Gāluega 17
17
Kua Lāuga ia Paulo i Tehalonika
1Na fakaauau pea te malaga a Paulo ma Hila kui atu i Amefipoli ma Apolonia, oi na taunuku atu ai ki Tehalonika, te mea nae iei ai he hūnako o nā tino Iutaia. 2Na fano ai ia Paulo ki te hūnako, e vē lava ko tana māhani. I kinā, e tolu ia Hāpati nae talatalanoa ai ma tagata, ma na hiki mai e ia ni kupu mai nā Tuhituhiga Paia, 3ke fai ma fakamāoniga ko te Mehia e tatau ke maua i nā puapuagā, ma toe tū mai i te oti. Na lea vē atu ia Paulo, “Ko te Iehu tēnei e kō folafola atua, ko te Mehia ia.” 4Ko iētahi tino o kilātou na talia kātoatoa e kilātou te tālakiga tēnei, oi na kau fakatahi ai ma Paulo ma Hila; na vēnā foki ma te tokalahi o nā fafine lauiloa, ma he vāega tokalahi o nā tino Eleni kua talitonu ma tāpuaki ki te Atua.
5Kae ko iētahi tino Iutaia na maua i te lotokino, ma na kilātou fakamāopōpo maia he kaifenua o nā tino tataka holo i nā auala. Na fakatupu e kilātou te piha ma te vevehi i loto o te kakai kātoa ma ohofaki e kilātou te fale o he tamāloa nae igoa kia Iahona, i he taumafaiga ke hakili ia Paulo ma Hila ma kaumai ki tagata. 6Kae na hēki maua e kilātou te toka lua, ma ko te mea ia na toho ai e kilātou ia Iahona ma iētahi tino kua talitonu, ma kave ki mua o te taupulega ma taukālalaga vē, “Ko nā tino iēnei kua kilātou fakatupua te vevehi i ho he koga e olo ki ei! Nei, kua ōmamai ki to tātou kakai, 7ma kua talia kilātou e Iahona ki loto o tona fale. Kua holi e kilātou uma nā tūlāfono a te Kaihala, ma na lea e iei tētahi tupu, ko tona igoa ko Iehu.” 8Ko a lātou fakakupuga iēnei na faitapiha ai te kaifenua ma te taupulega. 9Oi na fakatonu ai ia Iahona ma iētahi tino e te taupulega, ke totogi te tupe e mafai ke tatala ai kilātou ki tua, ma na tuku ai ke olo.
Ko Paulo ma Ona Hoa i Peloea
10Na pa loa lava ki te pō, oi na uga ai ia Paulo ma Hila e nā uho Kelihiano ke olo ki Peloea. Kua taunuku atu kilāua ki kinā, oi na olo ai ki te hūnako o tagata Iutaia. 11Na hili atu te tali aloakia o kilāua e nā tino i kinā, i lo nā tino i Tehalonika. Na fakalogologo kilātou ki te fekau ma te loto naunau lahi, ma nae hukehuke e kilātou nā Tuhituhiga Paia i aho uma, ke kilātou iloa ai pe moni te mea e lea ai ia Paulo. 12E tokalahi kilātou na talitonu; e tokalahi foki ia fafine ma tāulelea Eleni lauiloa, na talitonu. 13Kae i te lagonaga e nā tino Iutaia i Tehalonika kua folafola foki e Paulo te kupu a te Atua i Peloea, oi na olo ai foki ki ei ma kāmata oi fakaohōho ki nā tino kae ke tupu ai foki he vevehi. 14Oi na uga ai loa lava ia Paulo e te kau Kelihiano ki he koga tū matāfaga; kae ko Hila ma Timoteo na nonofo lava i Peloea. 15Ko nā tāulelea na olo ma Paulo, na toe liliu ifo ki Peloea i te pa atuga o kilātou ki Atenai, ma te fakatonuga mai ia Paulo mo Hila ma Timoteo, ke ōake vave ki te mea e iei ia.
Ko Paulo i Atenai
16Ka koi fakatalitali ia Paulo i Atenai kia Hila ma Timoteo, na ita lahi lele i te ia kiteaga ko te kakai kua tumu i nā tupua. 17Oi na kāmata ai e ia ni talatalanoa i te hūnako ma nā tino Iutaia fakatahi ma nā tino nukukehe kua tāpuaki ki te Atua. Na vēnā foki ona ia faia i te malae i aho takitahi, ma nā tino na ōatu ki kinā. 18Nae i kinā ni tino nae mulimuli ki akoakoga a Epikulei#17.18 Epikulei He tino nae ia akoakoa vēia, ko te fiafia ko te mea ia e tatau ke fakamuamua i te olaga ma a Hitoiko.#17.18 Hitoiko He akoakoga a he tino nae igoa kia Heno, e vēia ko tagata e tatau ke kilātou iloa oi loto pūlea ma ke takitakia e o lātou lotofuatiaifo Na fehili vē iētahi o kilātou, “E vēhea ake kō te mea e lea ai te tagata fiapoto tēnā?”
