Gāluega 23
23
1Na kikila hako atu ia Paulo ki te Taupulega, ma na lea vē atu ai ki ei, “Te kau uho! Ko toku lotofuatiaifo e mamā, e tuha ai ma te olaga kua ola ai au i mua o te Atua, ke pa mai lava ki te aho nei.” 2Oi na fakatonu ai e te Ulu Ohitāulaga ko Anania nā tino nae tutū i tafa o Paulo, ke po te gutu o Paulo. 3#Mat 23.27-28Ma na lea vē atu ai ia Paulo kia Anania, “Ka mautinoa lava te taia o koe e te Atua—ia koe tēnā e vē he puipui kua vali ke fakapaepae! E nofo mai koe i kinā ke fakamahino mai au e tuha ai ma te Tūlāfono, kae kua holi foki lava e koe te Tūlāfono i tau fakatonuga ki nā tino ke po au!”
4Kua lea vē mai nā tino nae i tafa o Paulo, “Ko koe kua fai kupu kino ki te Ulu Ohitāulaga a te Atua!”
5Oi na tali vē atu ai ia Paulo, “Oku uho Ihalaelu, e hē kō iloa ko ia ko te Ulu Ohitāulaga. E lea mai te tuhituhiga paia, ‘Ia koe nahe fai kupu kino ki te takitaki o tagata o tō nuku.’ ” #Eho 22.28
6Kua kitea atu e Paulo ko iētahi tino o kilātou ni Falehaio ma ko iētahi ni Hatukaio, oi na kalaga atu ai i loto o te fono, “Oku uho Ihalaelu! Ko au he Falehaio, te ataliki o ni Falehaio. Ko au e i mua o te fakamahinoga tēnei, ona ko te fakamoemoe o oku ko nā tino kua oti ka toe fakatutū e te Atua ki te ola!” #Gāl 26.5; Fil 3.5
7Na uma lava te lea vēnei atu o Paulo, oi na kāmata loa oi fai na fīnauga i te vā o te kau Falehaio ma te kau Hatukaio, ma na vāelua ai te potopotoga. 8(Auā nae lea te kau Hatukaio ko nā tino e hē toe tutū mai i te oti, ma e hēai ni āgelu pe ni agaga; kae ko te kau Falehaio nae talitonu ki nā mea uma e tolu iēnei.)#Mat 22.23; Mlk 12.18; Luk 20.27 9Kua fakalalahi te piha, oi na tutū ai ki luga iētahi faiākoga o te Tūlāfono i te itū o te kau Falehaio, kua fāitio lahi lele ma lea vē atu: “E hēai he mea kua kimātou maua e hala ai te tagata tēnei! Hōvē moni he agaga pe he āgelu na tautala kia te ia!”
10Kua matuā fakalalahi lele nā fīnauga, ma na popole lele ai te takitakikau nā ia Paulo e hae likilikia e tagata. Ko te mea ia na ia fakatonua ai ana fitafita, ke olo oi kave kehe mai ia Paulo, ma kave ki te olo.
11I te pō tēnā, na tū ai te Aliki i tafa o Paulo ma vāgana vē atu ki ei, “Ia koe nā mataku! E vē ona molimau koe e uiga kia te au i kinei i Ieluhalema, e tatau foki ke kē faia te mea tēnei i Loma.”
Kua Lama ia Paulo ke Tāmate
12I te tāeao na hohoko ai, na fono fakatahi ai ni tino Iutaia ma na fai ai te lātou tonu. Na fai te lātou tautōga ko kilātou e hē kakai lele pe inu, heiloga ko Paulo kua tāmate e kilātou. 13E hili i te toka fa hefulu kilātou na taupulepule fakatahi. 14Oi na olo ai ki nā ohitāulaga pule ma nā toeaina oi lea vē ki ei, “Kua fai te mātou tautōga fakatahi, e hēai he tino o kimātou e kai heiloga kua tāmate e kimātou ia Paulo. 15E vēnei la, kave he fekau mā koutou ma te Taupulega ki te takitakikau Loma, ke kavaifo ia Paulo kia te koutou, ma fakatagāfai ki ei ko koutou e fofou ki ei ona e fia koutou mauagia ni iētahi fakamatalaga hako e uiga ki ei. Kae ka hāuni kimātou ke tāmate ka ko hēki pa mai ki kinei.”
