai e te Aliki nā tāgulu ma te ua aiha, ma nā uila e tū ki te kelekele kāfai e napa. Kua fakatō ifo e te Aliki te ua aiha ki luga o te fenua kātoa o Aikupito; 24#Fkl 8.7; 16.21kua tō ifo he afā ua aiha mamafa ma kānapanapa holo nā uila. Ko te afā ua aiha ia kua hili atu te kino, na kua pakū ki luga o te fenua kātoa ko Aikupito, talu te kavea ko he mālō. 25I Aikupito kātoa, na fakakino e te ua aiha nā mea uma nae i fafo i te lau fenua, e aofia ai ia tagata, ma nā manu uma lele. Na vēnā foki oi fakakino nā lākautotō ma tagau uma ki lalo ia lākau uma i te fenua. 26Oioti lava te koga o Aikupito na hēki tō ai te ua aiha, ko Kohene, te mea nae nonofo ai ia tagata Ihalaelu.
27Oi na fekau ai e Falao ia Mohe ma Alona ma lea vē atu kia te kilāua, “I te taimi nei, ko au kua agahala; e hako lava te Aliki, kae e hehē au fakatahi ma oku tagata. 28Tatalo kō ki te Aliki! Kua hē nafatia e kimātou te gāpāpā lahi o nā tāgulu a te Atua ma te mamafa o nā ua aiha. Ko koutou ka tuku atu e au ke olo, nahe koutou toe fakatali.”
29Na tali atu ia Mohe ki te tupu, “E teka kehe atu loa au ma te kakai, oi ka hiki ake ai oku lima ki luga ma tatalo ki te Aliki. Ka hē toe gāpāpā ni tāgulu, ma hē toe tō ni ua aiha, kae ke iloa ai e koe ko te lalolagi e o te Aliki. 30Kae e iloa e au ko koe ma au kaukauna, ko hēki lagona lava e koutou he mataku i te Aliki te Atua.” 31(Ko nā peheti#9.31 peheti he lākau e ola i tafa o nā vaitafe, ko ona lau e gaohi ai nā kie, vēnā ma nā kafa ma nā maea ma nā kālite na fakakino, ona ko nā kālite kua mātutua ma kua tatau ke helehele, ka ko nā peheti kua fātoā fufuga. 32Kae ko nā itūkāiga haito e lua e hēki fakakinoa, ona ko te fuata koi moto.)
33Na tuku loa lava e Mohe ia Falao kae fano ki fafo o te kakai, ma hiki ake ona lima ki te Aliki i he tatalo; ma na māona atu ai lava nā tāgulu ma te ua aiha ma kua hē toe tō nā ūaga ki luga o te fenua. 34I te kiteaga e Falao o te mea kua tupu, oi na toe agahala ai foki. Kua makaka foki te loto o ia vēnā ma ana kaukauna, e vē lava ko te mea nae iei ai muamua, 35ma e vē lava ko te vāgana a te Aliki kia Mohe, na hēki tukua e Falao ia tagata Ihalaelu ke olo.
Currently Selected:
Ehoto 9: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
