Efeho 1
1
1Mai ia Paulo, te apohitolo a Keliho Iehu, na filifilia e te Atua—
Ki tagata o te Atua i Efeho,#1.1 Ko iētahi tuhituhiga, e hē i loto ai i Efeho kilātou e fakamāoni i o lātou olaga i te māfutaga fakatahi ma Keliho Iehu. #Gāl 18.19-21; 19.1
2Ke ia te koutou te alofa tūnoa ma te fīlēmū mai te Atua to tātou Tamana, ma to tātou Aliki ko Iehu Keliho.
Fakamanuiaga Faka-te-Agaga e Maua ia Keliho
3Ke hiki ake fakatahi e kitātou he fakafetai ki te Atua, te Tamana o to tātou Aliki ko Iehu Keliho. Auā e ala i te tātou hokotaga ma Keliho, kua fakamanuia ai e ia kitātou i nā fakamanuiaga faka-te-agaga kehekehe uma mai te lagi. 4Ka ko hēki fakavaea te lalolagi, ka kua uma te filifilia o kitātou e te Atua ke fai mo ia, e ala i te tātou hokotaga ma Keliho, kae ke paia ai kitātou ma hēai ni hehē i mua o ia.
Ona ko tona alofa 5na tonu ai muamua i te Atua, ke fai kitātou ma ana fānau e ala ia Iehu Keliho—ko te mea tēnei na fiafia ma fofou ia ke fai. 6Tātou viviki atu ki te Atua ona ko tona alofa tūnoa, ma te meālofa fōki tauanoa mai e ia mo kitātou—ko tona Ataliki fakapelepele. 7Ona ko te mate o Keliho, kua maua ai e kitātou te haolotoga—ko a tātou agahala kua fakamāgalo. E aloā e tūkehe te alofa tūnoa o te Atua, #Klh 1.14 8tēia kua fōki mai e ia kia te kitātou i ni tūlaga mata lahi vēnei!
I tona poto ma tona mālamalama, 9na fakatino ai e te Atua te mea na fofou ia ke fai, ma fakailoa mai kia te kitātou tana fuafuaga lilo kua uma te tonu ia te ia ke fakatāunuku, e ala ia Keliho. 10Ko te fuafuaga tēnei, tēia ka fakatino kātoatoa e te Atua i te taimi e tatau ai, ka tuku fakatahi ai nā mea uma lele na gaohia i te lagi ma te lalolagi, ma kavea ai ia Keliho ma ulu.
11Ko nā mea uma e fakatino e tuha ai ma te fuafuaga a te Atua ma te mea e finagalo ia ki ei; ma kua filifilia kitātou e te Atua ke fai ma ona tagata i te hokotaga ma Keliho, ona ko te mea lava ia na fofou ia ki ei mai te kāmataga. 12Ko kitātou la iēia na muamua oi tuku atu o tātou fakamoemoe kia Keliho, keina tātou viviki atu ki te mamalu o te Atua.
13Ma ko koutou foki na kavea ma tagata o te Atua i te lagonaga e koutou o te kupu moni—te Tala Lelei na maua ai e koutou te fakaolataga. Ko koutou kua talitonu kia Keliho, ma kua tuku e te Atua ki outou luga tana fakailoga e iloa ai ko koutou e a ia, e ala i te Agaga Paia kua ia fōki atua kia te koutou, e vē ona folafola e ia. 14Ko te Agaga, ko te fakamāoniga ia ka maua e kitātou te mea kua uma te folafola mai e te Atua ki ona tagata, ma e mautinoa ai e kitātou ka tuku mai e te Atua te haolotoga ki ona tagata. Ke vīkia la e kitātou tona mamalu.
Ko te Tatalo a Paulo
15Ona ko te mea tēnei, talu lava te lagona e au e uiga ki te koutou fakatuatua ki te Aliki ko Iehu ma te koutou alolofa ki tagata o te Atua, 16kua hē uma lele toku fakafetai ki te Atua ona ko koutou. Ko koutou e manatua i aku tatalo 17ma ko au e fakatagi ki te Atua o to tātou Aliki ko Iehu Keliho, te Tamana e uiga kehe tona mamalu, ke fōki atu kia te koutou te Agaga, tē ka maua ai e koutou te mālamalama, ma fakailoa atua kia te koutou te Atua, kae ke koutou iloa ai ia. 18Ko au e talohaga atu ke tatala outou māfaufau ke kitea ai e koutou te mālama e hau mai ia te ia, kae ke iloa ai e koutou pe ko heā tonu te fakamoemoe kua kalaga mai ai ia kia te koutou, ma te lahi o nā fakamanuiaga gali kua folafola e ia ki ona tagata, 19ma te uiga kehe o te lahi o tona mana e galue i loto ia te kitātou kua talitonu. Ko te mana e galue i loto ia te kitātou, e tutuha lava ma te mālohi lahi 20na fakatū ai ia Keliho mai te oti, ma fakanofo ai i tona itū taumatau i te mālō o te lagi. #Hal 110.1 21Ko nā mālohiaga uma i te lagi, nā taupulega, mālō, tupu ma aliki, e i lalo o te pule a Keliho; ma e hili lele atu te maualuga ma te tāua o tona tūlaga, i lo nā tūlaga uma lele i te lalolagi nei, ma i te olaga i mua. 22Kua tuku e te Atua nā mea uma ki lalo o nā vae o Keliho, ma tuku atu e ia ki te Ekalehia ke kavea ma Aliki hilihili e pule i nā mea uma. #Hal 8.6 #Klh 1.18 23Ko te Ekalehia ko te tino ia o Keliho, ko te kātoatoaga ia o tē e ia fakakātoatoagia ia mea uma lele i ho he mea.
Currently Selected:
Efeho 1: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
