Gāluega 24
24
Ko nā Mōliaga o Paulo
1Kua teka nā aho e lima, oi na olo ai ia Anania te Ulu Ohitāulaga ma ni toeaina, ma he loia nae igoa kia Tetulo ki Kaihaleia. Kua tutū kilātou i mua o Felihe, ma na fai ai a lātou mōliaga e uiga kia Paulo. 2Oi na fekau ai ia Paulo ke hau ki loto, ma na kāmata ai loa oi tōlaulau e Tetulo nā mōliaga, e vēnei:
“Tau Afioga te Kōvana! Ko te lelei o tau takitakiga kua maua ai e kimātou te fīlēmū mo he taimi mataloa, ma e lahi na hūiga tāua e fai mo te lelei o to mātou nuku. 3E talia ma te fiafia e to mātou nuku kātoa nā mea iēnei ma ko taimi uma lava, e lagona e kimātou te agaga fakafetai kia te koe. 4E hē fofou au ke fakalavelave atu ki tō taimi, kae ko au e fakatagi atu ke mafai ho taimi ke fakalogo ai koe ki ta mātou fakamatalaga pukupuku. 5Kua maua e kimātou ko te tagata tēnei, he tino e fakapokepoke ma fakatupu fakalavelave; kua fakatupu e ia nā vevehitū i te mea e iei ia tagata Iutaia i te lalolagi kātoa, ma ko ia foki ko he takitaki o te vāega a te kau ha-Nahaletā. 6-8Na taumafai foki ia ke fakakino te paia o te Mālumalu, kae na puke e kimātou.#24.6 Ko iētahi tuhituhiga kua leva e fakaopōpo ki ei nā fuaikupu 6e-8a: Na mea ka fai e kimātou tona fakamahinoga e tuha ai ma a mātou tūlāfono, 7 kae kua hau te takitakikau ko Luhia oi kave kehe fakamālohi te tagata tēnei mai ia te kimātou. 8 Oi fai ai te fakatonuga a Luhia, ko nā tino kua mōlia e kilātou te tagata tēnei, e tatau ke ōmamai ki mua o koe Kāfai koe e fehili ki te tagata tēnei, oi ka mafai ai ke iloa e koe mai ia te ia, nā mea uma kua mōlia ai ia e kimātou.” 9Na kaukau fakatahi foki nā tino Iutaia ki nā mōliaga tēnei, ma na lea ai ko nā mea uma iēnei e hako.
Kua Tali atu ia Paulo ki Ona Mōliaga i mua o Felihe
10Oi na geno atu ai te kōvana kia Paulo ke tautala ma na lea vē atu ai ia Paulo:
“Ko au e fiafia oi tali atu ki nā mōliaga o oku, auā e iloa e au ko koe ko te fakamahino o te nuku kātoa tēnei mo ni tauhaga e lahi. 11E vē ona iloa e koe, ko hēki hili atu i te hefulu lua aho talu toku fano ki Ieluhalema ke tāpuaki ai. 12E hēki maua au e nā tino Iutaia e fai fīnauga ma he tino e fokotahi i loto o te Mālumalu, pe na kilātou maua au e fakatupu vevehi ki tagata i loto o nā hūnako, pe i ho he koga i loto o te kakai. 13E hē kilātou mafaia foki oi tuku atu kia te koe he fakamāoniga o a lātou mōliaga kua fai mai nei e uiga kia te au. 14Kae ko au e io atu kia te koe i te mea tēnei: Ko au e tāpuaki ki te Atua o nā tupuna o kimātou, e ala i toku mulimuli ki te Ala o te Aliki, tēia e lea kilātou e hehē. Ko au foki e talitonu ki nā mea uma e tūhia i te Tūlāfono a Mohe, vēnā ma nā tuhi a te kau pelofeta. 15E ia te au te fakamoemoe ki te Atua e vē foki lava ko te fakamoemoe o kilātou e uiga ki te mea tēnei: ko tagata uma lele, nā tino āmiotonu ma nā tino e hē āmiotonu, ka toe tutū uma mai i te oti. 16Ma ko au la e taumafai i taimi uma ki te mea e gata mai ai toku mafai, ke mamā toku lotofuatiaifo i mua o te Atua ma tagata.
17“Ina kua teka ni nāi tauhaga talu toku fano kehe ma Ieluhalema, oi na toe fano ai au ki ei oi kave ni tupe ki oku tagata Iutaia, ma ke ofo ni tāulaga.#Gāl 21.17-28 18Ka koi fai e au te mea tēnei i te Mālumalu, kae maua ake au e kilātou, ka kua uma ai te fakatāunuku e au o te hāuniga o te fakamamāgia. Nae hēai he kaifenua nae iei ma au, nae hēai foki he vevehi. 19Kae nae i kinā ni tino Iutaia mai te itūmālō o Ahia; ko kilātou iēnā te na tatau ke kaumai ki mua o koe ke fakailoa atu a lātou mōliaga, pe kāfai e iei haku mea hehē na fai. 20Pe lea foki lava ki nā tino iēnei i kinei, pe ni holitūlāfono vēhea te na kilātou fakahalagia ai au, i toku kavega ki mua o te Taupulega— 21vāganā ai te mea e fokotahi tēnei na kalaga ai au i toku tūga i mua o kilātou: ‘Ko au kua fakamahino e koutou i te aho nei, ona ko toku talitonuga ko nā tino kua oti e toe tutū mai ki te ola.’ ” #Gāl 23.6
22Ko Felihe nae mālamalama lele i nā fakamatalaga e uiga ki te Ala o te Aliki, oi na fakaiku ai e ia te fakamahinoga. Kua lea vēnei atu kia te kilātou “Kāfai e pa mai ia Luhia te takitakikau, oi kua fai ai taku fakaikuga.” 23Oi na fakatonu ai e ia te ōfiha e kikilāgia ia Paulo, ke leoleo pea ia Paulo kae ke tuku ki ei ni fakatagaga i loto o te falepuipui, ma ke fakataga foki ana uō ke fehoahoani ki ei i ho he mea e ia fia mauagia.
Ko Paulo i mua o Felihe ma Tuluhila
24Kua teka atu ni nāi aho, oi na ōmamai ai ia Felihe ma tana āvaga ko Tuluhila, he fafine Iutaia. Na fekau e ia ia Paulo, oi na fakalogologo ai kae kua tautala ia Paulo e uiga ki te fakatuatua kia Keliho Iehu. 25Ka koi tautala ia Paulo e uiga ki te āmiotonu, te loto pūlea, ma te aho e fakamahino ai e te Atua ia tagata uma, kae ko Felihe kua mataku ma na lea vē atu ai kia Paulo, “Fano loa nei oi kua toe fekau atu ai koe e au kāfai e maua hoku avanoa.” 26I te taimi foki tēnā, na fofou lele ke fōki ake ni ana tupe e Paulo; ko te mea ia nae tūfekau ho ai e ia ia Paulo, ke faitatala kilāua.
27Kua teka atu nā tauhaga e lua, oi na hui ai ia Felihe e Pokiono Fehetone ke fai ma kōvana. Ko te fialelei o Felihe ki nā tino Iutaia, na ia tukua ai ia Paulo i te falepuipui.
Bible Society New Zealand Charitable Trust