Na tali mai iētahi tino, “E vē lava e tautala fakatatau ki ni atua kehe.” Na lea vēnā kilātou, ona ko Paulo nae folafola e ia e uiga kia Iehu ma te toetū.#17.18 Iehu ma te toetū I te gagana Eleni, ko te kupu toetū e ono ko he igoa o he atua fafine 19Ko te mea ia na kave ai e kilātou ia Paulo ki mua o te taupulega a te kakai nae takua ko te Aleiopakono, ma na lea vē atu kilātou kia Paulo, “E fia iloa e kimātou pe vēhea te akoakoga fōu tēnā e tautala ai koe. 20Ko iētahi mea e lagona e kimātou e lea ai koe, e vēia e kehe i ta mātou fakalogo, ma e fia iloa e kimātou te uiga o nā mea iēnā.” 21(Auā ko tagatānuku uma lele o Atenai, ma nā tino kehe nae nonofo ai, nae fiafia ke nonofo oi faitatala ma fakalogologo ki nā mea fōu.)
22Na tū ki luga ia Paulo i mua o te Aleiopakono ma na lea vē atu, “I taku kikila, ko koutou tagata Atenai, ni tino e aloā e lolotu. 23Auā i te kui atuga o oku i te koutou kakai ma kikila ki nā mea nae tāpuaki ai koutou, na kō kitea ai he fata faitāulaga nae tuhi ai, ‘Ki he Atua e Hē Iloa.’ Ko te Atua la tēnā e tāpuaki koutou ki ei, e ui lava e hē koutou iloa, ko te Atua ia e folafola atu nei e au kia te koutou. 24Ko te Atua, tē na faia te lalolagi ma nā mea uma e iei, ko te Aliki ia o te lagi ma te lalolagi, ma e hē nofo i ni mālumalu e fau i nā lima o tagata.#1 Tup 8.27; Iha 42.5; Gāl 7.48 25E hēai foki he mea e fia maua e ia mai ia te kitātou, e ala i to tātou kaukauna kia te ia, auā ko ia lava te fōki maia te ola ma te mānava ma iētahi mea valevale, ki tagata uma. 26Mai te tupuna#17.26 tupuna Ko iētahi tuhituhiga e leamai toto e fokotahi, na ia faia ia tagata lanu kehekehe uma ke nonofo i te lalolagi kātoa. Ko ia lava te na ia fuafuagia muamua nā taimi ma nā koga e gata mai ai nā mea e nonofo ai kilātou. 27Na fai e ia te mea tēnei kae ke hakili ai ia e kilātou, ma ātonu ka tau fāfā kilātou kia te ia ma mafai ai ke maua ia e kilātou. Oi ka ko te Atua e hē mamao lele ma ho he tino o kitātou; 28e vē ona lea ai hētahi tino,
‘E ala ia te ia, e kitātou maua ai te ola;
e mafai ai ke gāoioi pea kitātou
ma ke fai ai pea nā mea kua māhani ai.’
E vē foki ko nā kupu a iētahi tino fatu pehe o koutou,
‘Ko kitātou uma ni fānau lava e a ia.’
29Ona ko kitātou ni fānau e a te Atua, e hē tatau la kitātou ke manatu ko te Atua e tāi fōliga ki he fakatuha e fai i te aulo, pe i te hiliva, pe i te fatu, i te poto ma te iloa o te tagata. 30Kua hē toe māfaufau te Atua ki nā aho nae hē iloa ai ia e tagata, kae i te taimi nei, kua fakatonu e ia ia tagata uma i ho he koga o te lalolagi, ke liliu kehe mai a lātou āmio kino. 31Auā kua uma te fakamau e ia o te aho ka ia fakamahinoa ai ma te āmiotonu te lalolagi kātoa, e ala i he tino kua ia filifiliagia. Kua ia fakamāoniagia ki tagata uma te mea tēnei, e ala i te toe fakatūga e ia o te tino tēnā mai te oti!”
32I te kilātou lagona atuga o Paulo e tautala e uiga ki te toetū mai te oti, oi na fakatauemu ai iētahi tino ki ei, kae ko iētahi tino kua lea vē, “Ko kimātou e fia toe fakalogo ke tautala mai koe i te mea tēnā.” 33Ma na fano kehe ai loa ia Paulo mai te mea nae iei kilātou. 34E iei nā tāulelea kua talitonu ma na mulimuli ai i te kau a Paulo, ma ko tētahi o kilātou iēnei ko Tionuhio, he tino o te taupulega; nae iei foki he fafine nae igoa kia Tamali, ma iētahi tino.
Bible Society New Zealand Charitable Trust