Gāluega 19
19
Kua Folafola te Tala Lelei e Paulo i Efeho
1I te taimi ka koi i Kolinito ai ia Apolo, na faimalaga ai ia Paulo kui loto o te kogāfenua o Kalatia ma Fulugia, ma na taunuku atu ai ki Efeho. Na maua e ia i kinā ni tino Kelihiano, 2oi na fehili vē atu ai ki ei, “Na fanaifo te Agaga Paia ki luga o koutou i te liliuga o koutou ma kavea ma Kelihiano?”
Na tali mai kilātou, “E hēki fakalogo lele kimātou e iei he Agaga Paia.”
3Kua fehili atu ia Paulo, “Heā te uiga o te papatihoga kia te koutou?”
Oi na tali mai ai kilātou, “Ko te papatihoga na folafola e Ioane.”
4Kua lea atu ia Paulo, “Ko te papatihoga a Ioane, e mo kilātou kua liliu kehe mai a lātou agahala; ma na lea foki ia Ioane ki tagata o Ihalaelu ke talitonu ki te tino e hau mulimuli mai ia te ia—ko tona uiga, ko Iehu.” #Mat 3.11; Mlk 1.4, 7-8; Luk 3.4, 16; Ioa 1.26-27
5I te fakalogoga o kilātou ki te mea tēnei, oi na papatiho ai loa kilātou i te igoa o te Aliki ko Iehu. 6Na fakaeke atu nā lima o Paulo ki o lātou luga, oi na afio ifo ai te Agaga Paia ki luga o kilātou; na tautatala kilātou i nā gagana kehekehe, ma na folafola atu ai e kilātou te fekau a te Atua. 7Nae tuha ma te toka hefulu lua fakatahi kilātou nā tāulelea.
8Ko Paulo nae fano lava ki te hūnako ma mo he tolu māhina, nae tautala ki tagata ma te hē mataku, i ni taumafaiga ke mafai ai kilātou ke talitonu e uiga ki te Mālō o te Atua. 9Kae ko iētahi o kilātou nae makaka nā loto ma hē fia talitonu, ma nae faikupu fakatāfafai i mua o tagata, e uiga ki te Ala o te Aliki.#19.9 Ala o te Aliki Kikila ki te 9.2 Oi na tukua ai loa e Paulo kilātou, ma na fano ai ma kave nā tino kua talitonu, ma i aho uma lava#19.9 Ko iētahi tuhituhiga e fakaopōpo ki ei te mai te 11 i te tāeao ki te 4 i te afiafi nae fai ana talatalanoaga i te potu nae fai ai nā akoakoga a Tulano. 10Na kātoa te lua tauhaga nae fai ai e ia te mea tēnei, ma ko nā tino uma nae nonofo i te itūmālō o Ahia, nā tino Iutaia ma nā tino nukukehe, na kilātou lagona te kupu a te Aliki.
Ko nā Ataliki o Hekeva
11Nae fai e te Atua e ala ia Paulo, nā itūkāiga vāvega uiga kehe. 12E pa ki nā holoholo ma nā kie talipefu nae fakaaogā e Paulo, nae kave ki nā tino tauale ma nae mālōlō ai kilātou, ma nae olo ai foki ki fafo nā agaga kino mai ia te kilātou. 13Ko iētahi tino Iutaia nae malaga holo ma tuli ki fafo nā agaga kino, ma nae taumafai foki ke fakaaogā e kilātou te igoa o te Aliki ko Iehu, ke fai ai te mea tēnei. Na lea vēnei atu kilātou ki te agaga kino, “I te igoa o te Aliki ko Iehu, tēia e tālaki e Paulo, ko au e lea atu hau loa ki fafo.” 14E toka fitu te kau uho, ni ataliki o he Ulu Ohitāulaga Iutaia nae igoa kia Hekeva, nae kilātou faia te mea tēnei.
15Kae na tali vē mai te agaga kino kia te kilātou, “E iloa e au ia Iehu, ma e iloa e au ia Paulo; kae ko koutou—ko ai koutou?”
16Na ohofaki ai kilātou uma e te tino nae ulufia e te agaga kino, ma ko tona mālohi na ia togia ai kilātou uma ki lalo. Oi na fetutuli kehe ai kilātou mai te fale kua hē lavalavā ma mānunuka o lātou tino. 17Kua lagona te tala tēnei e nā tino Iutaia uma, vēnā ma nā tino nukukehe uma nae nonofo i Efeho; oi na mātataku uma lele ai kilātou, ma na fakaātili ai oi vīkia lahi e kilātou te igoa o te Aliki ko Iehu. 18E tokalahi nā tino Kelihiano na ōmamai oi takutaku ma fakailoa atu i mua o tagata nā mea nae fai e kilātou. 19Ko te tokalahi o kilātou nae fai mea fakataulāitu, na kaumai nā tuhi a lātou ma huhunu fakatahi i mua o tagata. Na kilātou fakaopōpoa fakatahi te tau kātoa na fakatau mai ai na tuhi iēnei, ma na kātoa te 50,000 tupe hiliva.#19.19 tupe hiliva Ko te tupe hiliva e fokotahi ko te totogi ia o te tino faigāluega fātoaga i te vaiaho e fokotahi (kikila ki te Mat 20.2) 20Ko nā mea iēnei, na fai ma mea na halalau ma tuputupu ai pea te ola o te kupu a te Aliki.
