Ehoto 34
34
Kua Fai e Mohe ni Iētahi Fatupapa Māfolafola
(Teu 10.1-5)
1Oi na vāgana mai ai te Aliki kia Mohe, “Tipi ni fatupapa māfolafola e lua e vē ko nā fatupapa māfolafola muamua, ma ka tuhi e au ki luga nā kupu nae i luga o nā fatupapa māfolafola muamua, iēia na tatake e koe. 2Hāuni i te tāeaopō tāeao, oi fanake ai ki luga o te Mauga ko Hinai ke feiloaki kitāua i kinā i te tumutumu. 3E hēai he tino e ōake ma koe; e hēai he tino e kitea i ho he kogāfenua o te mauga; ma e hēai ni māmoe pe ni pōvi e fakataga ke kakai i tafa o te mauga.” 4Oi na tipi ai e Mohe iētahi fatupapa māfolafola e lua, ma i te tāeaopō na hohoko ai, na kave ai e ia ki luga o te Mauga ko Hinai, e vē ona fakatonu ai ia e te Aliki.
5Ma na fanaifo ai te Aliki ki lalo i he ao, kua tutū fakatahi ma Mohe i kinā, ma na fakailoa ai e ia tona igoa paia, ko te Aliki.#34.5 Epelu Aliki Kikila ki te 3.14 6Oi na kui ake ai ia i mua o Mohe ma kalaga vē,
“Ko te Aliki, ko te Aliki,
te Atua e tumu i te alofa fakahao ma te alofa tūnoa;
e telegehe ki te tōkahā
kae tumu i te alofa mautū ma te fakamāoni.#Eho 20.5-6; Nūm 14.18; Teu 5.9-10; 7.9-10
7E tauhi au ki te alofa mautū mo te afe o tupulaga,#34.7 o tupulaga pe o tauhaga
ma fakamāgaloa nā hehē, fakatuikehe ma nā agahala;
kae ka hē puli lele ia te au nā tino e nofohala,
ma ka fakahala lava e au nā fānau ma nā makopuna,
mo nā agahala a o lātou mātua
ki te tolu ma te fa o augā tupulaga.”
8Na vave lele oi ifo punou ia Mohe ki lalo ki te kelekele ma tāpuaki ki te Aliki. 9Kua lea vē atu, “Te Aliki e, kāfai e moni ko koe e fiafia mai kia te au, hau la tātou olo fakatahi. Ko nā tino iēnei ni tino loto makaka, kae fakamāgalo kō o mātou kino ma a mātou agahala, ma talia kimātou ke fai ma ō tagata.”
Kua toe Fakafōu te Feagaiga
(Eho 23.14-19; Teu 7.1-5; 16.1-17)
10Kua vāgana mai te Aliki kia Mohe, “Ko te taimi tēnei e fai ai taku feagaiga ma tagata Ihalaelu. I mua o kilātou uma lele, ka kō faia ai nā mea e hili te uiga kehe, e hēki faia lele muamua i ho he koga o te lalolagi, pe i mua o mālō o te lalolagi. Ka kikila ia tagata uma ki te uiga kehe o nā mea e fai e au, te Aliki, auā ka kō faia he mea ofōfogia mo koe. 11Tauhi ki nā tūlāfono e kō tuku atua kia te koe i te aho nei. Ka kō tuli kehea nā tino ha-Amolī, ha-Kananā, ha-Hitē, ha-Pelehī, ha-Hivī, ma nā tino ha-Iepuhī, kāfai koutou e ōatu ki nā fenua iēnā. 12Nahe kē faia he feagaiga fakauō ma nā tino o te fenua e olo koutou ki ei, auā ko he māilei tēnā e mamate ai koutou. 13#Teu 16.21Kae talepe ki lalo a lātou fata faitāulaga, a lātou poutū tapu, ma tipi ki lalo a lātou fakailoga o te atua fafine ko Ahelaha.
14“Nahe kē tāpuaki ki hētahi atua, auā ko au, te Aliki, ko tētahi oku igoa ko Fuā, ma ko au ko he Atua e fuā. 15Nahe kē faia he feagaiga fakauō ma nā tino o te fenua, auā kāfai e tāpuaki ki o lātou atua fakapaupau, ma ofo atu a lātou tāulaga ki ei, e i na ka valakaulia koutou ke kau fakatahi ma kilātou, ma fakaohōhogia ai koutou ke kakai ki nā meakai e ofo atu e kilātou ki o lātou atua. 16Ma ka kaumai ai e koe o lātou afafine ke fai ma āvaga a nā ataliki o koe, ma takitaki ai kilātou ke tāpuaki ki o lātou atua fakapaupau, ma hē fakamāoni mai ai kilātou kia te au.
17 #
Eho 20.4; Lev 19.4; Teu 5.8; 27.15 “Nahe kē faia ni atua ukamea ke tāpuaki ki ei.
