Gāluega 10
10
Kua Āhiahi ia Petelu kia Konelio
1Nae iei he tamāloa i Kaihaleia nae igoa kia Konelio, he takitaki i te kautau a Loma nae takua ko te “Kautau mai Italia.” 2Ko he tino nae mataku i te Atua; ko ia ma tona kāiga kātoa nae tāpuaki ki te Atua. E lahi foki ana mea nae fai ke fehoahoani ai ki nā tino Iutaia mātitiva, ma nae tatalo pea lava ki te Atua. 3E tuha pe ko te tolu i te afiafi, na kitea manino ai e ia he fakaaliga, ko he āgelu a te Atua kua ulu mai ki te fale ma lea vē mai kia te ia, “Konelio!”
4Na pupula ki ei ona mata i tona mataku, ma na tali vē atu ai ki ei, “Te aliki, e iei he mea e fofou koe ki ei?”
Na tali mai te āgelu, “Ko te Atua e fiafia ki au tatalo ma ia kitea au gāluega alofa ki tagata mātitiva, ma kua hāuni ke tali mai kia te koe. 5Uga ni tāulelea ki Iopa ki he tino e igoa kia Himona Petelu. 6E i te fale o Himona, he tino galue pakumanu, ma e pili tona fale ki te tai.” 7I te fano kehega o te āgelu, oi na kalaga ai ia Konelio ki ni kaukauna fakamoemoegia e toka lua a ia ma he fitafita, he tino kua talitonu ki te Atua ma ko hētahi ia o nā tino nae fehoahoani ake kia te ia. 8Kua taku e ia kia te kilātou te mea na tupu, ma na uga ai kilātou ke olo ki Iopa.
9I te aho alafaki, ka koi i luga kilātou o te auala ma kua tafapili atu ki Iopa, na fano ai ia Petelu ki luga o te tuāfale i te taimi kua tutonu ai te lā, ke tatalo ai. 10Na lagona e ia te fia kaia; ma ka koi tapena mai tana katiga kae na ia kitea he fakaaliga. 11Na kitea atu e ia te lagi kua māvā, ma he mea e vē he kiekafu lahi lele e fanaifo ki lalo, e tukutuku ifo ki te laukelekele i ona pito e fa. 12I loto o te kiekafu, nae iei ai nā itūkāiga manuvaefa uma, nā manu fetolofi, ma nā manulele. 13Oi na lea vē ifo ai he leo kia te ia, “Petelu, tū ki luga oi tāmate ma kai nā manu iēnei!”
14Kae na lea vē atu ia Petelu, “Te Aliki, e hē kō faia he mea vēnā. Ko au e hēki kai lele ki he mea e hē mamā i nā tu tau tāpuakiga, pe hē tatau ke kai au ki ei.”
15Na toe lea vē ifo te leo, “Ho he mea kua fakailoa mai e te Atua e mamā, e hē tatau ke lea koe e hē mamā.” 16Na fakatolu lava ona fakatonu vēnei ia Petelu e te Atua, oi na toe kavake ai te mea tēnei ki te lagi.
17Ka koi māfaufau ia Petelu pe ko heā te uiga o te fakaaliga tēnei, ko nā tāulelea na uga e Konelio ma nae kilātou hakilia te fale o Himona, kua tutū i mua o te faitotoka o te fale i te taimi lava tēnā. 18Na kālalaga vē atu ai kilātou, “E nofo i kinā he tino e igoa kia Himona Petelu?”
19Nae tau māfaufau lava ia Petelu pe ko heā te uiga o te fakaaliga, kae na vāgana mai kia te ia te Agaga Paia, “Kikila, e toka tolu#10.19 toka tolu ko iētahi tuhituhiga e leamai nā tino e fokotahi e leamai toka lua ia tāulelea e kilātou hakilia koe. 20Ko te mea ia, tū loa ki luga oi fano ki lalo, ma ia koe nahe fakanofonofo ke olo koutou ma nā tāulelea, auā na kō uga atua kilātou.” 21Oi na fano ai ia Petelu ki lalo ma na lea vē atu ai ki nā tāulelea, “Ko au te tino e koutou hakilia. Heā te na ōmamai ai koutou?”
22Na tali mai kilātou, “Ko kimātou na uga mai e Konelio, he takitakikau Loma. Ko he tino lelei e tāpuaki ki te Atua ma e taku leleia e tagata Iutaia uma. Na fakatonu e he āgelu a te Atua ke valakaulia koe ki tona fale, kae ke mafai ke fakalogo ia ki nā mea e tautala ai koe.” 23Oi na lea ai ia Petelu ki nā tāulelea ke mapu ake ki loto o te fale ke mālōlō ai i te pō tēnā.
