Gāluega 8
8
1Ma na fiafia ia Haulo i te tāmatega o Hetefano.
Ko nā Fakahāuāga a Haulo ki te Ekalehia
I te aho lava tēnā, na kāmata ai oi maua ia tagata o te Ekalehia i Ieluhalema i nā fakahāuāga matakutia. Ma na takape ai kilātou ki nā kogāfenua uma o Iutea ma Hamalia, kae vāganā ai te kau apohitolo. 2Na tanu ia Hetefano e ni tino fakatuatua ki te Atua, ma na faitatagi lahi lele kilātou i te fakanoanoa.
3Kae ko Haulo nae taumafai lava ke fakahēai te Ekalehia; nae fano ki loto o nā fale o tagata tau toka tahi ma toho ki fafo nā tino kua talitonu kia Iehu, ko tāulelea ma fafine, ma togi ki loto o te falepuipui.#Gāl 22.4-5; 26.9-11
Kua Folafola te Tala Lelei i Hamalia
4Ko nā tino na takape, kua halalau ki nā itū uma ma tālaki atu te fekau. 5Ko Filipo na fano ki te kakai lahi i Hamalia, ma na folafola atu e ia e uiga ki te Mehia, ki nā tino i kinā. 6Nae fakalogo lelei ia tagata ki nā mea nae tautala ai ia Filipo, ma kikila ki nā vāvega nae ia faia. 7Nae taukekē nā agaga kino ma olo ki fafo mai ni tino e tokalahi, ma na tokalahi nā tino nae mate ni itūtino pe nae pipili, na fakamālōlō. 8Oi na fiafia lahi lele ai ia tagata i Hamalia.
9Nae i te kakai tēnā he tino nae igoa kia Himona, nae fai ana mea fakataulāitu i he taimi kua teka atu, ma nae ofo lele ai nā tino Hamalia. Nae lea ko ia ko he tino takutakua, 10ma ko tagata uma o te kakai, mai tē e pito maualuga ki tē e pito maualalo, nae fiafia lele oi fakalogo kia te ia, ma lea vē, “Ko te tino tēnei kua ia te ia te mana o te Atua tēia e takua ko te Mālohi Lahi o te Atua.” 11Nae mulimuli kilātou kia Himona mo he taimi mataloa, ona nae ofo lele kilātou ki ana mea fakataulāitu nae fai. 12Kae i te taimi na talitonu ai kilātou ki te fekau a Filipo e uiga ki te Tala Lelei o te Mālō o te Atua, ma e uiga kia Iehu Keliho, oi na papatiho ai kilātou, ia tāulelea fakatahi ma fafine. 13Ko Himona foki na talitonu; ma i te umaga o tona papatihoga, na mulimuli ai lava kia Filipo, ma na ofo lele i te ia kiteaga o nā mea ofōfogia ma nā vāvega nae fai.
14I te lagonaga e te kau apohitolo i Ieluhalema, kua talia e tagata o Hamalia te kupu a te Atua, oi na uga ai e kilātou ia Petelu ma Ioane ki ei. 15Kua taunuku atu kilāua, oi na tatalo ai ke maua te Agaga Paia e nā tino kua talitonu. 16Auā ko te Agaga Paia ko hēki fanaifo ki luga o hētahi o kilātou; na papatiho oioti kilātou i te igoa o te Aliki ko Iehu. 17Oi na fakaeke atu ai nā lima o Petelu ma Ioane ki o lātou luga, ma na kilātou maua ai te Agaga Paia.
18I te kiteaga e Himona ko te Agaga kua fōki ki nā tino kua talitonu i te fakaekega o nā lima o nā apohitolo ki o lātou luga, oi na fōki ai e ia ni tupe kia Petelu ma Ioane 19ma na lea vē atu ai ki ei, “Fōki mai foki kia te au te mana tēnā, kae ke maua ai e ho he tino e fakauta ki ei oku lima, te Agaga Paia.”
20Kae na tali vē mai ia Petelu ki ei, “I te manatu o koe, e kē mafaia oi fakatau te meālofa a te Atua i ni tupe! Ko koe ma nā tupe a koe e olo ki te mālaia. 21E hēai hō avanoa pe ko hō vāega i te mātou gāluega, auā ko te loto o koe e hē hako i te kikila a te Atua. 22Halamō la, mai ō māfaufauga kino iēnā, ma tatalo ki te Aliki ke ia fakamāgaloa koe ona ko koe kua manatu ki he mea vēnā. 23Auā e kō kitea ko koe kua tumu i te lotokino, ma kua fai ma pologa a te agahala.”
