Gāluega 16
16
Kua Olo ia Timoteo ma Paulo ma Hila
1Na fakaauau te malaga a Paulo ki Tepe ma Luhitala; te mea nae nofo ai he tino Kelihiano nae igoa kia Timoteo. Ko tona mātua ko he Kelihiano foki ma ko he tino Iutaia, ka ko tona tamana he tino Eleni. 2Nae taku leleia lele ia Timoteo e te kau Kelihiano uma i Luhitala ma Ikononu. 3Na fofou ia Paulo ke ia kavea ia Timoteo, oi na pelitome ai e ia. Na ia faia te mea tēnei ona kua iloa e tagata Iutaia uma i nā koga iēnā, ko te tamana o Timoteo he Eleni. 4Na kui loto atu kilātou i nā tamā kakai, ma na kilātou fakailoa atua ki te kau uho Kelihiano nā fakahinoga kua uma te fai e te kau apohitolo ma toeaina i Ieluhalema, ma fautuagia kilātou ke uhitaki ki ei. 5Oi na ātili ai te tuputupu mālohi o te fakatuatua i nā Ekalehia, vēnā ma te nūmela o tagata kua talitonu, i aho takitahi.
Ko te Fakaaliga na kitea e Paulo i Toloaha
6Na malaga kui loto atu kilātou i nā kogāfenua o Fulugia ma Kalatia, ona na fakaali kia te kilātou e te Agaga Paia, ke nahe tālakia e kilātou te fekau i te itūmālō o Ahia. 7I te taunuku atuga o kilātou ki Muhia, oi na taumafai ai ke olo ki te itūmālō o Pitunia, kae na hēki fakatagagia kilātou e te Agaga o Iehu, ke olo ki ei. 8Oi na fakaauau ai lava te lātou malaga kui atu i Muhia ke pa ki Toloaha. 9Ma i te pō tēnā, na kitea ai e Paulo i he fakaaliga, he tino Maketonia nae tū kae fakatagi vēnei ake, “Hau kō ki Maketonia, oi fehoahoani mai kia te kimātou!” 10I te kiteaga e Paulo o te fakaaliga tēnei, oi na hāuni ai loa kimātou ke olo ki Maketonia, auā na iloa e kimātou ko te Atua kua kalaga mai kia te kimātou ke folafola te Tala Lelei ki nā tino i kinā.
Kua Liliu ia Litia ma Kavea ma Kelihiano i Filipi
11Na olo hako loa kimātou i he vaka mai Toloaha ki Hamotalake, ma i te aho alafaki na olo ai ki Neapoli. 12Mai kinā na olo ai kimātou ki Filipi, he kakai o te itūmālō muamua o Maketonia; he kolone foki o Loma. Na faitau aho kimātou i kinā. 13I te Hāpati na olo ai kimātou ki fafo o te kakai ki te kautafa o te vaitafe, ki he koga na kimātou iloa nae māhani lava oi māopōpo ki ei nā tino Iutaia ke tatalo ai. Oi na nonofo ai kimātou ki lalo i kinā ke faitatala ki nā fafine kua māopōpo i kinā. 14Ko hētahi o nā fafine na ia lagona kimātou ko Litia, e hau mai Tuateila, ma ko he tino fakatau kie violē taugatā. Ko he fafine nae tāpuaki ki te Atua, ma na tatala ai e te Aliki tona māfaufau ke mālamalama i te mea nae tautala ai ia Paulo. 15Ina kua uma te papatiho o Litia ma nā tino uma o tona kāiga, oi na lea vē mai ai kia te kimātou, “Ōmamai tātou nonofo i toku fale, kāfai koutou kua manatu ko au he tino kua talitonu moni ki te Aliki.” Ma na ia tauānaua ai kimātou ke ōake.
Kua Falepuipui ia Paulo ma Hila i Filipi
16I tētahi aho, ka koi āgai atu kimātou ki te mea nae māhani oi fai talohaga ai, kae fakafetaui mai kimātou e he tautiti-pologa nae ulufia e he agaga kino, ma nae ia mafaia oi vavalo nā mea ka tutupu i te lumanaki. Nae lahi nā tupe nae ia maua mo tona matai, e ala i ana mea fakataulāitu nae fai mo tagata tau toka tahi. 17Nae mulimuli te tautiti-pologa kia Paulo ma kimātou ma taufōlua vē, “Ko nā tamāloa iēnei ni kaukauna e a te Atua Hilihilikehe! E fakailoa atu e kilātou te auala e mafai ai koutou ke fakaolagia.” 18E lahi lele nā aho nae fai ai tana mea tēnei, ma na fai ma mea kua tīgā ai te loto o Paulo, oi na māfuli atu ai ma lea vē atu ki te agaga kino, “I te igoa o Iehu Keliho e kō fakatonua atu ai koe ke hau loa ki fafo o te tautiti tēnā!” Ko te taimi lava tēnā, na fano ai te agaga kino ki fafo o te tautiti.
