Gāluega 13
13
Kua Filifilia ia Panapa ma Haulo mo he Fekau Fakapitoa
1Nae i te Ekalehia i Anitioka he vāega o te kau pelofeta ma ni faiākoga: ko Panapa, ko Himeona (nae fakaigoa ko te Nekelō), ko Loukio (mai Kulene), ko Manaene (tēia na ola fakatahi ake ma Helota#13.1 Helota Helota Anitipaha, te tupu o Kalilaia (kikila ki te Luk 3.1) te kōvana), ma Haulo. 2Ka koi tautua kilātou ki te Aliki ma fakalāina, kae kua vāgana vē atu ki ei te Agaga Paia, “Fakatō mo oku ia Panapa ma Haulo, ke faia te gāluega kua filifili e au mo kilāua.”
3Na fakalāina ai ma tatalo ia tagata o te Ekalehia; kua fakaeke o lātou lima ki luga o te toka lua tēnei, ma na uga ai ke olo.
Kua Taunuku ia Panapa ma Haulo ki Kupulona
4I te ugaga o Panapa ma Haulo e te Agaga Paia, oi na olo ai ki Heleukeia, ma na malaga ai i he vaka mai kinā ki te motu ko Kupulona. 5Kua pa atu kilāua ki Halamihi, oi na tālaki ai e kilāua te kupu a te Atua i loto o nā hūnako o tagata Iutaia. Nae i kinā foki ia Ioane Maleko ke fehoahoani ki te gāluega.
6Na malaga atu kilāua mai kinā ki Pafoho i tētahi itū o te motu, ma ko kinā na fetaui ai ma he taulāitu nae igoa kia Pala Iehu,#13.6 Pala Iehu i te gagana Alamaika ko tona uiga ataliki o Iehu, pe ataliki o Iohua he tino Iutaia nae lea ko ia ko he pelofeta, oi kae hē ko he pelofeta. 7Nae he uō ia e a Hekio Paulo, te Kōvana o te motu. Ko Hekio he tino poto ma na fekau e ia ia Panapa ma Haulo ke ōake, ona nae fia fakalogo ki te kupu a te Atua. 8Kae na teteke kia te kilāua te taulāitu ko Eluma (ko tona igoa ia i te gagana Eleni), ma nae taumafai ke tataki kehe te Kōvana ke nahe talitonu ki te Atua. 9Ma na fakatumulia ai ia Haulo—nae igoa foki kia Paulo—e te Agaga Paia; ma na kikila hako atu ia Paulo ki te taulāitu, 10ma lea vē atu ki ei, “Ko koe ko te ataliki o te Tiāpolo! Ko koe ko te fili o nā mea uma e lelei. Ko koe kua tumu i nā itūkāiga togafiti kino uma, ma e taumafai pea lava koe ke fakaliliu te kupu moni a te Aliki ke fai ma kupu pepelo! 11Ko te mea ia ka pakū atu ai ki ō luga te lima o te Aliki i te taimi nei lava; ko koe ka tāuaho ma ka hē kē kitea te mālama o te aho mo he taimi.”
I te taimi lava tēnā na hau ai he puao uliuli ki luga o Eluma kua pupuni ai ona mata, oi na havali holo ai lava ke tau ia ki he tino ke takitakia ia i te lima. 12I te kiteaga e te Kōvana o te mea kua tupu, oi na talitonu ai loa; auā na ofo lahi lele ki nā akoakoga e uiga ki te Aliki.
