Gāluega 22
22
1“Te kau uho ma oku tamana Iutaia, fakalogo mai ake ke fai atu taku fakamatalaga, ke kitea ai e koutou e hēai haku mea hehē na fai!” 2I te kilātou lagona atuga ko Paulo e tautala ake i te gagana Epelu, oi na fakaātili ai to lātou hē piha; ma na fakaauau ai lava te tautalaga a Paulo:
3“Ko au he tino Iutaia, na fānau i Taheha i Kilikia, kae ko au na ola ake i kinei i Ieluhalema, ma na akoakogia lelei au e Kamalielu e tuha ai ma te Tūlāfono na tuku mai ki o tātou tupuna, ma ko au e tautua mālohi ki te Atua, e vē foki ko koutou uma e i kinei i te aho nei.#Gāl 5.34-39 4Ko au nae fakahāuā lahi ki nā tino nae mulimuli ki te Ala,#22.4 Ala pe Ala o te Aliki (kikila ki te 9.2) ma na feoti ai lava ni tino o kilātou. Nae puke e au nā tāulelea vēnā ma fafine ma togi ki te falepuipui.#Gāl 8.3; 26.9-11 5E mafai ke fakamāonia e te Ulu Ohitāulaga ma te Taupulega kātoa, te mea tēnei kua lea atu ai au. Na fōki mai e kilātou kia te au ni tuhi na tuhi ki nā uho Iutaia i Tamaheko, ma na fano ai au ki kinā ma toku fakamoemoe ke puke e au nā tino iēnei ma noanoa, oi kaumai ai ki Ieluhalema ke fai ai o lātou fakahalaga.
Kua Tautala ia Paulo e Uiga ki Tona Liliuga ma Mulimuli ki te Aliki
(Gāl 9.1-19; 26.12-18)
6“Ka koi malaga au i luga o te auala ma kua tafapili atu ki Tamaheko, i te taimi tēnā pe ko te tūpou o te lā, kae nā lava e teki ko he mālama lahi mai te lagi kua huhulu ifo fakatakamilo ia te au. 7Na pakū au ki te kelekele ma na kō lagona atu ai he leo e lea vē mai kia te au, ‘Haulo, Haulo! Heā te kua fakahāuā mai ai koe kia te au?’ 8Oi na fehili ai au, ‘Te Aliki, ko ai koe?’ Na tali vē mai ia, ‘Ko au ko Iehu te Nahaleta, tē kua fakahāuā koe ki ei.’ 9Na kitea e nā tāulelea na malaga fakatahi ma kimātou te mālama, kae na hēki kilātou lagona te leo o te tino na tautala mai kia te au. 10Na fehili atu au, ‘Te Aliki, heā ta aku e tatau ke fai?’ oi na vāgana vē mai ai te Aliki kia te au, ‘Tū la ki luga oi fano ki Tamaheko. I kinā ka taku atu ai kia te koe nā mea uma kua fuafua e te Atua ke kē faia.’ 11Na tāuaho oku mata ona ko te mālohi o te pupula o te mālama, oi na takitaki ai au i toku lima ki Tamaheko e nā hoa o oku.
12“Nae i te kakai tēnā he tino nae igoa kia Anania; ko he tino lotu nae uhitaki ki te tātou Tūlāfono, ma nae fakaaloalogia lahi lele e nā tino Iutaia nae nonofo i kinā. 13Na hau kia te au, kua tū mai i oku tafa ma na lea vē mai ai, ‘Haulo toku uho, pupula loa nā mata o koe!’ I te taimi lava tēnā, na toe pupula ai oku mata, ma na kikila ai au kia te ia. 14Oi na lea vē mai ai, ‘Ko te Atua o nā tupuna o kitātou, kua ia filifiliagia koe ke kē iloa te mea e fofou ia ki ei, ke kē kitea tana Kaukauna āmiotonu, ma ke kē lagona tona lava leo e tautala atu kia te koe. 15Auā ko koe ka fai ma ana molimau ke takutaku atua ki nā tino uma o te lalolagi, nā mea kua kikila ma fakalogo koe ki ei. 16Heā la te koi fakatali ai koe? Tū loa ki luga ma papatihogia ma tatalo ki te Aliki ke fakamamā koe mai au agahala.’
