Gāluega 20
20
Kua toe Āhiahi ia Paulo ki Maketonia ma Akaia
1Kua māona atu te vevehitū, oi na fakapotopoto ai e Paulo te kau Kelihiano, ma ina kua uma te ia kavatua ki ei o ni kupu fakamākeke, oi na fakamāvae atu ai kia te kilātou, ma na malaga ai loa ki Maketonia. 2Na kui atu ia i nā kogāfenua iēnā ma fakamālohi ki te kau Kelihiano. Kua pa atu ia ki Eleni, 3oi na nofo ai i kinā i ni māhina e tolu. Na hāuni ia Paulo ke malaga i he vaka ki Hulia, kae na ia maua te fakamatalaga ko ia nae lama e ni tino Iutaia; oi na fai ai tana tonu ke toe liliu kui atu i Maketonia i tona auala ki Ieluhalema. 4Ko Hopate te ataliki o Paihuha mai Peloea, na olo ma Paulo; na vēnā foki ia Alihitako ma Hekunatu mai Tehalonika; ko Kaio mai Tepe; ko Tuhiko ma Tolofimo mai te itūmālō o Ahia; ma Timoteo. 5Na olo muamua kilātou oi fakatali mai ai kia te kimātou i Toloaha 6Na folau atu kimātou mai Filipi i te umaga o te Kaiga Fakamanatu o te Falaoa Hē Fakafefetea, ma ina kua teka nā aho e lima, oi na feiloaki ai kimātou i Toloaha, ma na nonofo ai kimātou i kinā i he vaiaho.
Ko te toe Malaga a Paulo ki Toloaha
7I te afiafipō o te Aho Tōnai, na māopōpo ai kimātou mo te kaiga fakatahi a te kau Kelihiano. Na tautala ia Paulo ki tagata ma na talatalanoa ai lava ki ei ke pa lava ki te tūlua o te pō, ona ko te aho alafaki na tuku e fano kehe ai. 8E lahi nā lāmepa nae mumū i te falealuga i te mea nae fai ai te mātou fonotaga. 9Nae iei he taumalo nae igoa kia Eutuko nae nofo i te fāmalama, ma ka koi fai te tautalaga a Paulo, kae kua kāmata oi tulemoe ma na iku lava na moe. Oi na pakū ifo ai mai te fogāfale tolu ki te kelekele, ma i te hiki akega o ia e kilātou, na kilātou kitea ai kua oti. 10Kae na fanaifo ia Paulo ki lalo, kua fakapakū ki luga o te taumalo ma ōpoipoi mai ma na lea vē atu ai, “Koutou nahe popole, ko te taumalo koi ola!” 11Oi na toe fano ai ki te falealuga, kua tavaevae e ia te falaoa ma na kakai fakatahi ai ma te kau Kelihiano. Ina kua uma te tautala o Paulo kia te kilātou mo he taimi mataloa ke pa ki te hopo ake o te lā, oi na tuku ai e ia kilātou kae kua fano kehe. 12Na kave ai loa e kilātou te taumalo ki tona kāiga koi ola, ma na matuā fakamāfanafanagia lele ai ia loto o kilātou tau toka tahi.
Kua Malaga atu ia Paulo mai Toloaha ki Mileto
13Na muamua kimātou ki te mea nae iei te vaka ma na tukuvaka loa lava ki Ahoho, te mea na tuku e fakahopo ifo ai ia Paulo ki luga o te vaka. Na lea mai kia te kimātou ke fakahopo ifo ia i kinā, auā ko ia nae kui gāuta atu. 14Ma i te fetauiga o kimātou ma Paulo i Ahoho, oi na fakahopo ifo ai e kimātou ki luga o te vaka, ma na fakaauau ai te mātou malaga ki Mitulene. 15Na malaga atu kimātou mai kinā ma taunuku ki gātai o Hiou i te aho alafaki. I te aho na hohoko ai na pa ai kimātou ki Hamoha, ma i te aho alafaki na taunuku ai kimātou ki Mileto. 16Na fai ai te tonu e Paulo ke fakaauau pea te folauga ke teka ia Efeho, kae ke nahe fakafanoa ho mātou taimi i te itūmālō o Ahia. Nae ta fakavave lele ke pa ia ki Ieluhalema i te aho o te Penitekoho, pe kāfai e mafai.
