Eheta 4
4
Kua Lea ia Moletekai kia Eheta mo he Fehoahoani
1I te iloaga e Moletekai o nā mea uma iēnei kua fai, na hae ai e ia ona kofu i tona fakanoanoa lahi. Oi na kofu ai i he kofutaga ma tatao tona ulu i te lefulefu, ma havali ai i loto o te kakai ma tagi taukekē. 2Na gata mai tana havali i te faitotoka o te alapupuni ki te maota o te tupu, auā nae fakahā he tino e kofu i he kofutaga, ke ulu atu ki loto. 3Ma i nā itūmālō uma lele kua fakahalalau ai te fakatonuga ma te poloakiga a te tupu, ko tagata Iutaia kua matuā fakatumulia lava i te fakanoanoa. Kua faitatagi ma fakalāina ma lauē ia tagata, ma ko te tokalahi o kilātou kua kokofu i nā kofutaga ma tākokoto ki luga o nā lefulefu.
4I te taku atuga kia Eheta e ana kaukauna fafine ma ana eunuke te mea kua fai e Moletekai, na tumu lele tona loto i te fakanoanoa lahi. Ma na kave ai e ia ni kofu kia Moletekai ke hui ai ona kofutaga, kae e hēki talia e Moletekai. 5Oi na fekau ai e Eheta ia Hataka, ko hētahi o eunuke a te tupu na tōfia ke fai ma kaukauna a Eheta, ma fakatonu ki ei ke fano kia Moletekai ma hakili pe heā te kua tupu, ma pe aiheā. 6Na fano ai ia Hataka kia Moletekai i te malae o te kakai, i mua o te alapupuni o te maota o te tupu, 7ma na taku ai e Moletekai ki ei nā mea uma kua tutupu kia te ia, ma te aofaki kātoa o te tupe na folafola e Hamanu, e ia tukua ki loto o te potu teukoloa a te tupu pe kāfai nā tino Iutaia uma e tāmate. 8Na fōki foki e Moletekai kia Hataka he kopi o te poloakiga a te tupu, tēia na fakahalalau i Huha, ma e fakatonu ai ke tāmate uma nā tino Iutaia. Kua lea ia Moletekai kia Hataka ke fōki te tuhi kia Eheta, ma ke fakamatala ki ei te mea kua tupu. Na lea foki ki ei ke fakatonu ia Eheta ke fano ki te tupu, ma fakatagi ki ei mo tona alofa fakahao, ki ona tagata. 9Ma na fano ai ia Hataka oi taku kia Eheta te mea na lea ake ai ia Moletekai kia te ia. 10Oi na lea ai ia Eheta kia Hataka ke toe fano kia Moletekai ma te faifekau tēnei: 11“E iloa e kaukauna uma a te tupu ma tagata o nā itūmālō, kāfai he tāulelea pe he fafine e fano ki loto o te lotoā tūloto o te tupu ke kikila te tupu, kae e hēki fekaua pe fakataga e te tupu, e fokotahi lava te tūlāfono: ko te tino tēnā e tāmate. Vāganā lava e fālō atu te tokotoko aulo o te tupu ki he tino, oi fātoā mafai ai ke ola te tino tēnā. Ko au foki kua kātoa nei te māhina e hēki fekau lele maia e te tupu.”
12I te mauaga e Moletekai o te fekau a Eheta, 13na kave ai e ia te lapatakiga tēnei kia Eheta, “Ia koe nā vēakē ko koe e haogalēmū atu nāi lo hētahi tino Iutaia, ona ko koe e nofo i te Maota o te tupu. 14Kāfai koe e hē kīkī i he taimi vēnei, ka maua e tagata Iutaia he fehoahoani mai hētahi mea, ma ka fakahao ai kilātou, kae ko koe ka tāmate, ma ko te kāiga o tō tamana ka fakaumatia lava. Kae ko ai te ia iloa—ātonu pe ko nā taimi vēnei te na fai ai koe ma mahiofo!”
15Oi na toe kave ai e Eheta te tali tēnei kia Moletekai: 16“Fano oi fakamāopōpo nā tino Iutaia uma i Huha; lea ki ei ke fakalāina mo oku, ma ke nahe kakai pe inu mo ni aho e tolu, i te ao pe ko te pō. Ko au foki ma aku kaukauna teine ka fakalāina e vē ko kilātou. Kāfai e uma tēnā, oi kua fano ai au ki te tupu, e ui lava ko he holi tūlāfono tēnā; ma kāfai au e mate ai, oi ko au e mate ai.”
17Oi na fano kehe ai ia Moletekai, ma na fakatino e ia nā mea uma na fakatonu ai ia e Eheta ke fai.
Bible Society New Zealand Charitable Trust