18 #
Eho 12.14-20; Lev 23.6-8; Nūm 28.16-25 “Tauhi ki te Kaiga Fakamanatu o te Falaoa Hē Fakafefetea. E vē ona fakatonu ai koe e au, kakai ki nā falaoa hē fakafefetea mo nā aho e fitu i te māhina ko Apipa, auā ko te māhina tēnā na olokehe ai koutou mai Aikupito.
19 #
Eho 13.2
“Ko au ulumatua tama uma vēnā ma ulumatua poa a nā manu tauhi a koe e āku, 20#Eho 13.13kae e toe totogi e koe i he punuāmāmoe mo te ola o au ulumatua āhini takitahi uma. Kāfai e hēai, oi ka gagau e koe te ua o te āhini. Ko ulumatua tama uma a nā ataliki o koe, e tatau ke toe totogi e koe mo o lātou ola.
“E hēai he tino e hau ki mua o oku e aunoa ma hana tāulaga.
21 #
Eho 20.9-10; 23.12; 31.15; 35.2; Lev 23.3; Teu 5.13-14 “E ono ia aho e fai ai autou gāluega, kae i te fitu o aho ka mālōlō ai koutou; e tuha lava pe ko nā taimi iēnā e fakamalū ai te kelekele pe e helehele ai te fuata, ko koutou ka mālōlō ai.
22 #
Lev 23.15-21; 23.39-43; Nūm 28.26-31 “Tauhi ki te Kaiga Fakamanatu o te Helehelega, kāfai e kāmata helehele te fuata muamua o autou haito, ma ke vēnā foki oi tauhi ki te Kaiga Fakamanatu o nā Tōega o te Fuata i te tau e kāmata malili ai ia lau o lākau, kāfai e fakaputu uma mai te fuata o autou fātoaga.
23“E fakatolu i te tauhaga ka ōmamai ai ia tāulelea uma o koutou ke tāpuaki mai kia te au, te Aliki, te Atua o Ihalaelu. 24Auā ka kō tuli kehea nā mālō i mua o koutou ma fakalahi te kelekele o koutou; e hēai he tino ka taumafai ke ia kavea nā fenua o koutou kāfai koutou e olo ki mua o te Aliki te koutou Atua, i nā taimi o nā kaiga fakamanatu iēnei e tolu.
25 #
Eho 12.10
“Nahe ofo maia e koe he falaoa e fai i te fefete fakatahi ma tau tāulaga o te toto manuvaefa, ma nahe fakatotoea he vāega o te manu na tāmate mo te Kaiga Fakamanatu o te Pāheka, ke pa ki te tāeao o te aho alafaki.
26 #
Teu 24.21; 26.2 “Ko nā fua muamua e pito hili te lelei o te fuata o tō fātoaga, e tatau ke kaumai e koe ki te fale o te Aliki tō Atua.
“Nahe tunua e koe he punuāoti i te huhu o tona mātua.”
27Kua vāgana mai te Aliki kia Mohe, “Tuhi ki lalo nā kupu iēnei, auā e fakavae i nā kupu iēnei taku feagaiga e fai ma koe ma e vēnā ma Ihalaelu.” 28Na nofo ai ia Mohe i kinā ma te Aliki i ni ao ma ni pō e fa hefulu, ma e hēki kai lele pe na inu. Ma na tuhi ai e ia ki luga o nā fatupapa māfolafola nā kupu o te feagaiga—ko nā Fakatonuga e Hefulu iēnā.
Kua Fanaifo ia Mohe ki Lalo o te Mauga ko Hinai
29I te fanaifoga o Mohe ki lalo o te Mauga ko Hinai ma hiki ifo nā fatupapa māfolafola e lua o nā Fakatonuga e Hefulu, ko nā fōliga o ia nae huhulu kae hē ia iloa, ona nae faitatala ma te Aliki.#2 Kol 3.7-16 30I te kitea atuga e Alona ma nā tino Ihalaelu o Mohe ma ona fōliga e huhulu, na mātataku lele ai oi hōhō atu kia te ia. 31Kae kua kalaga atu ia Mohe kia te kilātou; ma na ōmamai ai ia Alona ma nā takitaki o te fakapotopotoga kia te ia, ma na tautala atu ai ia kia te kilātou. 32Mulimuli ake, na fakapotopoto mai ai ia tagata uma ki tafa o Mohe, ma na tuku atu ai e ia kia te kilātou nā fakatonuga uma na fōki ake e te Aliki kia te ia i luga o te Mauga ko Hinai. 33Kua uma te tautala o Mohe kia te kilātou, oi na tatao ai e ia ona mata i he veli. 34Kae ko taimi uma lava nae fano ai ia Mohe ki loto o te Falekie ke feiloaki ma te Aliki, nae ia kave kehea te veli ke pa ki te taimi e toe hau ai ki fafo. Ma kāfai e hau ki fafo, e ia fakailoa atua ki tagata Ihalaelu nā mea uma lele na fakatonu ake kia te ia ke tautala ai, 35ma e kilātou kitea ai ko ona fōliga e huhulu. Oi e toe pupuni ai ona fōliga i te veli, ke pa ki tētahi taimi e fano ai ki loto ke tautala ki te Aliki.
Currently Selected:
Ehoto 34: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
