Eheta 2
2
Kua Kavea ia Eheta ma Mahiofo
1I he taimi mulimuli ake, kua tau teka atu lava te ita o te Tupu ko Ahahuelu, kae koi māfaufau lava ki te mea a Vahati na fai, ma te poloakiga a ia na fai e fakatatau ki ei. 2Oi na fautua vē atu ai nā kaukauna a te tupu nae tautua kia te ia, “Heā te hē hakili mai ai ni tautiti tāupou kaulelei mo koe? 3E kē mafaia oi tofi ni tino ōfiha i nā itūmālō takitahi uma o te mālō, ma fakatonu ai ki ei ke kaumai uma nā teine muli tāupou kaulelei ki te fale o fafine o koe i Huha, te laumua o te mālō. Oi tuku ai kilātou ki te kikilaga a Hekai te eunuke e pule i au fafine, ma ke mautinoa e uku o lātou tino i te lolo manogi. 4Oi kua filifili ai e koe te tautiti e hili tō fofou ki ei, ma fai ai ia ma au mahiofo ke hui kia Vahati.”
Na fiafia te tupu ki te manatu tēnei, oi na fakatāunuku ai e ia.
5I te taimi tēnā, nae iei he tamāloa Iutaia nae nofo i Huha, ko tona igoa ko Moletekai, he ataliki e o Iailo, mai te puikāiga o Peniamina, ma ko he lāpuna e o Kihi ma Himei. 6#2 Tup 24.10-16; 2 NT 36.10I te kavega e te Tupu ko Nepukaneha o Papelonia, te Tupu ko Iehoiakina#2.6 Epelu Iekonaia Ko hētahi tuhiga o te igoa Iehoiakina o Iuta mai Ieluhalema oi fakaaunukua, na kave fakatahi ai ma he vāega o nā pāgotā, ma nae i loto ai ni tino o te kāiga o Moletekai. 7Nae iei tona fetautāina ko Eheta te igoa, ko tona igoa Epelu ko Hataha; he teine muli kaulelei, ma fuaitino mānaia foki. I te otiga o ona mātua, na kave ai e Moletekai oi tauhi e vē lava he afafine e o ia.
8Ona ko te poloakiga a te tupu kua fakahalalau, na kaumai ai te tokalahi o nā teine muli ki te fale o fafine o te tupu i Huha, ki lalo o te kikilaga a Hekai. Ko Eheta nae i loto o te vāega tēnei. 9Ko Hekai nae fiafia lele kia Eheta, ma na vave lele oi ia fakatonua ke fafaga ia Eheta i ni meakai fakapitoa, ma ke tauhi tona tino i ni lolo manogi. Na ia fōkia foki kia Eheta te nofoaga e hili te lelei i te fale o fafine, ma tōfia ni teine muli e toka fitu mai te maota o te tupu, ke kaukauna kia te ia.
10Na fakatonu lava e Moletekai ia Eheta ke nahe fakailoa lele ko ia ko he Iutaia, ma na uhitaki foki lava ki ei ia Eheta. 11I aho uma, ko Moletekai e hāvalivali lava i mua o te lōtoā o te fale o fafine, kae ke ia iloa pe ā ia Eheta, ma pe heā foki te ka pa ki ei.
12Ko nā teine muli nae tauhi lava o lātou tino i nā lolo manogi mo he tauhaga kātoa. I te ono māhina muamua ko o lātou tino e uku ma fōfō i te lolo mai te pulu mulo, ma i te ono māhina mulimuli, e fakaaogā te lolo mai te pulu pāhama. Kāfai e uma nā tauhiga iēnei e vē ona fakatonugia, oi kave tau toka tahi ai nā teine muli ki te Tupu ko Ahahuelu. 13Kāfai he teine e fano ki te tupu, e kofu i ho ni lākei e fofou ia ki ei, mai te fale o fafine. 14E fano i te afiafi ki te tupu, ma i te tāeao e hohoko ai, e kave ki hētahi fale o fafine i lalo o te kikilaga a Haahaga, te eunuke e pule i nā āvagapō a te tupu. E hē toe fano lele te teine ki te tupu, vāganā ko te tupu na fiafia ki te teine, ma ia fakailoagia tona igoa ki ana kaukauna, ke toe kavake.
15Ko Eheta ko he afafine e o Apihaila te faitamana o Moletekai, (na fai e Moletekai tona fetautāina ko Eheta ma ana tama tauhi.) Kua pa ki te taimi o Eheta e fano ai ki te tupu, oi na kofu ai lava i nā lākei na fautuagia ai ia e Hekai, te eunuke e pule i te fale o fafine. Ma na fiafia lele kia Eheta, nā tino uma lele na kilātou kiteagia ia.
16Na kave ai ia Eheta ki te maota o te Tupu ko Ahahuelu i te fitu o tauhaga o tana nofoakiga, i te hefulu o māhina, te māhina ko Tepeta. 17Na hili atu te alofa o te tupu kia Eheta i lo ki ho hētahi lava fafine muli. Na tuku e ia te palealiki ki te ulu o Eheta, ma kavea ai ia ma ana mahiofo, ke hui ai ia Vahati. 18Oi na fai ai e te tupu he kaiga lahi mo Eheta, ma valakaulia ai ana tino ōfiha ma pule fakahoa uma. Na folafola foki e ia he aho mālōlō mo nā itūmālō uma, ma fōki ni meālofa taugatā ki tagata.
Kua Lāveaki e Moletekai te Ola o te Tupu
19I te taimi foki lava tēnā na tōfia ai ia Moletekai e te tupu ki he tūlaga ōfiha. 20Kae e vē la kia Eheta, ko hēki fakailoa lava e ia ko ia he fafine Iutaia. Na lea ki ei ia Moletekai ke nahe takua e ia te mea tēnei ki he tino, ma na uhitaki lava ia Eheta kia Moletekai, e vē foki lava ona ia faia i taimi uma lava ka koi tamaiti ai.
21I tētahi aho, ko Moletekai nae tiute i te alapupuni o te maota o te tupu, kae e toka lua ia eunuke a te tupu, ko Pikitana ma Teleha, ni leoleo fāitotoka ki te potu o te tupu, na feita lele ki te Tupu ko Ahahuelu, ma taupulepule ai ke tāmate e kilāua. 22Kua iloa e Moletekai te mea tēnei, oi na taku ai e ia ki te Mahiofo ko Eheta, ma na vēnā foki oi fakailoa e Eheta ki te tupu te mea na lea ake ai ia Moletekai. 23Na fai te hukehukega ma na fakamāonia te hako o te līpoti, oi na hihi ai i nā ua te toka lua tēnei, i te fata hihitino. Ko te mea tēnei na fakamau ki loto o te Tuhi o nā Fakamaumauga a te Mālō ko Pelehia.
Bible Society New Zealand Charitable Trust