Gāluega 18
18
Kua Folafola e Paulo te Tala Lelei i Kolinito
1Kua teka atu nā mea iēnā, oi na fano ai ia Paulo mai Atenai ki Kolinito. 2I kinā, na fetaui ai ma he tino Iutaia nae igoa kia Akula, na fānau i Ponitoho, ma na fātoā ōmamai i Italia ma tana āvaga ko Pihila, ona ko te fakatonuga a Kaihala Kalautioho, ko nā tino Iutaia uma i Loma ke olo kehe. Na fano ia Paulo oi fakahula ki ei, 3oi na nofo ai ma faigāluega ma te toka lua tēnei, auā ko tana gāluega nae fai ke ola ai ia ko te fai falekie, nae vē foki lava ko nā gāluega a te toka lua tēnei. 4Nae fai ana talatalanoaga i te hūnako i nā Hāpati takitahi uma, i ana taumafaiga ke talitonu nā tino Iutaia ma nā tino Eleni ki nā mea e akoako ake ai kilātou e ia.
5I te taunuku ifoga o Hila ma Timoteo mai Maketonia, oi na tuku ai loa e Paulo nā gāluega a ia nae fai kae kua fakaaogā tona taimi kātoa ke folafola ai te fekau ma fakamanino lelei ki tagata Iutaia, ko Iehu ko te Mehia. 6Na teteke kilātou kia Paulo ma faikupu kino ki ei, oi na tali vēnei atu ai ia Paulo kia te kilātou ma lūlū kehe te pefu i ona kofu, “Kāfai koutou e momotu kehe mai te Atua, ko koutou lava te na māfua ai! E hē ko he hehē e o oku. E kāmata atu nei, ko au ka fano oi tālaki ki tagata nukukehe.” 7Oi na fano ai loa kua nofo i te fale o he tino nukukehe nae igoa kia Titiuhu#18.7 Ko iētahi tuhituhiga tuai e leamai Tito Iuhitu, he tino nae tāpuaki ki te Atua i te lotu Iutaia; ko tona fale nae tū i tafa o te hūnako. 8Ko Kilihipo te takitaki o te hūnako, kua talitonu ki te Aliki, vēnā ma tona kāiga kātoa; ma na tokalahi foki iētahi tino i Kolinito na fakalogo ki te fekau ma na talitonu, ma papatihogia ai.
9I tētahi pō, na kitea ai e Paulo te Aliki i he fakaaliga e lea vē mai kia te ia, “Ia koe nahe mataku, kae tautala pea lava kia te kilātou, ma nahe kē fakavāivai lele, 10auā ko au e iei fakatahi ma koe. E hēai he tino e ia mafaia oi fai he mea ke ogohia ai koe, auā i te kakai tēnei, e tokalahi oku tagata e nonofo ai.” 11Oi na nofo ai ia Paulo i kinā i he tauhaga ma te āfa, ma akoako atu te kupu a te Atua ki tagata.
12Kae i te kavega o Kalione ma kōvana Loma o Akaia, na kau fakatahi ai ia tagata Iutaia; kua puke e kilātou ia Paulo ma na kave ai ki te fakamahinoga. 13Na lea vēnei atu kilātou, “Ko te tino tēnei e ia tauānaua ia tagata ke tāpuaki ki te Atua, i he auala e hē tuha ai ma te tūlāfono!”
14Na tau fai atu he fakamatalaga a Paulo, kae kua vē mai ia Kalione ki nā tino Iutaia, “Ānei te mea tēnei ko he holitūlāfono pe ko he mea hehē kino na fai, e tatau la au ke onohai ma ke fakalogo atu kia te koutou. 15Kae ona ko koutou e fai fīnauga e uiga ki ni kupu ma ni igoa, ma e uiga ki te tūlāfono a koutou, e tatau la ke fai lava e koutou he fakaikuga ki ei. E hē faia au ma fakamahino ki nā mea iēnā!” 16Ma na tuli kehe ai e ia kilātou. 17Oi na puke ai e te kaifenua ia Hohetene te takitaki o te hūnako, ma kini i mua o te fakamahinoga. Kae e hēki fia tokaga lele ki ei ia Kalione.
Kua toe Foki ia Paulo ki Anitioka
18Na nofo ia Paulo i Kolinito fakatahi ma te kau Kelihiano, mo ni aho e lahi, oi na tuku ai e ia kilātou, kae kua folau ma Pihila ma Akula ki Hulia. Ka ko hēki folau kehe ia Paulo mai Keneleai, na tafi tula tona ulu ona he tautōga e a ia na fai.#18.18 he tautōga e a ia na fai E fakatatau te mea tēnei ki te aganuku a tagata Iutaia e tafi tula te ulu ke fakailoa ai te tauhi pea lava ki he tautōga #Nūm 6.18 19Na taunuku atu kilātou ki Efeho, oi na tuku ai i kinā ia Pihila ma Akula e Paulo, kae kua fano ki te hūnako, ma talatalanoa ai ma nā tino Iutaia. 20Na talohaga nā tino kia Paulo ke nofo mataloa i kinā, kae na hēki fofou ia ki ei. 21Kae na lea vēnei atu ia kia te kilātou i te taimi ka fano kehe ai, “Kāfai ko te finagalo ia o te Atua, e toe foki mai lava au kia te koutou.” Oi na folau kehe ai loa ia mai Efeho.
22I te pa atuga o ia ki Kaihaleia, oi na fano ai ki Ieluhalema ke feiloaki ma te Ekalehia, ma na toe fano ai ki Anitioka. 23Na mataloa malie ia i kinā, ma na fano ai kua kui loto i te kogāfenua o Kalatia ma Fulugia ma fakamākeke atu ki te kau Kelihiano uma.
Ko Apolo i Efeho ma Kolinito.
24I te taimi tēnā, na fano ai ia Apolo, he tino Iutaia na fānau i Alehanalia, ki Efeho. He tino poto tautala ma mālamalama lelei i nā Tuhituhiga Paia. 25Na fakaako lelei ia e uiga ki te Ala o te Aliki,#18.25 Ala o te Aliki Kikila ki te 9.2 ma nae fiafia lahi lele oi folafola ma fakailoa hako atu nā fakamatalaga e uiga kia Iehu. Kae oioti lava te mea nae ia iloa ko te papatihoga a Ioane. 26Na kāmata loa oi tautala atu ia Apolo ma te hē mataku i loto o te hūnako. I te lagonaga e Pihila ma Akula te tautalaga a Apolo, oi na kave ai e kilāua ki to lā fale ma fakamālamalama hako kia te ia e uiga ki te Ala o te Atua. 27Na fai ai loa te tonu a Apolo ko ia ka fano ki Akaia, ma na kave ai te tuhi a te kau Kelihiano i Efeho ki te kau Kelihiano i Akaia, ke kilātou talia ia Apolo kāfai e pa ake. I te taunukuga o Apolo ki Akaia, na fai ia ma fehoahoani lahi kia te kilātou kua talitonu, e ala i te alofa tūnoa o te Atua. 28Auā nae fīnau mālohi ma nā tino Iutaia i mua o tagata, ma na fakailoa ai e ia te hehē o kilātou. Na fakamāonia e ia kia te kilātou e ala i nā Tuhituhiga Paia, ko Iehu ko te Mehia.
Bible Society New Zealand Charitable Trust