Gāluega 25
25
Kua Fakatagi ia Paulo ke Fakamahino Ia e te Kaihala
1Kua tolu ia aho talu te pa mai o Fehetone ki te itūmālō, oi na fanatu ai mai Kaihaleia ki Ieluhalema. 2I kinā na fakailoa ai kia Fehetone e nā ohitāulaga pule ma nā takitaki o Iutaia e uiga kia Paulo. Kua fakatagi kilātou kia Fehetone 3ke kavaifo ia Paulo mai Kaihaleia ki Ieluhalema, ona kua uma te taupulepule o kilātou ke tāmatea ia Paulo i te auala kāfai e kavaifo. 4Na tali atu ai ia Fehetone kia te kilātou, “Ko Paulo e tāofi fakapāgotā nei i Kaihaleia, ma ko au e tuku e toe foki ki ei i he taimi pili mai. 5Ōmamai la nā takitaki o koutou ke olo fakatahi kimātou ki Kaihaleia ma kāfai e iei he mea hehē a Paulo na fai, oi kua fai ai loa te lātou mōliaga.”
6Na nofo ia Fehetone i Ieluhalema mo hētahi valu pe he hefulu aho, oi na fano ai ki Kaihaleia. I te aho na hohoko ai, na nofo ai i tona nofoa fakamahino, ma na fakatonu ai e ia ke kaumai ia Paulo ki loto. 7I te pa maiga o Paulo, oi na ōmamai ai nā tino Iutaia na ōifo mai Ieluhalema kua tutū i tafa o Paulo ma na kāmata ai oi fai a lātou mōliaga mamafa e lahi e uiga kia Paulo, kae na hēki kilātou mafaia oi tuku atu ni fakamāoniaga mo a lātou mōliaga. 8Kae na tali vē atu ia Paulo: “E hēai haku mea e fokotahi kua fai e hē tuha ai ma te Tūlāfono a Iutaia, pe teteke ai ki te Mālumalu pe ki te Kaihala o Loma.”
9Kae ko Fehetone nae fia lelei ki nā tino Iutaia, ko te mea ia na fehili vē atu ai kia Paulo, “E fia fano la koe ki Ieluhalema ke fakamahino ai koe i nā mōliaga iēnei kua kaumai kia te au?”
10Na tali atu ia Paulo, “Ko au e i mua nei o te fakamahinoga a te Kaihala, te mea e tatau ke fakamahino ai au. E hēai he mea hehē kua kō faia ki nā tino Iutaia, e vē ona iloa lelei lava e koe. 11Kāfai kua kō holia te tūlāfono ma kō faia he mea kua tatau ai au ke fakahala i te oti, ko au e hē lea atu ke fakahao au mai te oti. Kae kāfai ko oku mōliaga kua kilātou faia e hē fakamāonia, oi e hēai he tino e ia mafaia oi tuku atu au ki o lātou lima. Ko au la e fakatagi atu ke kave au ke fakamahino e te Kaihala.”
12Ina kua uma te talanoa o Fehetone ki ana tino faufautua, oi na tali vē atu ai, “Ko koe kua fakatagi mai ke kave koe ke fakamahino e te Kaihala, oi ko koe la ka kave ki te Kaihala.”
Kua Kave ia Paulo ki mua o Akalipa ma Penihe
13Kua teka atu pe he lua vaiaho, kae kua ōifo te Tupu ko Akalipa#25.13 Akalipa pe Helota Akalipa 11 ma Penihe ki Kaihaleia oi āhiahi kia Fehetone. 14Kua kātoa ni nai aho talu te i kinā, oi na fakamatala ai e Fehetone ki te tupu e uiga ki te mōliaga o Paulo ma tana fakatagi ke kave tona fakamahinoga ke fai e te Kaihala: “E iei he tino i kinei na tuku i te falepuipui e Felihe; 15ma i toku fanoga ki Ieluhalema, na kaumai ai nā mōliaga o ia e nā ohitāulaga pule ma nā toeaina o Iutaia, ma na lea mai kia te au ke fakahala. 16Kae ko au na lea ki ei, ko kitātou nā tino Loma e hē māhani oi tuku atu he tino kua mōlia i he holitūlāfono ke fakamahino, kae ko hēki fakafehāgai ki nā tino na kilātou faia te mōliaga, ma tuku ki ei he avanoa ke tali atu ai ki ona mōliaga. 17I te ōmamaiga la o kilātou ki kinei, ko au e hēki toe fakatali; na nofoia loa lava e au te nofoa fakamahino i te aho na hohoko ai, ma fakatonu ke kaumai te tino tēnei. 18Na tutū ki luga nā tino nae teteke kia te ia, kae e hēki kilātou mōliagia ia i he holitūlāfono e fokotahi, e vē ona manatu au e kilātou tuku maia. 19Oioti lava te mea na kilātou taku maia, ko a lātou fefīnauakiga ma tē kua kilātou mōlia e uiga ki te lātou tāpuakiga ma e uiga ki he tino e igoa kia Iehu kua oti; kae e lea ia Paulo koi ola. 20Nae hē mautonu au pe maua vēhea e au ni fakamatalaga e uiga ki nā mea iēnei, ko te mea ia na lea ai au kia Paulo, pe i na malie ia ke kave ia ki Ieluhalema ke fai ai tona fakamahinoga i nā mōliaga iēnei. 21Kae kua kaumai tana fakatagi ke tuku pea ia ki lalo o te leoleoga a nā fitafita, ma ke kave ia ke fakamahino e te Kaihala. Oi na fakatonu ai e au nā fitafita ke leoleo ia Paulo ke pa ki te aho kua fuafua e au, e kave ai ki te Kaihala.”
22Kua lea atu ia Akalipa#25.22 kikila ki te 25.13 kia Fehetone, “Ko au e fia fakalogo ki te tino tēnei.”
Na tali mai ia Fehetone, “Ko tāeao la ka fakalogo ai koe kia te ia.”
23I te aho na hohoko ai, na olo ai ia Akalipa ma Penihe ki loto o te fale lahi nae fai ai te fakamahinoga, fakatahi ma nā takitakikau ma nā takitaki o te kakai, ma na fai ki ei nā fakaaloaloga mamalu. Oi na fakatonu ai e Fehetone ke kaumai ia Paulo. 24Kua lea atu ia Fehetone, “Akalipa#25.24 kikila ki te 25.13 te Tupu, ma koutou uma kua i kinei fakatahi kitātou: Tēnā kua kikila koutou ki te tino kua kaumai ai nā fāitioga kia te au a nā tino Iutaia uma i kinei vēnā ma i Ieluhalema. Nae taukālalaga kilātou ko ia tēnei e he tatau ke ola. 25Kae e hēai he mea na kō maua na ia faia, e tatau ai ke fakahala i te oti. Kae ona kua fakatagi mai ko ia ke kave ke fakamahino e te Kaihala, kua tonu ai ia te au ke kave ki ei. 26Kae e hēai he mea e mautinoa e tuha ai ma tona mōliaga, ke tuhi ki lalo mo te Kaihala. Ko te mea ia kua kō kaumaia ai ia ki mua o koutou—kae maihe lava ki mua o koe te Tupu ko Akalipa!—kae ke maua ai he fakamatalaga ke fakamau ki lalo, kāfai e uma te hukehuke o ia. 27Auā e hē he mea tatau i taku kikila, ke kave he pāgotā kae e hēai he fakamatalaga manino, ke kitea ai nā mea kua mōlia ai.”
Bible Society New Zealand Charitable Trust