Eheta 3
3
Kua Taupulepule ia Hamanu ke Fakatāugā ia Tagata Iutaia
1I he taimi mulimuli ake, na tōfia ai e te Tupu ko Ahahuelu ia Hamanu te ataliki o Hametata, ma ko he lāpuna o Akaki,#3.1 Akaki He tupu Amaleka, ko ona tagata ni fili tūmau o tagata Ihalaelu ki he tūlaga nae pito hili te maualuga i tona mālō. 2Na fakatonu e te tupu nā tino ōfiha uma lele ke fakaaloalo kia Hamanu, ma ke ifo kia te ia i taimi uma lava e kui ake ai i o lātou tafa. Kae ko Moletekai nae hē ifo pe uhitaki kia Hamanu. 3Oi na fehili vē atu ai iētahi o nā tino ōfiha a te tupu kia Moletekai, “Heā te hē uhitaki ai koe ki te fakatonuga a te tupu.” 4Na tali mai ia Moletekai, “Auā ko au he Iutaia, ma e hē mafai au ke ifo kia Hamanu.” Nae fakamālohi lava kilātou kia Moletekai i tēia aho ma tēia aho, ke ifo i mua o Hamanu, kae e hēki mafai lele ia ke fia uhitaki. Oi na fakailoa ai e kilātou te mea tēnei kia Hamanu, kae ke kitea pe i na ia talia nā uiga iēnei o Moletekai. 5Na ita lahi lele ia Hamanu i te ia lagonaga ko Moletekai e hē fia tōtuli pe ifo ake kia te ia, 6ma i te ia iloaga ko Moletekai ko he tino Iutaia, na tonu ai ia te ia ke fakaumatia e hē gata ko Moletekai, kae e vēnā foki ma nā tino Iutaia uma i loto o te Mālō kātoa o Pelehia.
7I te hefulu lua o tauhaga o te nofoakiga a te Tupu ko Ahahuelu, i te māhina muamua, te māhina ko Nihani, na fakatonu ai e Hamanu ke fai he heki (pe he “puli”), ke hakili ai te aho ma te māhina e tatau ke fakatāunuku ai tana mea kua fuafua e fai. Ko te aho hefulu tolu o te māhina e hefulu lua, te māhina o Atala, te na filifilia.
8Oi na fano ai ia Hamanu ki te Tupu ko Ahahuelu ma lea vē atu ki ei, “E iei nā tino kehe e halalau i tō mālō, ma e maua i nā itūmālō uma lele. E tauhi e kilātou ni aganuku e hē vē ko aganuku a iētahi tagata. E hē gata i tēnā, e hē uhitaki foki kilātou ki nā tūlāfono a te mālō, oi e hēai lele he mea lelei a koe e maua kāfai e talia pea e koe nā tino iēnei ma a lātou mea e fai. 9Kāfai e finagalo ki ei tau Afioga te Tupu, fai he poloakiga ke tāmate nā tino iēnei. Kāfai koe e malie ki ei, e takutino atu e au ka kō fakaputu maia ni hiliva e maua te tolu helau fituhefulu lima tone,#3.9 tolu helau fituhefulu lima tone Epelu hefulu afe tāleni ki loto o nā potu teutupe a te tupu, mo te fakatinoga o gāluega a te mālō.”
10Oi na heki kehe ai e te tupu tona mama fakamau fakailoga ma fōki kia Hamanu te ataliki o Hametata, he tino nae fai ma ona fili nā tino Iutaia. 11Kua lea vē atu te tupu kia Hamanu, “Ko nā tino ma a lātou tupe e a koe; fai la nā mea e kē kitea e tatau ke fai e koe.”
12I te aho hefulu tolu la o te māhina muamua, na fekau ai e Hamanu nā failautuhi a te tupu, ma faitau ai ki ei te poloakiga ma te fakatonuga, ke fakaliliu ki nā gagana uma e fakaaogā i nā itūmālō uma o te mālō, ma ke kave ki nā aliki, nā kōvana ma nā tino ōfiha o tagata uma—ki nā itūmālō takitahi uma i ta lātou lava tuhi, ma ki itūkāiga tagata uma i ta lātou lava gagana. Na tūhia i te igoa o te Tupu ko Ahahuelu, ma fakapipiki i tana mama fakamau fakailoga. 13Na kave nā tuhi e nā kavefekau ki nā itūmālō uma ma te fakatonuga ke tāmate, ke fakatāugā ma fakaumatia uma lele nā tino Iutaia, nā tino talavou ma nā tino mātutua, vēnā ia fafine ma tamaiti; ma ke fakatino te mea tēnei i he aho e fokotahi—te aho hefulu tolu o te māhina o Atala, ma ke puke uma ai foki ma a lātou koloa. 14Kua fakahalalau nā mea e tūhia i loto o te poloakiga ki tagata uma i nā itūmālō takitahi, kae ke hāuni ai kilātou mo te aho kua fuafuagia.
15Na tātitili lele nā kavefekau e vē ona fakatonu ai kilātou e te tupu, ma na fakahalalau ai te poloakiga ki tagata i te laumua ko Huha. Ma na nonofo ai ki lalo te tupu ma Hamanu oi inu uaina, kae ko tagata i te kakai ko Huha, kua fakatēkia lele ma hē mālamalama i te uiga o te mea tēnei.
Bible Society New Zealand Charitable Trust