Ko te Lāuga Fakamāvae a Paulo ki nā Toeaina o Efeho
17I to mātou taunuku atuga ki Mileto, oi na uga ai e Paulo he tino ma he faifekau ki nā toeaina o te Ekalehia i Efeho, ko ia e fia feiloaki ma kilātou kāfai ia e taunuku ake. 18Ma i to mātou taunuku atuga, oi na lea atu ai ia Paulo kia te kilātou, “E iloa e koutou nā mea nae fakafano ki ei toku taimi i nā aho uma nae māfuta ai au ma koutou, mai te aho muamua lava na pa mai ai au ki te itūmālō o Ahia. 19Ko au he kaukauna e a te Aliki nae galue ma te loto maulalo vēnā ma te lahi o te loimata maligi, i nā taimi faigatā na pa mai kia te au, ona ko nā taupulepulega a ni tino Iutaia. 20E iloa e koutou e hēki kō tāofiagia lele he mea e fokotahi e aogā kia te koutou, i aku akoakoga nae fai i mua tagata ma loto o outou kāiga. 21Na lapataki mālohi au ki nā tino Iutaia vēnā ma nā tino nukukehe, ke halamō ia lātou agahala ma liliu ki te Atua, ma ke talitonu ki to tātou Aliki ko Iehu. 22Ma i te taimi nei, ko au ka fano ki Ieluhalema e vē ona fakatonugia ai au e te Agaga Paia, e aunoa ma te kō iloa pe ko heā te ka tupu kia te au i kinā. 23Oioti lava te mea e kō iloa, kua uma te lapataki mai o te Agaga Paia kia te au, ko te falepuipui ma puapuagā e fakatalitali mai kia te au i nā kakai uma e pa au ki ei. 24Kae ko toku ola e hē tāua ia te au; oioti lava te mea e fofou au ki ei, ke fakatāunuku te mea na tōfia ai au ma fakauma te gāluega na fōki mai e te Aliki ko Iehu kia te au ke fai, ko te tālakiga tēnā o te Tala Lelei e uiga ki te alofa tūnoa o te Atua. #2 Tim 4.7
25“Kua uma toku pa atu kia te koutou uma ma folafola atu e uiga ki te Mālō o te Atua, ma e iloa e au e hēai lele he tino o koutou ka toe kikila mai kia te au. 26Ko te mea ia e takutino atu ai e au kia te koutou i te aho tēnei: kāfai lava he tino o koutou e pakū ki te mālaia, e hē ko au te na māfua ai. 27Auā e hēki fakanofonofo lele au i te fakailoa atuga kia te koutou, o nā mea uma kua fuafua e te Atua ke fakatāunuku. 28Ko te mea ia, koutou ke mataala ma kikila lelei te lafumāmoe kua tuku atu e te Agaga Paia ke kikila e koutou. Ke kavea koutou ma leoleomāmoe o te Ekalehia a te Atua,#20.28 Atua ko iētahi tuhituhiga e lea mai Aliki tēia kua ia kavea ke fai mo ia, e ala i te toto o tona Ataliki.#20.28 e ala i te toto o tona Ataliki pe e ala i te mate o tona Ataliki ke fai ma tāulaga pe e ala i tona lava toto 29Kua uma te kō iloa kāfai au e fano kehe, ka ōmamai nā luko fēkakai kia te koutou, ma ka hē kilātou fakahaoa te lafumāmoe. 30E hau te taimi e fai ai e ni tino o koutou ni fakamatalaga pepelo ke takitaki kehe ai nā tino Kelihiano ma mulimuli ake ai kia te kilātou. 31Koutou la ke mataala, ma ke manatua te lahi o nā loimata na maligi i te pō ma te ao, i te tolu tauhaga nae kō akoakoa ai koutou uma tau toka tahi.
32“Ma i te taimi nei, e kō tuku atua koutou ki nā lima o te Atua, ma ki te fekau e uiga ki tona alofa tūnoa, e mafai ai ke tuputupu pea te koutou ola faka-te-agaga ma maua ai e koutou nā fakamanuiaga a te Atua mo ona tagata uma. 33E hēki kō manakomia ni hiliva, pe ni aulo, pe ni lākei mai he tino. 34E iloa lelei lava e koutou, ko oku lima lava iēnei nae galue ke maua ai nā mea uma nae manakomia e au ma oku hoa a kaukauna, ke ola ai kimātou. 35Kua fakahino atu e au kia te koutou i aku mea uma e fai, ko te galue mālohi e vē ona galue ai au, e mafai ai e kitātou ke fehoahoani ki te tino faitauale, ma manatua ai nā kupu na vāgana ai te Aliki ko Iehu e vē, ‘E lahi atu te manuia o te tino e ia fōkia, i lo te tino e ia taliagia.’ ”
36Ina kua uma te tautala vēnei atu o Paulo, oi na tōtuli ai ki lalo fakatahi ma kilātou uma, ma tatalo. 37Ma na faitatagi uma lele ma ōpoipoi e kilātou ia Paulo, ma hogi fakamāvae ki ei. 38Na fakaātili to lātou fakanoanoa, ona na lea ki ei ia Paulo, e hē toe kikila kilātou kia te ia. Oi na kaumai ai e kilātou ia Paulo ki te vaka.
Bible Society New Zealand Charitable Trust