Kua Tōfia ia Paulo ke Folafola te Tala Lelei ki Tagata Nukukehe
17“Na toe foki au ki Ieluhalema, ma ka koi tatalo au i loto o te Mālumalu, kae kō kitea he fakaaliga 18ko te Aliki na vāgana vē mai kia te au, ‘Faivave ma fano kehe loa mai Ieluhalema, auā ko nā tino i kinei e hē kilātou taliagia tau molimau e uiga kia te au.’ 19Ma na tali vē atu ai au, ‘Te Aliki, e iloa lelei lava e kilātou ko au nae fano ki nā hūnako, oi puke ma kini nā tino kua talitonu atu kia te koe. 20Ma i te tāmatega o Hetefano, tē nae molimau kia te koe, ko au nae iei ma na kau fakatahi au ma kilātou ke tāmate, ma na kō kikilāgia nā kofutatao o nā tino na kilātou tāmatea ia Hetefano.’#Gāl 7.58 21Oi na vāgana mai ai te Aliki kia te au, ‘Fano loa, auā ko koe ka uga atu e au ke fano ki he mea mamao, ki nā tino nukukehe.’ ”
22Ko nā tino nae fakalogologo kia Paulo ke pa lava ki te taimi na fai ai tana fakakupuga tēnei; kae meakē kua kāmata oi taukālalaga leo lahi vē, “Kave kehe te tino tēnā ma tāmate! E hē tatau ke toe ola!” 23Na taukekē leo lahi lele nā tino ma fetogi o lātou kofu ki luga, ma togi nā pefu ki luga o te ea. 24Oi na fakatonu ai e te takitakikau Loma nā fitafita, ke kave ia Paulo ki loto o te olo, ma ke kini kae ke iloa ai pe ko heā tonu te taukekē vē ai nā tino Iutaia ki ei. 25Kae i te noanoaga o Paulo e kilātou ke kini, na lea vē atu ia Paulo ki te ōfiha nae tū i kinā, “E fakataga i te tūlāfono ke kini e koe he tagatānuku Loma ka ko hēki faia hona fakamahinoga ke iloa ai pe hala?”
26Kua lagona atu e te ōfiha te kupu tēnei, oi na fano ai oi fehili vē ki te takitakikau, “Heā ta koe kua fai? Ko te tino tēia ko he tagatānuku Loma!”
27Oi na fano ai te takitakikau kia Paulo ma fehili vē atu ki ei, “Lea mai ake, ko koe he tagatānuku Loma?”
Na tali atu ia Paulo, “Io.”
28Kua lea atu te takitakikau, “Ko toku tagatānuku Loma na totogi i he tupe lahi lele.”
Na tali atu ia Paulo, “Ka ko au na fānau mai lava he tagatānuku ona ko oku mātua ni tagatānuku foki.”
29I te taimi lava tēnā, ko nā tāulelea na tuku e kilātou fakamahinoa ia Paulo kua hōhō kehe mai ia te ia; ma ko te takitakikau kua mataku i te ia hāfiaga ko Paulo ko he tagatānuku Loma kae ko tēia kua ia noanoagia i nā filifili.
Kua Kave ia Paulo ki Mua o te Taupulega
30Na fia iloa tonu e te takitakikau te mea kua mōlia ai ia Paulo e nā tino Iutaia; ma i te aho alafaki, oi na fakatonu ai e ia ke tatala kehe na filifili o Paulo, ma fakatonu nā ohitāulaga pule, ma te Taupulega kātoa ke fai he lātou fono. Oi na kave ai e ia ia Paulo oi fakatū i mua o kilātou.
Bible Society New Zealand Charitable Trust