Kua Olo ia Panapa ma Paulo ki Anitioka i Pihitia
13Oi na folau ai ia Paulo ma ona hoa mai Pafoho ma na taunuku atu ki Peleka, he kakai i Pamefulia; ko kinā te na tēteka ai kilātou ma Ioane Maleko ona na toe foki ki Ieluhalema. 14Na fakaauau pea te lātou malaga mai Peleka ma taunuku ki Anitioka i Pihitia; ma i te Hāpati, na olo ai ki te hūnako ma na nonofo ai ki lalo. 15Kua uma te faitauga mai te Tūlāfono a Mohe ma nā tuhituhiga a te kau pelofeta, oi na kave ai te faifekau a nā takitaki o te hūnako kia te kilātou e vē, “O mātou uho, kāfai e iei hautou kupu fakamālohi mo te fakapotopotoga, e mafai ke fai i te taimi nei.” 16Na tū atu loa ia Paulo, kua fakatū atu tona lima ki te fakapotopotoga ma na kāmata ai loa oi tautala:
“Koutou oku tagata Ihalaelu ma tagata nukukehe uma i kinei e tāpuaki ki te Atua: fakalogo mai! 17Ko te Atua o tagata Ihalaelu te na filifilia o tātou tupuna ma na faia ma mālō tokalahi, i nā aho nae nonofo ai i Aikupito. Ko te Atua te na ia kaumaia kilātou mai Aikupito i tona mālohi lahi,#Eho 1.7; 12.51 18ma e fa hefulu ia tauhaga nae onohai ai lava te Atua i o lātou uiga,#13.18 onohai ai… lātou uiga ko iētahi tuhituhiga e lea mai tauhi ai lava kilātou e te Atua i te toafa.#Nūm 14.34; Teu 1.31 19Na ia faia ke fakatōkilalo nā mālō e fitu i te fenua nae igoa ko Kanana, ma ia fōkia te fenua ke fai ma tofi o ona tagata.#Teu 7.1; Ioh 14.1 20Ko nā mea uma iēnei na tutupu i ni tauhaga e 450.#Fkm 2.16; 1 Ham 3.20
“Kua uma atu te mea tēnei,#13.20 Ko nā mea uma iēnei na tutupu i ni tauhaga e 450. “Kua uma atu te mea tēnei pe Kua teka atu he 450 tauhaga oi na fōki ai e te Atua o lātou fakamahino, ke pa ki nā aho o te pelofeta ko Hamuelu. 21Ma i te leaga o kilātou kia Hamuelu ki ho lātou tupu, oi na filifili ai e te Atua ia Haulo te ataliki o Kihi, mai te puikāiga o Peniamina, ke fai ma o lātou tupu mo ni tauhaga e fa hefulu.#1 Ham 8.5; 10.21 22I te kave kehega e te Atua o Haulo, oi na filifili ai ia Tavita e ia ke fai ma tupu ke hui kia Haulo. Ko tēnei te vāgana a te Atua e uiga kia Tavita, ‘Kua iloa e au ko Tavita te ataliki o Iehe, ko te itūkāiga tagata ia e fofou au ki ei; he tino ka ia faia nā mea uma e fofou au ki ei.’#1 Ham 13.14; 16.12; Hal 89.20 23Kae ko Iehu, tē na tupuga mai ia Tavita, te na fai e te Atua ma Fakaola o tagata Ihalaelu, e vē ko te mea na folafola e ia. 24Ka ko hēki kāmatagia te gāluega a Iehu, kae kua tālaki e Ioane ki tagata e tokalahi o Ihalaelu, ke liliu kehe mai a lātou agahala, ma ke papatihogia.#Mlk 1.4; Luk 3.3 25Ma kua tau fakauma te gāluega a Ioane, oi na lea vē atu ai ki nā tino, ‘Ko koutou nei e vēakē ko ai au? E hē ko au te tino e fakatalitali koutou ki ei. Kae fakalogo mai! Ko te tino e fakatalitali koutou ki ei e hau mulimuli kāfai e uma aku gāluega, ma e hē aogā au ke kō kave kehea ona hēvae mai ona vae.’ #Mat 3.11; Mlk 1.7; Luk 3.16; Ioa 1.20, 27
26“Te kau uho, koutou nā lāpuna o Apelaamo, ma nā tino nukukehe e tāpuaki ki te Atua: ko te fekau e uiga ki te fakaolataga, kua kaumai mo kitātou. 27Auā e hēki iloa e nā tino e nonofo i Ieluhalema ma o lātou takitaki, ko Iehu ko te Fakaola, ma e hēki mālamalama foki kilātou i nā kupu a te kau pelofeta e faitau ki tagata i Hāpati takitahi uma. Ka kua kavea te fakahalagia e kilātou o Iehu, ma mea kua fakatāunuku ai nā kupu a te kau pelofeta. 28Ma e ui lava e hēki kilātou maua he mea e tatau ke fakahala ai ia Iehu i te oti, kae na lea lava kia Pilato ke tāmate ia Iehu.#Mat 27.22-23; Mlk 15.13-14; Luk 23.21-23; Ioa 19.15 29Ma ina kua uma te fakatāunuku e kilātou o nā mea uma e lea mai ai nā Tuhituhiga Paia e uiga kia Iehu, oi na tuku ifo ai e kilātou tona tino ki lalo mai te hātaulo, ma tuku ai ki loto o he tugamau. #Mat 27.25-61; Mlk 15.42-47; Luk 23.50-56; Ioa 19.38-42 30Kae na toe fakatū mai ia e te Atua mai te oti, 31ma e lahi nā aho na fakakitea ai ia ki nā tino na malaga fakatahi ma ia, mai Kalilaia ki Ieluhalema. Ko kilātou iēnei te kua kavea ma molimau e uiga kia te ia, ki tagata o Ihalaelu. #Gāl 1.3 32-33Ma ko kimāua e i kinei ke kaumai te Tala Lelei kia te koutou: ko te mea na folafola e te Atua ki o tātou tupuna e ia faia, kua uma te ia fakatāunukua mo kitātou o lātou lāpuna, e ala i te toe fakatū mai o Iehu mai te oti. E vē oi tūhia i te lua o Halamo: #Hal 2.7
‘Ko koe ko toku Ataliki;
i te aho nei ko au kua kavea ma ō Tamana.’