16Kae na lagona e te ataliki o te tuafafine o Paulo na taupulepulega iēnei; oi na fano ai ki te olo ma taku kia Paulo. 17Oi na kalaga ai ia Paulo ki hētahi o nā ōfiha ma na lea vē atu ai ki ei, “Kave te taumalo tēnei ki te takitakikau; e iei te mea e fia lea ai ki ei.” 18Oi na kave ai e te ōfiha te taumalo ki te takitakikau ma na lea vē atu ki ei, “Ko Paulo te pāgotā, na kalaga mai kia te au ke kaumai te taumalo tēnei kia te koe, ona e iei he mea e fia lea atu ai kia te koe.”
19Na puke atu loa lava te takitakikau ki te lima o te taumalo, kua tataki kehe e ia, ma na fehili vē atu ai ki ei, “Heā te fia lea mai ai koe kia te au?”
20Na tali atu te taumalo, “Kua fai te tonu a nā takitaki Iutaia, ke talohaga atu kia te koe tāeao ke kavake ia Paulo ki lalo ki te Taupulega, ma ke fakatagāfai vē ko kilātou e fofou ki ni fakamatalaga e hili atu te hako e uiga ki te ia. 21Kae ia koe nā fakalogo ki ei, auā e hili atu i te toka fa hefulu o tāulelea ka mumuni ke fakatali mai kia te ia. Kua fai te lātou tautōga e hēai he tino e kai pe inu, heiloga kua kilātou tāmatea ia Paulo. Kua hāuni mai nei ke fakatāunuku te mea tēnei, kae e fakatalitali pe vēhea tau tonu e fai.”
22Oi na lea atu ai te takitakikau ki ei, “Nahe kē lea lele ki he tino ko koe kua lea mai kia te au e uiga ki te mea tēnā.” Ma na uga ai e ia te taumalo ke fano.
Kua Kave ia Paulo ki Mua o te Kōvana ko Felihe
23Oi na fekau ai e te takitakikau nā tino ōfiha a ia, ma na lea vē atu ai ki ei, “Hāuni ni fitafita e toka lua helau ke olo ki Kaihaleia fakatahi ai ma ni fitafita tiketike holofanua e toka fitu hefulu, ma he lua helau fitafita e fakakaukupega i nā tao, ma hāuni ke teka kehe i te iva i te pō nei. 24Hāuni ni holofanua ke tiketike ai ia Paulo, ma ke mautinoa ko Paulo e taunuku ma te haogalēmū ki te Kōvana ko Felihe.” 25Oi na tuhi ai te tuhi a te takitakikau e vēnei:
26“Mai ia Kalautioho Luhia ki te Afioga a Felihe te kōvana: E fakatālofa atu kia te koe. 27Ko te tagata tēnei na puke e nā tino Iutaia ma na mea lava ka tāmate e kilātou. Na maua e au te fakamatalaga ko ia nei ko he tagatānuku Loma, oi na olo ai loa kimātou ma aku fitafita oi lāveaki. 28Na kō fia iloagia pe heā te holitūlāfono kua mōlia ai ia e kilātou, oi na kave ai e au ki lalo ki te lātou Taupulega. 29E hēki maua e au e iei hana mea na fai e tatau ai ke fakahala oti, pe falepuipui; ko te mea na mōlia ai he mea lava tau ki te lātou tūlāfono. 30Ma i te kō iloaga kua lemati e nā tino Iutaia ke tāmate, oi na tonu ai loa lava ia te au ke kavatu kia te koe. Kua uma toku lea ki nā tino na kilātou mōliagia, ke o atu kia te koe ma ta lātou mōliaga.”
31Na fai e nā fitafita e vē ona fakatonu ai kilātou. Na kave e kilātou ia Paulo i te pō tēnā ke pa lele ki Anipatelihi. 32I te aho alafaki na toe foki mai ai nā fitafita hāvavali ki te olo, kae kua tuku ki nā fitafita tiketike holofanua ke olo ma Paulo. 33Kua pa atu kilātou ki Kaihaleia, oi na fōki ai te tuhi ki te kōvana ma na tukulima atu ai foki ma Paulo kia te ia. 34Na faitau te tuhi e te kōvana, oi na fehili ai kia Paulo pe ko te fea te itūmālō e hau ai ia. I te ia iloaga ko Paulo e hau mai Kilikia, 35oi na lea vē atu ai kia Paulo, “Ko au ka fakalogo ki nā mōliaga o koe, kāfai nā tino na kilātou mōlia koe e taunuku mai.” Oi na fakatonu ai e ia nā fitafita ke leoleo ia Paulo, i te fale o te kōvana.
Bible Society New Zealand Charitable Trust