Ehoto 39
39
Te Faiga o nā Lākei mo nā Ohitāulaga
(Eho 28.1-14)
1Na fai e kilātou nā lākei mānanaia i nā vulu lanu moana, lanu violē, ma te kukula ke kokofu ai nā ohitāulaga kāfai e tautua i loto o te Nofoaga Paia. Na kilātou faia nā kofu ohitāulaga mo Alona, e vē ona poloaki ai te Aliki kia Mohe.
2Na fai e kilātou te efota i nā vulu lanu aulo, lanu moana, violē, ma te kukula, ma i te kie lino e hili te lelei. 3Na tuki e kilātou te aulo ke mānifinifi, ma tipi fakamanifi ai ke mafai ke lalaga ki loto o te kie lino e hili te lelei, ma ki loto o nā vulu lanu moana, violē ma kukula. 4Na fai e kilātou nā paave e lua mo te efota ma fakapipiki ki ona itū, ke mau lelei ai. 5Ko te fuhipaku na lalaga fakalelei i nā mea foki lava iēnei, na fakapipiki ki te efota ke kavea ai ko he mea e fokotahi, e vē ona fakatonu ai e te Aliki ia Mohe. 6Na hāuni e kilātou nā fatu hatonike ma fakamau ki luga o he tūlaga aulo; na vane e kilātou ki luga nā igoa o nā ataliki e toka hefulu lua o Iakopo. 7Na fakamau e kilātou nā fatu mānanaia iēnei ki nā paave o te efota, ke hui ai nā puikāiga e hefulu lua o Ihalaelu, e vē lava ko te fakatonuga a te Aliki kia Mohe.
Te Faiga o te Punifatafata
(Eho 28.1-30)
8Na fai e kilātou te punifatafata i nā mea foki lava na fai ai te efota, ma na vēnā foki oi hui ni teuteu ki luga. 9Na fakatāfafā ma gagau tualua, e 22 henitimita te loa ma 22 henitimita te lauefa. 10Na fakapipiki e kilātou ki luga nā atu fatu tāua e fa. I te atu muamua na fakapipiki e kilātou ki ei he lupi, he topahi, ma he kalaneti; 11i te atu e lua, he himalato, he hafilo ma he taimani; 12i te atu e tolu, he huakito, he aketoni ma he ametuto; 13ma i te atu e fa, he pelulo, he hationu ma he iahepi. Ko nā fatu tāua iēnei na fakapipiki ki luga o nā tūlaga aulo. 14Ko nā fatu tāua takitahi iēnei e hefulu lua, na vane ki luga te igoa o he ataliki e fokotahi o Iakopo, ke fai ma hui o nā puikāiga e hefulu lua o Ihalaelu. 15Mo te punifatafata, na fai e kilātou ni filifili i te aulo mamā, e fifili e vē ni maea. 16Na fai e kilātou ni tūlaga aulo e lua ma ni mama aulo e lua, ma fakapipiki nā mama aulo e lua ki nā tulimanu e lua e pito ki luga o te punifatafata. 17Na nonoa e kilātou nā filifili aulo e lua ki nā mama aulo e lua, 18ma na nonoa iētahi pito e lua o nā filifili ki nā tūlaga e lua, ma i te faiga tēnei, na fakamau ai ki mua ki nā paave o te efota. 19Oi na fai ai e kilātou nā mama aulo e lua ma fakapipiki ki nā tulimanu i te itū ki lalo o te punifatafata, i te pito ki loto e hohoko ki te efota. 20Na fai e kilātou ni iētahi mama aulo e lua ma fakamau ki te itū ki lalo, i mua o nā paave o te efota i tafa o te hokoga, ma i luga ake o te fuhipaku kie na lalaga fakalelei lele. 21E vē lava ko te fakatonuga a te Aliki kia Mohe, na nonoa e kilātou nā mama o te punifatafata ki nā mama o te efota i he līpine lanu moana, kae ke tātia tonu ai te punifatafata i luga ake o te fuhipaku kie, ma ke nahe matala lele ai.