Ko te Vevehitū i Efeho
21Kua uma atu nā mea iēnei, oi na tonu ai i te māfaufau o Paulo#19.21 oi na tonu ai i te māfaufau o Paulo pe na tonu ai ia Paulo, i te takitakiga a te Agaga Paia ko ia ka malaga kui atu i Maketonia ma Akaia, ma fakaauau ai ki Ieluhalema. Ma na lea vēia ai, “Kāfai e uma toku āhiahi ki Ieluhalema, e tatau foki au ke āhiahi ki Loma.” 22Oi na uga ai e Paulo ia Timoteo ma Elahito, ni tino e toka lua o nā tino nae fehoahoani kia te ia, ke olo ki Maketonia, kae kua toe nofo ia mo ni iētahi aho i te itūmālō ko Ahia.
23E tuha ko te taimi tonu tēnei na tutupu ai ni fakafītāuli e lahi i Efeho, ona ko te Ala o te Aliki. 24Nae iei he tino gaohi mea i te hiliva nae igoa kia Temeteliu, nae fai ana tamā fakatuha hiliva o te mālumalu o te atua fafine ko Atemito, ma na lahi lele nā tupe a tana kau faigāluega nae maua i tana pihinihi. 25Kua fakamāopōpo mai e ia tana kau faigāluega uma, vēnā ma iētahi tino nae vēnei foki a lātou gāluega, oi na lea vē atu ai kia te kilātou, “Nā tāulelea, e iloa e koutou ko te tamaokāiga o kitātou e maua mai i te gāluega tēnei. 26Nei, kua kikila ma fakalogo koutou ki te mea a te tagata tēnei ko Paulo e fai. E lea vēia ko nā atua e fai i lima o tagata e hē ni atua moni, ma kua tokalahi lele nā tino i kinei i Efeho ma te itūmālō kātoa o Ahia kua talitonu kia te ia. 27E iei la nā tūlaga fakapopolegia lahi kua kitea. E hē gata ka fāitiogia e tagata te itūkāiga pihinihi tēnei, kae ka fai foki ma mea ka hē fakatāua ai e tagata te fale tāpuaki o te atua fafine takutakua ko Atemito, ma ono kave kehea mai ai foki lava ma tona mamalu—te atua fafine e tāpuaki ki ei ia tagata uma i Ahia, ma te lalolagi kātoa!”
28Kua fakalogo te kaifenua ki nā kupu iēnei, oi na fēkakai lele ai ma kāmata oi taufōlua vē, “E hilihili lava te mamalu o Atemito o Efeho!” 29Kua halalau te vevehi ki te kakai kātoa. Oi na puke ai e te kaifenua ia Kaio ma Alihitako, ni tino Maketonia nae malaga fakatahi ma Paulo, ma kave ki te malae nae māhani fai ai ia māopōpoga a tagata o te kakai. 30Na fofou lava ia Paulo ko ia ke tautala ki te kaifenua, kae na tāofi e te kau Kelihiano. 31Ko iētahi o takitaki o te fenua, ni uō e a Paulo, na kave foki te lātou fakatagi kia Paulo ke nahe fano ki te malae. 32I te taimi tēnā, ko te māopōpoga kua piha valevale: nae kehe te mea nae taukālalaga ai iētahi tino, oi kehe foki te mea nae lea ai iētahi tino, ona ko te tokalahiga nae hē kilātou iloa pe ko heā te na māopōpo ai kilātou. 33Ko iētahi tino na iei to lātou tāofi, ko Alehana te na māfua ai te mea tēnei ona na uga e nā tino Iutaia ke fano ki mua. Oi na fakatū atu ai te lima o Alehana ki tagata ke nahe piha, ma na taumafai ai ke fakamālamalama ki ei, ko te vevehitū na hēki māfua ia te ia ma ona hoa. 34Kae i te matea atuga e kilātou ko Alehana ko he Iutaia, oi na taukālalaga fakatahi ai lava vēnei kilātou mo he lua itūlā, “E hilihili te mamalu o Atemito o Efeho!”
35Mulimuli ake na fakatotoka ai te kaifenua e te failautuhi o te kakai. Kua lea vē atu ia, “Oku uho Efeho, e iloa e tagata uma ko te kakai ko Efeho te ia kikilāgia te mālumalu o te atua ko Atemito, vēnā ma te fatu tapu na pakū ifo mai te lagi. 36E hēai he tino e hē ia iloa nā mea iēnei. E tatau ai la koutou ke fakatotoka ma nahe koutou faia he mea e aunoa ma te māfaufau lelei muamua ki ei. 37Kua kaumai e koutou nā tāulelea iēnei ki kinei e ui lava e hēki kilātou kaihohoagia nā fale tāpuaki, pe fāifai ki to tātou atua fafine. 38Kāfai ia Temeteliu ma tana kau faigāluega e iei he lātou mōliaga fakatatau ki ho he tino, e iei nā aho fakapitoa e fai ai nā fakamahinoga e nā tino e pūlea to tātou kakai: e mafai ke kaumai ki ei nā mōliaga iēnā. 39Kae kāfai e iei he tahi mea e kehe mai ai i te mea tēnei e fofou koutou ki ei, e tatau la ke kave ke fai ki ei he fakaikuga i he fono aloakia a tagatānuku o te kakai. 40Auā e ono mōlia kitātou kua fakatutupu e kitātou he vevehitū, ona ko te mea kua tupu i te aho nei. E hēai lele he mea na tatau ai ke tupu he vevehitū vēnei, ma e hēai foki he māfuaga tatau.” 41Na uma loa tana tautalaga oi na fakatūkua ai e ia te māopōpoga.
Bible Society New Zealand Charitable Trust