Ehoto 10
10
Nā Hē-Akelihe
1Oi na vāgana ai te Aliki kia Mohe, “Fano oi kikila te tupu ko Falao, auā kua fakamakaka e au te loto o ia vēnā ma nā loto o ana kaukauna, kae ke mafai ai ke fakatino e au nā vāvega iēnei i te mea e iei ai kilātou, 2ma ke mafai ai foki ke taku atu e koe ki au fānau ma a lātou fānau, aku faiga nae fai ki tagata Aikupito, na vē ai kilātou ni tino vālelea i te fakatinoga e au o nā vāvega i mua o kilātou, kae ke iloa ai e koutou uma ko au ko te Aliki.”
3Oi na olo ai ia Mohe ma Alona kia Falao ma lea vē atu ki ei, “Ko te Aliki, te Atua o nā tino Epelu, e lea mai, ‘Heā te mataloa ka hē fakamāulalo mai ai koe kia te au? Tuku oku tagata Ihalaelu ke olo, kae ke mafai oi tāpuaki mai kilātou kia te au. 4Auā kāfai ka muhu lava koe oi tuku oku tagata ke olo, ka kō kaumaia la tāeao nā hē-akelihe ki loto o tō fenua. 5Ka tatao kātoa e kilātou te fenua ma hē koutou kitea te kelekele. Ka kai uma lele e kilātou nā mea e hēki fakakinoa e te ua aiha, e pa ki nā lākau uma i te fenua. 6Ko nā fale o koe, nā fale o au kaukauna, ma nā fale o tagata o koe, ka tumu i te hē-akelihe. Ka hili lele atu te matakutia o te mea ka pa ki ei, i lo ho he mea vēnei na kua kitea e outou tupuna, mai te kāmataga ke pa mai nei.’ ” Oi na liliu loa lava ia Mohe kua fano kehe mai ia Falao.
7I te lagonaga o te mea tēnei e nā kaukauna, oi na lea vē atu ai kia Falao, “Heā te mataloa ka fakataga ai pea te tino tēnei ke fai ma māilei kia te kitātou? Tuku nā tāulelea Ihalaelu ke olo, kae ke mafai ke olo oi tāpuaki ki te Aliki to lātou Atua. E hē kē iloa ko Aikupito kua matuā fakatāugā lava?”
8Oi na toe kaumai ai ia Mohe ma Alona ki mua o Falao, ma na lea vē atu ai ia kia te kilāua, “E mafai koutou ke olo oi tāpuaki ki te Aliki te Atua o koutou. Kae ko ai tonu lava nā tino ka olo?”
9Na tali atu ia Mohe, “Ko kimātou ka olo uma lele, ko a mātou fānau, ma o mātou tagata mātutua. Ka kave o mātou ataliki ma o mātou afafine, a mātou lafumāmoe, lafuoti, ma lafupōvi, auā e tatau ke fai he mātou kaiga ma ohi atu he tāulaga ki te Aliki.”
10Kua lea atu ia Falao, “E tautō atu au i te igoa o te Aliki, ka hē kō tukua lele ia fafine ma tamaiti o koutou, ke olo ma koutou. E manino lele e iei nā fuafuaga kino e taupulepule koutou ki ei. 11Heai! E olo oioti nā ko tāulelea ke tāpuaki ki te Aliki, auā ko te mea ia e fofou koutou ki ei.” Ma na tuli kehe ai loa kilāua mai mua o Falao.