Ko Iētahi Lākei Ohitāulaga
(Eho 28.31-43)
22Ko te kofuloloa e kofu pito ki loto o te efota na fai kātoa i te vulu lanu moana, 23ma ko te pū mo te ua, na afe nā kautafa fakatāmilo ke fakamākeke ai kae ke nahe gahae. 24-26I te pito ki lalo o te fele o te kofuloloa, na hui e kilātou ki ei nā līmoni na fai i te lino lelei ma i nā vulu lanu moana, violē ma kukula, ma fakapipiki fakavāvā ki ei nā logo na fai i te aulo mamā, e vē lava ona fakatonu ai e te Aliki ia Mohe.
27Na fai foki e kilātou nā kofutino mo Alona ma ona ataliki, 28vēnā ma te faufautū na fai i te kie lino lelei, nā pūlou kie, nā kofuloto lino, 29ma te fuhipaku kie e fai i te lino lelei, ma i nā vulu lanu moana, violē, ma kukula ma hui ki ei nā teuteu e vē lava ko te fakatonuga a te Aliki kia Mohe. 30Na fai e kilātou te pine aulo o te palealiki paia ma vane ki luga nā kupu e vē, “Kua Fakatō mo te Aliki.”#Eho 28.36-37 31Na nonoa e kilātou he līpine lanu moana ki te pine ke tamau ai ki te faufautū, e vē ko te fakatonuga a te Aliki kia Mohe.
Kua Uma te Gāluega
(Eho 35.10-19)
32Kua uma nā gāluega mo te Falekie Tapu, te Falekie o te Aliki. Na fai e nā tino Ihalaelu nā mea uma lele e vē lava ona fakatonu e te Aliki kia Mohe. 33Oi na kaumai ai e kilātou kia Mohe te Falekie ma ona kope uma lele, ona fakakāfilo, ona āuivi, ona lākau fālava, ona pou, ma ona tūlaga; 34ko nā kietatao e fai i te paku māmoe poa kua fakatogo kukula; ko te kietatao e pito ki fafo e fai i te pakumanu e hili te lelei; ko te kiepupuni ke pupuni ai; 35ko te Puha o te Feagaiga e i loto ai nā fatupapa māfolafola, ko ona amo ma te tāpuni;#39.35 tāpuni pe nofoa o te alofa fakahao 36ko te laulau ma ona kope uma, ma te falaoa e ofo atu ki te Atua; #Eho 25.30; 40.22-23; Lev 24.5-9 37ko te tūgālāmepa mamā ma ona mōlī, ona kope uma lele, ma nā lolo mo nā mōlī; 38ko te fata faitāulaga aulo e fakamū ai nā meamanogi; ko te lolo e fakauku ai; ko nā mea fakamanogi, ma te kiepupuni mo te faitotoka o te Falekie; 39ko te fata faitāulaga apamemea ma te mea vālavala apamemea, ko ona amo ma ona kope uma lele; ko te pēhini e fulufulu ai ma tona tūlaga; 40ko nā kiepupuni mo te lotoā, ona pou ma o lātou tūlaga; nā kiepupuni mo te auala ki loto o te lōtoā, ona maea; ona pine e tamau ai te Falekie ki te kelekele; 41ma nā lākei mānanaia mo nā ohitāulaga e tatau ke kokofu ai kāfai e tautua i loto o te Nofoaga Paia—nā lākei paia mo Alona te ohitāulaga ma ona ataliki. 42Na fai e nā tino Ihalaelu nā gāluega uma lele, e vē lava ko te fakatonuga a te Aliki kia Mohe. 43Kua kitea e Mohe kua uma te fai e kilātou o te gāluega e vē lava ona fakatonu e te Aliki, oi na fakamanuia ai e ia kilātou.
Currently Selected:
Ehoto 39: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
