Ehoto 38
38
Te Fauga o te Fata Faitāulaga mo nā Tāulaga Mū
(Eho 27.1-8)
1Mo nā tāulaga mū, na fau e ia he fata faitāulaga i te lākau ko te hitahi. Nae fakatāfafā, ma 2.2 mita te loa, 2.2 mita te lauefa, ma 1.3 mita te maualuga. 2Na fai e ia nā nifohua ki luga o nā tulimanu e fa, ma na kavea ai ko he vāega e tahi ma te fata faitāulaga. Ma na tatao kātoa e ia i te apamemea. 3Na fai foki e ia nā kope uma mo te fata faitāulaga: nā pakete, nā huō, nā pēhini, nā tui ma nā apa kave malala ola. Ko nā kope uma iēnei na fai i te apamemea. 4Na fai e ia he mea vālavala i te apamemea ma fakamau ki lalo o te pito o te fata faitāulaga kae ke pa ake ai ki luga ki te āfa o te fata faitāulaga. 5Na fai foki e ia ni mama apamemea e fa ke hiki ai ma fakamau ki nā tulimanu e fa. 6Na fai e ia nā amo i te lākau ko te hitahi ke hiki ai, ma tatao i te apamemea, 7ma tui ki loto o nā mama i nā pito o te fata faitāulaga. Ko te fata faitāulaga na fau i ni laupapa ma na fakagāogao ia loto.
Te Faiga o te Tānoa Apamemea
(Eho 39.18)
8Na fai ai e ia te tānoa apamemea ma tona tūlaga apamemea mai nā fakaata a nā fafine nae tautua i te faitotoka o te Falekie o te Aliki.#Eho 30.18
Te Lōtoā o te Falekie Tapu
(Eho 27.9-19)
9Mo te Falekie Tapu, na ia faia te lōtoā i nā kiepupuni na fai i te lino lelei. I te itū ki haute, ko te loloa o nā kiepupuni nae 44 mita, 10nae tāofi ki luga e nā pou apamemea e lua hefulu nae fakatutū i o lātou tūlaga apamemea e lua hefulu, ma nā fakakāfilo ma nā kaho e fai i te hiliva. 11Na vēnā foki lava te mea na fai ki te lōtoā i te itū ki mātū. 12I te itū ki hihifo, nae iei nā kiepupuni e 22 mita te loloa, ma nā pou e hefulu ma o lātou tūlaga, ma nā fakakāfilo ma nā kaho e fai i te hiliva. 13I te itū ki hahae, te itū nae iei ai te faitotoka, ko te lōtoā nae 22 mita foki te lauefa. 14-15I nā itū takitahi o te faitotoka, nae iei ai ni kiepupuni e 6.6 mita te loloa, ma ni pou e tolu ma ni tūlaga e tolu. 16Ko nā kiepupuni uma nae hiko ai te lōtoā na fai i te lino lelei. 17Ko nā tūlaga mo nā pou na fai i te apamemea, ma ko nā fakakāfilo, nā kaho, ma nā mea nae tatao ai nā ulupou na fai i te hiliva. Ko nā pou uma e fakatāmilo i te lōtoā, nae hokohoko i nā kaho hiliva. 18Ko te kiepupuni mo te faitotoka o te lōtoā, na fai i te lino lelei na lalaga fakatahi ma te vulu lanu moana, lanu violē, ma te lanu kukula, ma na teuteu i ni ata e hui ki luga. Nae iva mita te loa ma lua mita te maualuga, e vē ko nā kiepupuni o te lōtoā. 19Nae tāofi ki luga e nā pou kua fakatutū ki o lātou tūlaga apamemea. Ko o lātou fakakāfilo, nā mea e tatao ai nā ulupou, ma o lātou kaho na fai i te hiliva. 20Ko nā pine mo te Falekie ma mo te lotoā e fakatāmilo ai, na fai i te apamemea.
Nā Mea na Fau ai te Falekie Tapu
21Ko te fakamaumauga tēnei o nā mea tau ukamea na fakaaogā ki te fauga o te Falekie Tapu, tēia nae teu i loto nā fatupapa māfolafola e lua na tuhi ki luga nā Tūlāfono e Hefulu. Ko te lihi na fai i te fakatonuga a Mohe, ma na tuhi e nā tino o te puikāiga o ha-Levī nae gālulue i lalo o te takitakiga a Itamala, te ataliki o Alona te ohitāulaga.
22Ko nā mea uma lele na fakatonu e te Aliki kia Mohe ke fai, na fai e Pehaleli te ataliki o Uli ma ko he makopuna e o Hulo, o te puikāiga o Iuta. 23Ko tona hoa nae fehoahoani kia te ia, ia Oholiapo, te ataliki o Ahihamaka mai te puikāiga o Tanu, ko he tufuga, he tuhiata, he tino hui mea teuteu i te vulu lanu moana, violē ma te kukula, ma i te kie lino e hili te lelei.
24Ko te aofaki o te aulo na maua mai nā meālofa fakapitoa ma nā fakaaogā mo te faiga o te nofoaga paia, e 2,193 pauna#38.24 Epelu 29 tāleni ma te 730 hēkeli te mamafa, e tuha ai ma te fua māhani o te nofoaga paia. 25#Eho 30.11-16Ko te hiliva na maua mai i te tuhigā igoa o nā tino o Ihalaelu, e 3.43 tone te mamafa e tuha ai ma te fua māhani o te nofoaga paia. 26#Mat 17.24Ko te aofaki tēnei na tutuha ma te aofaki na totogi e nā tino na fakamau o lātou igoa i te tuhigā igoa, na totogi ai e te tino te aofaki na tatau ke ia totogia, e tuha ai ma te fua māhani o te nofoaga paia. Ko nā tino na fakamau nā igoa mo te tuhigā igoa e toka 603,550 mai te lua hefulu tauhaga āgai ki luga te mātutua. 27O te hiliva na maua, e 3.4 tone#38.27 Epelu 100 tāleni na fakaaogā ke fai ai nā tūlaga mo nā pou e 100 o te nofoaga paia ma nā kiepupuni, e 34 kilokalama mo te tūlaga e fokotahi. 28Ko te 30 kilokalama hiliva na totoe, na fai ai e Pehaleli nā kaho, nā fakakāfilo mo nā pou, ma nā tatao teuteu hiliva mo nā ulupou. 29Ko te apamemea na fakatō mo te Aliki na maua te 2.425 tone te mamafa. 30Ko te apamemea tēnā na fai ai e Pehaleli nā tūlaga mo nā pou mo te faitotoka ki loto o te Falekie Tapu, te fata faitāulaga apamemea ma te mea vālavala apamemea, ma nā kope uma o te fata faitāulaga, 31nā tūlaga mo nā pou e fakatāmilo i te lōtoā, ma mo te faitotoka ki loto o te lōtoā, ma nā pine uma mo te Falekie ma te lōtoā e hiko fakatakamilo ai.
Currently Selected:
Ehoto 38: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