24Na tali atu ia Himona kia Petelu ma Ioane, “Tatalo kō ki te Atua mo oku, kae ke nahe iei he mea o nā mea iēnā e lea ai koulua, e pa au ki ei.”
25Kua uma te fai o te takutinoga ma te folafolaga o te fekau a te Aliki e Petelu ma Ioane, oi na toe foki ai kilāua ki Ieluhalema. Na tālaki e kilāua te Tala Lelei ki nā tamā kakai e lahi o Hamalia, i to lā auala ki Ieluhalema.
Ko Filipo ma te Tino o te Mālō o Efiopia
26Ma na vāgana mai he āgelu a te Atua kia Filipo, “Hāuni oi fano āgai ki haute#8.26 āgai ki haute pe i te vaeluaga o te aho ki te auala e fanatu mai Ieluhalema ki Kaha.” (Ko te auala tēnei kua hē fakaaogā i nā aho nei.)#8.26 Ko te auala tēnei kua hē fakaaogā i nā aho nei pe Ko te auala tēnei i te toafa 27-28Oi na hāuni ai loa ia Filipo ma kua fano. I te taimi tēnā, nae i luga foki o te auala he eunuke Efiopia, kua toe foki ki tona kāiga. Ko te tino tēnei ko he ōfiha tāua, nae pule i nā koloa a te tupu fafine o Efiopia, ma na fano ki Ieluhalema ke tāpuaki ki te Atua, ma kua toe foki i tana kaliota. E fano la tana kaliota kae faitau e ia te tuhituhiga a te pelofeta ko Ihaia. 29Na vāgana atu ai te Agaga Paia kia Filipo, “Fano ke pili koe ki te kaliota.” 30Oi na vili ai ki ei ia Filipo, ma na ia lagona atu te eunuke e faitau te tuhi a te pelofeta ko Ihaia; oi na fehili vē atu ai ia ki ei, “E mālamalama koe i tau mea e faitau?”
31Kae na tali mai te eunuke, “E mafai vēhea nei ke mālamalama au kāfai e hēai he tino ke fakamālamalama mai e ia kia te au?” Na lea ai loa kia Filipo ke hopo ake ke nonofo fakatahi kilāua i loto o te kaliota. 32Ko te vāega o te tuhituhiga paia nae faitau e te eunuke, ko tēnei: #Iha 53.7-8 (LXX)
“E vē he māmoe e takitaki ke tāmate;
e vē he punuāmāmoe e fakalologo
i te taimi e hele ai ona fulufulu;
oi e hēki matala lele tona gutu.
33Na fakamāhiahigia ia, ma hēai he tino
ke tū mo ia i tona fakamahinoga.
E hēai he tino ke fakailoagia e uiga ki ona lāpuna,
auā ko tona ola i te lalolagi kua fakamuta.”
34Oi na lea atu ai te eunuke kia Filipo, “Taku mai ake pe ko ai te fakatatau ki ei te kupu a te pelofeta? E fakatatau nei kia te ia lava, pe ki hetahi tino?” 35Oi na kāmata ai kua tautala ia Filipo; mai te vāega tēnei o te tuhituhiga paia, na fakamatala e ia ki te eunuke te Tala Lelei e uiga kia Iehu. 36Ka koi fakaauau te malaga i luga o te auala, oi na tau atu ai ki he koga nae iei ni vai, ma na lea vē atu ai te eunuke, “Kikila, iēnā nā vai! Heā te hē mafai ai au ke papatiho?” 37#8.37 Ko iētahi tuhituhiga e fakaopōpo ki ei te fuaikupu e 37: Kua lea atu ia Filipo ki ei, “E mafai koe ke papatiho, kāfai koe e talitonu ma tō loto kātoa.” Kua tali mai ia, “Io, ko au e talitonu ko Iehu Keliho ko te Ataliki o te Atua.”
38Na fakatonu loa e te eunuke ke fakatū te kaliota, oi na olo ai ia Filipo ma te eunuke ki loto o te vai, ma na papatiho ai e Filipo te eunuke. 39I te oakega o kilāua ki luga mai te vai, oi na kave ai ia Filipo e te Agaga Paia. E hēki toe kitea e te eunuke ia Filipo, ma na fakaauau ai pea i tona auala ma tona loto kua tumu i te fiafia. 40Na hāfia e Filipo ko ia kua i Ahotu; oi na fano ai oi kui loto atu i nā kakai uma ke pa ki Kaihaleia, ma folafola atu te Tala Lelei.
Bible Society New Zealand Charitable Trust