I te aho alafaki na hāuni ai ia Petelu, ma na olo ai ma nā tāulelea; na olo fakatahi ai foki ma iētahi tino kua talitonu ki te Aliki, mai Iopa. 24I te aho na hohoko ai, na taunuku ai ia Petelu ki Kaihaleia ki te mea nae fakatali mai ai ia Konelio ma ni tino o tona kāiga, vēnā ma ni uō mamae na ia valakaulia. 25Kua havali atu ia Petelu ka ulu ki te fale, kae na fakafeiloaki mai e Konelio, kua fakapakū ki ona vae, ma ifo atu kia Petelu. 26Kae na tago atu ia Petelu kua fakatū ki luga ma lea vē atu ki ei, “Tū ki luga! Ko au he tagataola e vē foki lava ko koe.” 27Nae tautala lava ia Petelu kia Konelio ma havali ki loto o te fale, ma na ia kitea atu ai te tokalahi o nā tino kua fakapotopoto i kinā. 28Oi na lea vē atu ai ia kia te kilātou, “E iloa lelei lava e koutou e hē fakatagagia he tino Iutaia e tana tāpuakiga, ke āhiahi pe ke fai mea fakatahi ma he tino nukukehe. Kae kua fakaali mai e te Atua, e hē tatau au ke manatu e iei he tino e hē mamā pe kino. 29Ma i te kalaga atuga o koutou ko au ke hau, na tū ake lava au oi hau e aunoa ma hoku fehili. Ko au la e fehili atu pe ko heā te na kalaga atu ai koutou ko au ke hau.”
30Na tali atu ia Konelio, “E tuha kua tolu ia aho kua teka, i te taimi foki lava tēnei ka koi tatalo au#10.30 tatalo au ko iētahi tuhituhiga e lea mai fakalāina ma tatalo au i toku fale i te tolu i te afiafi. Kae nā lava e teki ko he taulealea e kofu pupula kua tū mai i oku mua 31ma lea vē mai, ‘Konelio! Kua lagona e te Atua au tatalo, ma ia kitea au gāluega alofa ki tagata mātitiva. 32Uga he tino ki Iopa ki he tino e igoa kia Himona Petelu. E i te fale o Himona, he tino galue pakumanu, ma e pili tona fale ki te tai.’ 33Oi na fekau atu ai loa lava koe i te taimi tēnā, ma kua alofa ai koe ma hau. I te taimi la tēnei, ko kimātou uma kua i kinei i mua o te Atua, e fakatalitali ke fakalogo kimātou ki ho he mea lava kua fakatonu atu e te Aliki, ke tautala ai koe.”
Ko te Lāuga a Petelu
34Ma na kāmata ai oi tautala vēnei atu ia Petelu: “Kua mautinoa e au i te taimi nei ko te Atua e hē fakapito ki he tino.#Teu 10.17 35Ko nā tino e tāpuaki ki te Atua ma kilātou faia te mea e tonu, e talia kilātou e ia, e tuha lava pe ko fea te mālō e ōmamai ai. 36Kua koutou iloa te fekau na ia kaumaia ki tagata o Ihalaelu, na folafola ai te Tala Lelei o te fīlēmū e ala ia Iehu Keliho, te Aliki o tagata uma. 37Kua koutou iloa te mea lahi na tupu i luga o te fenua kātoa o tagata Iutaia, kāmata mai i Kalilaia, i te umaga o te papatihoga na tālaki e Ioane. 38Kua koutou iloa te tala kia Iehu te Nahaleta, i te liligi ifoga e te Atua ki ona luga o te Agaga Paia ma te mana. Na fano ki nā koga kehekehe, ma na ia faia nā gāluega lelei ma fakamālōlō kilātou nae i lalo o te pule a te Tiāpolo, ona nae fakatahi te Atua ma ia. 39Ko kimātou ni molimau ki nā mea uma na ia faia i te kakai ko Ieluhalema, ma iētahi vāega o te fenua o tagata Iutaia. Na kilātou tāmatea i te tutukiga e kilātou o ia ki te hātaulo. 40Kae na toe fakatū e te Atua mai te oti i tona tolu o aho, ma ko tona lava finagalo ke fakakitea ia Iehu, 41e hē ki tagata uma, kae kia te kimātou oioti kua uma te filifilia e te Atua ke fai ma molimau—kimātou iēnei nae kakai ma inu fakatahi ma ia talu tona toetū mai te oti. 42Ma na fakatonu mai kimātou e Iehu ke tālaki te Tala Lelei ki tagata, ma ke molimau ko ia te kua tōfia e te Atua ke fai ma fakamahino o nā tino koi ola, vēnā ma kilātou kua oti. 43Ko ia te na molimau ai te kau pelofeta uma, ko nā tino uma e talitonu kia te ia, ka fakamāgalo a lātou agahala, e ala i te mana o tona igoa.”
Kua Fanaifo te Agaga Paia ki luga o Tagata Nukukehe
44Ka koi tautala ia Petelu, kae kua fanaifo te Agaga Paia ki luga o kilātou uma nae fakalogologo ki te fekau. 45Na ofo lele nā tino Iutaia kua talitonu ki te Aliki, iēia na ōifo ma Petelu mai Iopa, ona e pa foki lava ki tagata nukukehe, kua liligi ifo e te Atua tana meālofa ko te Agaga Paia, ki o lātou luga. 46Auā na kilātou lagona atu kua tautatala i ni gagana kehekehe, ma viviki atu ki te hilihili kehe o te Atua. Ma na lea vē atu ai ia Petelu; 47“Ko nā tino iēnei kua kilātou maua te Agaga Paia, e vē foki lava ona kimātou mauagia. E mafai la e he tino oi tāofi ke nahe papatihoa kilātou i te vai?” 48Oi na fakatonu ai loa e ia ke papatiho ia Konelio, tona kāiga ma ana uō, i te igoa o Iehu Keliho. Oi na talohaga ai kilātou kia Petelu ke toe nofo mo ni nāi aho.
Bible Society New Zealand Charitable Trust