Gāluega 9
9
Kua Liliu ia Haulo ma Talitonu kia Iehu
(Gāl 22.6-16; 26.12-18)
1I te taimi tēnā, nae fai lava ia fakahāuāga a Haulo ma fakamataku e ia i te oti, nā tino kua talitonu ki te Aliki. Na fano ki te Ulu Ohitāulaga 2ma lea ki ei mo ni tuhi ke fakailoa atu ai ia ki nā hūnako i Tamaheko, kae ke ia pukea ai nā tino nae i loto o te māopōpoga nae takua ko te Ala o te Aliki#9.2 Ala o te Aliki Ko te igoa ia nae fakaigoa ai te māopōpoga a nā tino Kelihiano i nā aho muamua i kinā, ia tāulelea ma fafine, ma kave fakapāgotā kilātou ki Ieluhalema.
3Ka koi malaga atu ia Haulo ki te kakai ko Tamaheko ma kua tafapili atu ki ei, kae nā lava e teki ko he mālama mai te lagi kua huhulu ifo fakatakamilo ia te ia. 4Na pakū ia Haulo ki luga o te kelekele ma na ia lagona atu ai he leo e lea vē mai kia te ia, “Haulo, Haulo! Heā te kua fakahāuā mai ai koe kia te au?”
5Na fehili atu ia Haulo, “Te Aliki, ko ai koe?”
Na tali mai te leo, “Ko au ko Iehu tē kua fakahāuā koe ki ei. 6Kae tū ki luga oi fano ki te kakai, ko kinā ka taku atu ai kia te koe tau mea e tatau ke fai.”
7Ko nā tamāloa nae malaga fakatahi ma Haulo kua tutū ma hēai he tino na vaivaia; na kilātou lagona te leo, kae hēai he tino na kitea e kilātou. 8Na tū ake ai ia Haulo ki luga mai te kelekele ma kua pupula ona mata, kae kua hē ia kitea he mea. Oi na takitaki ai e kilātou i te lima ki Tamaheko. 9E tolu ia aho nae hē mafai ai ke ia kitea he mea, ma na hēki kai foki pe na inu i te taimi tēnā.
10Nae i Tamaheko he tino kua talitonu ki te Aliki nae igoa kia Anania. Na ia kitea i he fakaaliga ko te Aliki na vāgana vē ake kia te ia, “Anania!”
Na tali atu ia, “Te Aliki, ko au tēnei.”
11Na vāgana mai te Aliki kia te ia, “Hāuni oi fano ki te auala e igoa ko te Auala Hako, ma i te fale o Iuta, lea ki ei ko koe e fia feiloaki ki he taulealea mai Taheha e igoa kia Haulo. Ko te taulealea e tatalo, 12ma i he fakaaliga, kua ia kitea he tino e igoa kia Anania kua ulu ake ma fakauta ona lima ki ona luga, kae ke mafai ai ke toe pupula ona mata.”
13Na tali atu ia Anania, “Te Aliki, e tokalahi nā tino kua lea mai kia te au e uiga ki te tagata tēnei ma ana fakahāuāga ki ō tagata i Ieluhalema. 14Ma kua hau ki Tamaheko ma te fakatagaga mai nā ohitāulaga pule, ke puke fakapāgotā ai kilātou uma e tāpuaki atu kia te koe.”
15Na vāgana atu te Aliki kia te ia, “Fano, auā kua kō filifilia ia ke kaukauna mai kia te au, ma ke ia fakailoa atua toku igoa ki tagata nukukehe ma ki nā tupu, ma ki tagata Ihalaelu. 16Ma ka kō fakahinoa kia te ia te lahi lele o nā puapuagā ka pa ia ki ei, ona ka ia fakailoagia toku igoa ki tagata.”
17Oi na fano ai loa ia Anania, kua ulu atu ki te fale nae iei ia Haulo, ma fakaeke ona lima ki luga o Haulo ma na lea vē atu kia te ia, “Haulo toku taina, ko au kua uga mai e te Aliki ko Iehu. Ko ia te na fakaali atu kia te koe i te auala ka kua tāli pa mai ai koe ki kinei. Na ia uga maia au kae ke mafai ke toe pupula nā mata o koe ma ke fakatumulia koe i te Agaga Paia.” 18I te taimi lava tēnā na malili kehe ai nā mea e vē ni unafi mai nā mata o Haulo, ma na toe mafai ai ke pupula ona mata. Na tū ai loa ki luga ia Haulo ma na papatihogia ai; 19ma i te umaga o te kai oi na toe maua ai e ia te mālohi.
Kua Folafola e Haulo te Tala Lelei i Tamaheko
Na nofo ia Haulo mo ni nāi aho i Tamaheko fakatahi ma nā tino kua talitonu. 20Ma i loto o nā hūnako, na folafola atu e ia ki tagata, ko Iehu ko te Ataliki o te Atua.
21Ko nā tino uma na kilātou lagona ia Haulo, na ōfo lele ma fakatau fehili vē, “E hē ko te tagata tēnei te nae ia tāmatea nā tino nae tāpuaki ki te tino nae igoa kia Iehu i Ieluhalema? E hē ko te māfuaga ia nei na hau ai ki kinei, ke puke fakapāgotā nā tino iēnei ma kave ki nā ohitāulaga pule?”
22Kae na ātili ai te mālohi o te faiga o te tālakiga a Haulo, ma ko te mautū o nā fakamāoniga a ia ko Iehu ko te Mehia, na hē mau tali ai ki ei nā tino Iutaia nae nonofo i Tamaheko.