34Ma ko tēnei te vāgana a te Atua e fakatatau ki te toe fakatū mai o tona Ataliki mai te oti, ma tona tino e hē pala i te tugamau: #Iha 55.3 (LXX)
‘Ka fōki atu e au kia te koe
nā fakamanuiaga e paia ma moni,
na folafola e au kia Tavita.’
35E vē foki lava oi tūhia i nā Tuhituhiga paia: #Hal 16.10
‘Ka hē kē tukua tau kaukauna fakamāoni,
ke pala i te tugamau.’
36Auā na fakatāunuku e Tavita nā fuafuaga a te Atua ka koi ola ai. Kae i te otiga, na tanu fakatahi ma ona tupuna, ma na pala tona tino. 37Kae e hēki vēnei te mea na pa ki tē na fakatū e te Atua mai te oti. 38-39Te kau uho, ko au e fofou ke koutou iloa ko te fekau e uiga ki te fakamāgaloga o nā agahala, e folafola atu kia te koutou e ala ia Iehu; ma ko kilātou uma e talitonu kia te ia, e fakahaoloto mai nā agahala uma e hē mafai e te Tūlāfono a Mohe oi fakahaoloto mai ai koutou. 40Ia koutou la ke fakaetēte, kae ke nahe taunuku te mea na vavalo e te kau pelofeta e tupu kia te koutou:#13.40 Ko iētahi tuhituhiga e hē i loto ai te kia te koutou
41‘Kikila, koutou te kau fakatauemu!
Ke ōfo lele koutou ma mou kehe atu ai! #Hap 1.5 (LXX)
Auā ko te mea e kō faia i te aho nei,
ko he mea ka hē talitonu lele koutou ki ei,
e tuha lava pe fakamālamalama atu
e he tino kia te koutou!’ ”
42Kua tutū atu ia Paulo ma Panapa ka olo kehe mai te hūnako, kae na talohaga mai ki ei ia tagata ke toe ōmamai i te Hāpati ka hohoko mai, ke fakaauau a lā talanoaga ki nā mea iēnei. 43Kua takape te māopōpoga i te hūnako, oi na mulimuli ai kia Paulo ma Panapa ni tino Iutaia e tokalahi, vēnā ma ni tino nukukehe e tokalahi na liliu ki te tāpuakiga Iutaia. Na tautatala kia te kilātou te kau apohitolo, ma na fakamākeke ki ei ke tūmau pea to lātou ola fakalagolago ki te alofa tūnoa o te Atua.
44I te Hāpati na hohoko ai, na ōmamai ai toetoe lava ko nā tino uma lele i te kakai, ke fakalogologo ki te kupu a te Aliki. 45I te kitea atuga e nā tino Iutaia te kaifenua tokalahi, oi na fakatumulia ai kilātou i te lotokino; kua taku pepelogia e kilātou nā mea na lea ai Paulo, ma faikupu kino ki ei. 46Kae na ātili ai te hē mātataku o Paulo ma Panapa ma na lea vē atu ai kia te kilātou, “Ko te kupu a te Atua na folafola muamua atu kia te koutou, ma ko he mea e hako lava. Kae ona ko koutou e teteke ki ei ma iei outou manatu ko koutou e hē aogā ke maua e koutou te ola e fakavavau, ka tuku ai koutou e kimāua kae olo ki nā tino nukukehe. 47Auā na fakatonu mai kitātou e te Aliki i te vāgana maiga vē,#Iha 42.6; 49.6
‘Kua kō faia koe ma mōlī ki tagata nukukehe,
kae ke kave ai e koe te fakaolataga
ki nā pito o te lalolagi.’ ”
48I te lagonaga o te mea tēnei e tagata nukukehe, na fiafia lele kilātou ma fakafetai ki te Aliki mo tana fekau; ma ko kilātou uma kua filifilia e te Atua mo te ola e fakavavau, kua talitonu.
49Kua halalau te kupu a te Aliki ki itū uma o te koga tēnā. 50Kae na fakakupu e nā tino Iutaia nā takitaki o te kakai ma nā fafine nukukehe fakaaloalogia kua talitonu ki te Atua, ke teteke mālohi kia Paulo ma Panapa, ma na tuli kehe ai kilāua e kilātou mai to lātou nuku. 51Na tūtū kehe e nā apohitolo te pefu mai o lā vae, ke fakailoa ai ki tagata o te kakai to lā hē fiafia, ma na olo ai ki Ikononu.#Mat 10.14; Mlk 6.11; Luk 9.5; 10.11 52Ko nā tino kua talitonu ki te Atua i Anitioka na fakatumulia i te fiafia lahi, ma i te Agaga Paia.
Bible Society New Zealand Charitable Trust