Ehoto 33
33
Kua Fakatonu ia Ihalaelu ke Olokehe mai te Mauga ko Hinai
1 #
Ken 12.7; 26.3; 28.13 Ma na vāgana mai ai te Aliki kia Mohe, “Olokehe ma kinei, ko koe ma nā tino na kaumai e koe mai Aikupito, ma olo ki te fenua na folafola e au e fōki kia Apelaamo, kia Ihaako, ma kia Iakopo ma o lātou lāpuna. 2Ka uga atu e au taku āgelu ke muamua ia te koe, ma ka kō tuli kehea nā tino ha-Kananā, ha-Amolī, ha-Hitē, ha-Pelehī, ha-Hivī, ma nā tino ha-Iepuhī. 3Olo ki he fenua e tafe ai te huhu ma te meli. Kae ko au ka hē olo ma koutou, auā ko koutou ni tino loto makaka, ma e ono oi fakaumatia koutou e au i luga o te auala.”
4I te lagonaga e tagata o nā kupu iēnei, oi na fakanoanoa lele ai kilātou ma e hēki toe faia lele ni a lātou mea teuteu. 5Auā na vāgana te Aliki kia Mohe ke lea vē kia te kilātou, “Ko koutou ni tino loto makaka. Ānei au na olo ma koutou, e tuha lava pe mo hina taimi pukupuku lele, ko koutou kua matuā fakaumatia lava e au. I te taimi nei la, ui kehe autou mea teuteu, oi kua fai ai haku tonu ki te mea ka fai kia te koutou.” 6Talu lava la te olo kehe o kilātou mai te Mauga ko Hinai, e hēki toe faia lele ni a lātou mea teuteu.
Ko te Falekie Tapu o te Aliki
7Nae māhani lava oi kave e Mohe he falekie, ma fakatū i he mea e mamao kehe atu ki fafo o te api a tagata Ihalaelu. Ma na fakaigoa e ia ko te Falekie o te Aliki,#33.7 Ko te Falekie o te Aliki e kehe mai te Falekie Tapu pe ko te Tapeneko ma ko ho he tino nae ia fia iloa te finagalo o te Aliki, nae fano ki te Falekie tēnei. 8Ho he taimi lava nae fano ai ia Mohe ki te Falekie tēnei, ko nā tino nae tutū i nā faitotoka o nā falekie o kilātou ma tautuku ia Mohe, ke pa lava ki te taimi e ulu atu ai ki loto. 9Kāfai ia Mohe e ulu ki loto, e fanaifo ki lalo te poutū ao ma tū i te faitotoka o te Falekie, oi tautala mai ai te Aliki kia Mohe mai loto o te ao. 10Ko taimi uma lava nae kitea atu ai e nā tino te poutū ao i tafa o te faitotoka o te Falekie, nae fakapakukū uma kilātou ki lalo ma ifo atu ki ei. 11Ko Mohe la nae faitatala lava ma te Aliki e vē he tino e tautala ki hana uō. Oi na toe liliu ai ia Mohe ki te api a tagata Ihalaelu, kae ko te taulealea talavou nae fehoahoani kia te ia, ia Iohua te ataliki o Nuno, na nofo i te Falekie.
Kua Folafola e te Aliki ka Fakatahi Ia ma Ona Tagata
12Na lea atu ia Mohe ki te Aliki, “E hako na vāgana mai koe kia te au ke takitaki nā tino iēnei ki te fenua tēnā, kae e hēki taku maia e koe pe ko ai te olo kimāua. Na leamai koe e kē iloa lelei lava au, ma ko koe e fiafia kia te au. 13Kāfai la ko tēnā, fakailoa mai kia te au nā fuafuaga a koe, kae ke tautua atu ai au kia te koe, ma fai ai pea e au te mea e fiafia ai koe. Ke manatua foki kua filifili e koe nā tino iēnei ke fai mo koe.”
14Na tali mai te Aliki, “Ko au ka olo ma koutou, ma ka fōki atu e au kia te koutou te manumālō.”
15Oi na lea atu ai ia Mohe, “Kāfai koe e hē olo fakatahi ma kimātou, nahe kē tukua kimātou ke olokehe ma kinei. 16E vēhea ona iloa e he tino ko koe e fiafia ki ō tagata ma kia te au, pe kāfai koe e hē olo ma kimātou? Ko tō iei fakatahi ma kimātou, ka kitea ai te kehe o kimātou mai iētahi tino i te lalolagi.”
17Na vāgana mai te Aliki kia Mohe, “Ka kō faia e vē lava ko te mea kua leamai ai koe, auā e kō iloa lelei lava koe, ma ko au e fiafia kia te koe.”
18Oi na fakatagi vē atu ai ia Mohe ki ei, “Fakamolemole, fakakikila kō au ki te mamalu o koe.”
19 #
Lom 9.15
Na tali mai te Aliki, “Ka kō faia ke kitea e koe te kātoatoa o toku lelei, ma ka fakailoa atu kia te koe toku igoa. Ko au ko te Aliki, ma ka fakaalia toku alofa tūnoa kia te kilātou e alofa tūnoa au ki ei, ma toku alofa fakahao kia te kilātou e alofa fakahao au ki ei. 20Kae ka hē mafai ke kitea e koe oku fōliga, auā e hēai he tino e ia kitea au ma ola ai pea. 21Kae tēnei te avanoa i oku tafa ke tū ai koe, i luga o he papa. 22Kāfai toku mamalu e kui ake i mua o koe, ka kō tukua koe ki he pūpapa ma pupuni koe i toku alofilima, ke pa ki te taimi e teka kehe atu ai au. 23Oi ka kave kehe ai toku lima, ma ka kē kitea ai toku tua, kae hē ko oku mata.”
Currently Selected:
Ehoto 33: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