19Kua hāfia e nā matai o te tautiti ko te avanoa ke maua ai ni a lātou tupe kua fakahēai, oi na puke ai e kilātou ia Paulo ma Hila ma toho ki te fale fakamahino i te mea nae tumu ai ia tagata. 20Kua kave e kilātou ki mua o nā fakamahino ma na lea vē atu ai ki ei, “Ko nā tino iēnei ni Iutaia, ma e fai e kilāua nā mea e fakavevehi ai to tātou kakai. 21E akoako e kilāua nā tu e fakahā i te tātou tūlāfono; ko kitātou ni tagatānuku Loma, ma e hē tatau ke talia pe mulimuli kitātou ki nā tu ma nā aga iēnei.” 22Ma na kaukau fakatahi ai te kaifenua ma kilātou ma taumafai ke fakaogohia ia Paulo ma Hila.
Oi na fakatonu ai e nā fakamahino ke hae kehe nā kofu o Paulo ma Hila, kae kini. 23Kua uma te kini tīgāina o kilāua, oi na togi ai ki te falepuipui ma te fakatonuga ki te pule o te falepuipui, ke loka mau te toka lua. 24I te mauaga o te fakatonuga tēnei e te pule o te falepuipui, oi na tuku ai te toka lua ki te potu tūloto o te falepuipui, ma loka nā vae ki ni poloka lākau mamafa.
25I te taimi pe ko te tūlua o te pō, ko Paulo ma Hila nae tatalo ma uhu a lā pehe halamo e viviki ai ki te Atua, ka ko iētahi pāgotā nae fakalogologo ki ei. 26Kae nā lava e teki kua tō he mafuie lahi ma na lūlū ai te falepuipui i ona fakavae. I te taimi lava tēnā na mātalatala ai nā faitotoka o te falepuipui ma pakukū kehe nā filifili mai nā pāgotā uma lele. 27Na teki ake ki luga te pule o te falepuipui, ma i te ia kiteaga ko nā faitotoka o te falepuipui kua mātalatala, na vē ake ai tona manatu ko nā pāgotā kua hōhola kehe; oi na unu ake ai tana pelu ma kua tau pule ki tona ola. 28Kae na kalaga leo lahi vē atu ki ei ia Paulo, “Nahe faia e koe te mea tēnā! Ko kimātou uma e i kinei!”
29Na kalaga ai te pule o te falepuipui ke kaumai he mōlī, ma na fano fakavave ai ki loto o te falepuipui ma kua fakapakū ki nā vae o Paulo ma Hila, e tatapa i te mataku. 30Oi na takitaki ai e ia te toka lua ki fafo ma na fehili vē atu ki ei, “Nā tamana, heā nei te tatau ke kō faia ke fakaola ai au?”
31Na tali mai kilāua, “Talitonu ki te Aliki ko Iehu, oi ka fakaola ai koe—ko koe ma tō kāiga.” 32Oi na folafola ai e kilāua te kupu a te Aliki ki te pule o te falepuipui, vēnā ma nā tino uma i tona fale. 33I te taimi lava tēnā i te pō, na kave ai te toka lua e te pule o te falepuipui ke fufulu o la manuka; ma na papatiho ai lava i te taimi tēnā te pule o te falepuipui ma tona kau kāiga uma. 34Oi na kave ai e ia ia Paulo ma Hila ki tona fale ma na fai ai te lā katiga i kinā. Na fakatumulia i te fiafia te pule o te falepuipui ma tona kau kāiga, auā ko kilātou kua talitonu ki te Atua.
35I te tāeao alafaki, na uga ai nā leoleo e nā fakamahino ma te fakatonuga e vēnei, “Tatala loa nā tāulelea iēnā ke olo.”
36Oi na lea vē atu ai te pule o te falepuipui kia Paulo, “Kua kaumai te fakatonuga a nā fakamahino ke tatala koulua ma Hila ke olo. Ōmamai la keinā olo i te fīlēmū.”
37Ka kua lea vē atu ia Paulo ki nā leoleo, “E hēki iei he fakamāoniga o ni holitūlāfono a kimāua, kae ko kimāua na kini i mua o tagata —oi ka ko kimāua ni tagatānuku Loma! Na togi kimāua e kilātou ki te falepuipui. Kae nei kua fofou ko kimāua ke tatala munimuni mai te falepuipui? E hēai he mea vēnā! E tatau lava ke ōmamai nā fakamahino ki kinei oi tatala kimāua.”
38Na fakapa lava nā kupu iēnei e nā leoleo ki nā fakamahino; ma i te iloaga e kilātou ko Paulo ma Hila ni tagatānuku Loma, oi na lagona ai e kilātou te mātataku. 39Ma na olo ai oi fakatokehe ki te toka lua; oi na takitaki ai te toka lua e kilātou ki fafo o te falepuipui ma na fakatonu ai ke olo kehe ma te kakai. 40Na olokehe ai loa ia Paulo ma Hila mai te falepuipui, ma kua olo ki te fale o Litia. I kinā, na feiloaki ai kilāua ma nā tino kua talitonu kia Iehu, ma na kavatu e kilāua ni kupu fakamākeke kia te kilātou, oi na olokehe ai.
Bible Society New Zealand Charitable Trust