12Oi na vāgana ai te Aliki kia Mohe, “Hiki tō lima ki luga ma fālō atu ki luga o te fenua ko Aikupito ke ōmamai ai nā hē-akelihe. Ka ōmamai oi kai nā mea uma lele e ola i luga o te fenua, na hao mai i te ua aiha.” 13Oi na hiki ake ai e Mohe tona tokotoko ki luga, ma fālōlō atu ki luga o te fenua ko Aikupito, ma na fakatupu ai e te Aliki he matagi ke agi mai i te itū ki hahae ki luga o te fenua, i te aho kātoa tēnā ma te pō kātoa na hohoko ai. E malama ake te tāeao, kua kaumai e te matagi mai hahae, nā hē-akelihe. 14#Fkl 9.2-3Ko te hē-akelihe kua hau fakalaulau matagi i te mātolu, ma kua nofo i luga o te fenua kātoa ko Aikupito. Na fātoā kitea ai he mātolu lahi vēnei o te hē-akelihe i luga o Aikupito talu mai, ma ka hē toe iei lele foki he mea vēnei e toe tupu. 15Na tatao kātoa te fenua e nā hē-akelihe, ma na lanu uliuli uma ai; kua kai e kilātou nā mea uma na totoe mai i te ua aiha, e aofia ai nā fua o lākau kaina uma. Na matuā hēai lava he mea lanu meamata na kitea i he lākau lahi pe i he tamā lākau totō, i luga o Aikupito.
16Oi na fekau fakavave ai e Falao ia Mohe ma Alona, ma lea vē atu ki ei, “Kua iloa e au toku hehē ki te Aliki te Atua o koutou, ma vēnā kia te koutou. 17Ko te mea ia, fakamāgalo mai kō toku hehē i te taimi fokotahi lava tēnei, ma tatalo ki te Aliki te Atua o koutou, ke kave kehe e ia tēnei fakahalaga e iku ai ki te oti, mai ia te au.” 18Oi na fano kehe ia Mohe mai ia Falao, ma tatalo atu ki te Aliki. 19Ma na hui ai e te Aliki te matagi mai hahae ki he matagi mālohi mai te itū ki hihifo, ma na pūhia kehe ai nā hē-akelihe ki te Tai Kukula.#10.19 Pe Tai o te Mutia Vai E hēai he hē-akelihe e fokotahi na totoe i luga o Aikupito kātoa. 20Kae na fakamakaka e te Aliki te loto o Falao, ma na hēki ia tukua ai nā tino Ihalaelu ke olo.
Te Kaupōuli
21Oi na vāgana ai te Aliki kia Mohe, “Hiki te lima o koe āgai ki te lagi i luga, kae ke tatao ai te fenua ko Aikupito i he pōgihā.” 22#Hal 105.28; Fkl 16.10Oi na hiki ai te lima o Mohe āgai ki te lagi, ma na pōuli hau kātoa ai ia Aikupito i ni aho e tolu. 23Ko nā tino Aikupito, kua hē mafai ke kitea e tētahi tino tētahi tino, ma hēai he tino na mafai ke fano ki he mea i te taimi kātoa tēnei. Kae ko nā tino Ihalaelu, nae iei pea lava te mālama i te mea nae nonofo ai.
24Oi na fekau ai e Falao ia Mohe ma lea vē atu ki ei, “E mafai koutou ke olo oi tāpuaki ki te Aliki; olo ma kave autou fafine ma tamaiti; kae ko nā lafumāmoe, nā lafuoti, ma nā lafupōvi a koutou, e tuku e hē kavea.”
25Na tali atu ia Mohe, “E tatau fōki ke fakataga mai e koe ke kave ni a mātou manu, ke ofo atu ai a mātou tāulaga vēnā ma a mātou tāulaga mū ki te Aliki to mātou Atua. 26Heai, ko kimātou ka olo ma kave a mātou lafumanu; e hēai lele he manu e tukua. E filifili lava e kimātou nā manu e ofo atu ai a mātou tāulaga ki te Aliki to mātou Atua. Ma heiloga kua pa kimātou ki ei, oi fātoā iloa ai pe ni manu vēhea te ofo atu ma tāulaga.”
27Kae na fakamakaka e te Aliki te loto o te tupu, ma na hēki ia tukua ai nā tino Ihalaelu ke olo.
28Kua lea atu Falao kia Mohe, “Fano kehe loa nei ma toku fale. Ia au lele nā toe kikila kia te koe. Ko te aho lava e toe kō kitea ai koe, e mate ai koe!” 29Na tali atu ia Mohe, “E vē lava ko tau leamai, ka hē toe kikila lele koe kia te au.”
Currently Selected:
Ehoto 10: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