23Kua teka atu nā aho e lahi, oi na māopōpo fakatahi ai nā tino Iutaia ma tau pulepule ke tāmate ia Haulo; #2 Kol 11.32-33 24kae na iloa e Haulo a lātou tau pulepulega iēnei. Nae tautuku e kilātou nā faitotoka o te kakai i te ao ma te pō, ke kilātou maua ia Haulo ke tāmate. 25Kae i tētahi pō, na kave ai ia Haulo e tana vāega ma tukutuku ifo ki lalo i loto o he polapola, mai he pū i te pāpuipui o te kakai.
Kua toe Foki ia Haulo ki Ieluhalema
26I te pa atuga o Haulo ki Ieluhalema, oi na taumafai ai ke fano ki loto o te māopōpoga a nā hoko o Iehu. Kae nae hē talitonu kilātou ko Haulo kua kavea ma hoko, ma nae mātataku uma kilātou ia te ia. 27Kae na fehoahoani ia Panapa kia Haulo, ma na ia kavea ke feiloaki ma te kau apohitolo. Na fakamālamalama e ia kia te kilātou te kiteaga e Haulo o te Aliki i luga o te auala, ma te vāganaga o te Aliki ki ei. Na ia takua foki kia te kilātou te hē mataku o Haulo oi tālaki i te igoa o Iehu, ki tagata i Tamaheko. 28Ma na nofo ai loa ia Haulo fakatahi ma kilātou, ma na olo ai ki itū uma o Ieluhalema ma tālaki atu ma te hē mātataku, i te igoa o te Aliki. 29Na folafola foki e ia e uiga kia Iehu Keliho ki nā tino Eleni nae tautatala i te gagana Iutaia ma nae fai a lātou fefīnauakiga, kae na taumafai lava kilātou ke tāmate ia Haulo. 30I te iloaga o te mea tēnei e nā tino kua talitonu, oi na kave ai e kilātou ia Haulo ki Kaihaleia, ma na uga ai ke fano ki Taheha.
31Ma na maua ai te Ekalehia kātoa i Iutea, Kalilaia ma Hamalia i he taimi toka fīlēmū. E ala i te fehoahoani o te Agaga Paia na tuputupu ai pea te tokalahi o tagata o te Ekalehia, ma nae ola kilātou ma te mataku i te Aliki.
Kua Fano ia Petelu ki Luta ma Iopa
32Ko Petelu nae fano ki ho he kakai, ma i tētahi taimi na fano ai oi āhi ia tagata o te Atua nae nonofo i Luta. 33I kinā na fetaui ai ma he tino nae igoa kia Ainea, he tino nae mate kātoa tona tino, ma kua kātoa te valu tauhaga e hē mafai ke fano kehe mai tona moega. 34Oi na lea vē atu ai ki ei ia Petelu, “Ainea, ko koe ka fakamālōlō e Iehu Keliho i te taimi nei. Tū ki luga oi fefetu tō moega.” I te taimi lava tēnā, na tū ai ki luga ia Ainea kua mālohi. 35Ko nā tino uma nae nonofo i Luta ma Halona na kilātou kitea ia Petelu, na liliu ma na talitonu ki te Aliki.
36I Iopa, nae iei he fafine kua talitonu ki te Aliki nae igoa kia Tapita. (Ko Tokaha i te gagana Eleni, ma ko tona uiga “he aila”.) Nae fakafano tona taimi kātoa i te faiga o nā gāluega lelei, ma fehoahoani ki tagata mātitiva. 37I te vāitaimi tēnā na maua i he tauale, ma na oti ai lava. Na fakatākele tona tino ma na fakatakoto ai i he potu i te falealuga. 38Ko Iopa nae hē mamao lahi te vā ma Luta, ma i te lagonaga e nā tino kua talitonu i Iopa, ko Petelu nae i Luta, oi na uga ai e kilātou ni tāulelea e toka lua ki ei ma te fekau e vēnei, “Fakamolemole kō, hau fakavave ki kinei.” 39Na hāuni ai loa ia Petelu ma na olo ai ma kilāua. Na pa atu lava ia Petelu oi na kave ai e kilātou ki te potu i te falealuga. I kinā, na hiko fakatakamilo ai ia e fafine uma kua feoti a lātou tāne; nae faitatagi lava ma fakahino kia te ia nā kofutino ma nā kofutatao na hui e Tokaha ka koi ola ai. 40Oi na uga ai e Petelu kilātou uma ki fafo o te potu, ma na tōtuli ai ki lalo ma tatalo; ma na liliu atu ai ia ki te tinooti ma lea vē atu ki ei, “Tapita, tū ki luga!” Na pupula ai loa nā mata o te fafine ma i te ia kiteaga o Petelu, oi na nofo ai ki luga. 41Ma na papae atu ai ia Petelu oi fehoahoani ki ei ke tū ki luga, oi na kalaga ai ki nā tino kua talitonu kia Iehu fakatahi ma fafine kua feoti a lātou tāne, ma na ia tuku atua ai kia te kilātou te fafine kua toe ola mai. 42Kua halalau te tala tēnei i Iopa kātoa, ma na tokalahi nā tino na talitonu ki te Aliki. 43Na nofo ia Petelu i Iopa i ni aho e lahi i te fale o Himona, he tino galue pakumanu.
Bible Society New Zealand Charitable Trust