Gāluega 14
14
Kua Tālaki te Tala Lelei e Paulo ma Panapa i Ikononu
1Ko te mea na fai e Paulo ma Panapa i Anitioka, na fai foki e kilāua i Ikononu. Na olo ki te hūnako e tāpuaki ai nā tino Iutaia ma folafola atu ai te Tala Lelei, ma na tokalahi lele nā tino na talitonu kia Iehu, nā tino Iutaia vēnā ma ni tino nukukehe. 2Kae ko nā tino Iutaia na hēki talitonu, na fakakino e kilātou nā loto o tagata nukukehe, kae ke teteke ai kilātou ki nā tino kua talitonu. 3Na mataloa lele te taimi na nonofo ai nā apohitolo i kinā. Nae hē mātataku lele oi tautatala e uiga ki te Aliki, tē na ia fakamāoniagia te moni o te lā fekau e uiga ki tona alofa tūnoa, e ala i te mana na ia tuku akea kia te kilāua ke fai ai nā vāvega ma nā mea ofōfogia. 4Kua vāelua nā tino o te kakai: ko iētahi na kau ki nā tino Iutaia, ka ko iētahi na kau ki nā apohitolo.
5Oi na fai ai te tonu a ni tagata nukukehe ma ni tino Iutaia fakatahi ma o lātou takitaki, ke honafai e kilātou nā apohitolo ma ke fetogi i nā fatu. 6I te iloaga e nā apohitolo te tonu tēnei, oi na hōhola ai ki nā kakai ko Luhitala ma Tepe i Lukaonia, ma iētahi koga nae pili ki ei. 7I kinā na folafola ai e kilāua te Tala Lelei.
Kua Tālaki te Tala Lelei e Paulo ma Panapa i Luhitala ma Tepe
8Nae i Luhitala he tamāloa nae pipili talu te fānau mai, ma na hēki mafai lele ke havali. 9Nae nofo i kinā ma fakalogologo ki nā kupu nae tautala ai ia Paulo. Kua kitea atu e Paulo ko te tamāloa kua talitonu ma e mafai ke fakamālōlō, oi na kikila hako atu ai ki ei 10ma na lea vē atu ai i he leo lahi, “Tū hako ake ki luga!” Na tū loa ki luga te tamāloa ma na kāmata oi hāvalivali. 11I te kitea atuga e te kaifenua te mea na fai e Paulo, oi na kāmata ai oi taukālalaga i te lātou gagana Lukaonia, “Ko nā atua kua liu tagata ma kua ōifo ki lalo kia te kitātou!” 12Oi na fakaigoa ai e kilātou ia Panapa ki te atua ko Heuhu, kae fakaigoa ia Paulo ki te atua ko Heleme, auā ko ia lava te nae māhani oi tautala.#14.12 Heuhu… Heleme Ki nā tino Eleni, ko Heuhu ko te atua pule hili, ma ko Heleme ko te failāuga mo nā atua. Ko nā tino i nā koga iēnei nae fai a lātou tala ko Heuhu ma Heleme nae māhani oi kitea e vē ni tagataola 13Ko te ohitāulaga a te atua ko Heuhu, tēia nae tū tona mālumalu i fafo mālie atu o te kakai, na kave e ia ni pōvi poa ma ni pale tiale ki te faitotoka ki loto o te mālumalu, auā na fofou ia fakatahi ma te kaifenua, ke ohi he tāulaga ki nā apohitolo.
14I te fakalogoga o nā apohitolo ko Paulo ma Panapa ki te mea tēnei, oi na hae ai o lā kofu ma fetutuli ki lototonu o te kaifenua ma na taukālalaga ai vēia, 15“Heā te fai ai e koutou te mea tēnei? Ko kimāua ni tagataola e vē foki lava ko koutou! Ko kimāua e i kinei ke folafola atu te Tala Lelei kia te koutou, kae ke mafai koutou ke olokehe mai nā mea iēnā e hēai he aogā, kae liliu ki te Atua na faia te lagi, te lalolagi, te tai ma nā mea uma i loto.#Eho 20.11; Hal 146.6 16I nā aho kua loa, na ia tukua ia tagata uma ke fai lava te mea nae loto ki ei te tino. 17Kae kua fakaali pea lava e ia nā fakamāoniga ke iloa ai e tagata ko ia ko te Atua, e ala i nā gāluega lelei e fai e ia; e ia fōki atua nā ua mai te lagi ma nā fuata o lākau i nā taimi e tatau ai; e ia fōkia atua nā meakai, ma fakatūtumua nā loto o koutou i te fiafia.” 18E ui i nā kupu iēnei, kae na tau hē kilā mafaia oi tāofiofi te kaifenua, mai te ohiga o he tāulaga kia te kilāua.
19E iei ni tino Iutaia na ōmamai mai Anitioka i Pihitia ma Ikononu; na kilātou mafaia oi tataki ia manatu o te kaifenua ke kau ake kia te kilātou. Na fetogi ai e kilātou ia Paulo i nā fatu ma toho ki fafo o te kakai, ma to lātou manatu lava ko Paulo kua mate. 20Kae i te ōatuga o te kau Kelihiano ki te mea nae iei ai ia Paulo, na tū ake ai ia ki luga ma kua toe foki ki te kakai. I te aho alafaki, na olo ai ma Panapa ki Tepe.
Kua Toe Foki ia Paulo ma Panapa ki Anitioka i Hulia
21Na tālaki e Paulo ma Panapa te Tala Lelei i Tepe, ma nae tokalahi nā tino na maua ke fai ma hoko o Iehu. Oi na toe foki ai kilāua ki Luhitala, ma Ikononu, ma ki Anitioka i Pihitia. 22Na fakamālohi atu kilāua ki nā tino kua talitonu kia Iehu ma apoapoaki ki ei ke pipiki mau ma te fakamāoni ki to lātou fakamoemoe kia Iehu. Na lea vē atu kilāua, “E tatau kitātou ke kui i loto o ni puapuagā e lahi, oi ulu atu ai kitātou ki te Mālō o te Atua.” 23Na tōfia e kilāua ni toeaina mo nā Ekalehia takitahi, ma i na kua uma ona tatalo ma fakalāina, oi na ofo atu ai kilātou ki te Aliki, tēia kua tuku ki ei to lātou fakamoemoe.
24Oi na kui atu ai kilāua i loto o Pihitia ma na taunuku atu ki Pamefulia. 25I kinā, na tālaki ai e kilāua te Tala Lelei i Peleka, ma na olo ai ki Ataleia, 26ma mai kinā, na folau atu ai ki Anitioka, te nofoaga na tuku atu ai kilāua ki te kikilaga ma te alofa tūnoa o te Atua, mo te gāluega tēia kua uma te fakatino e kilāua.
27Kua pa atu kilāua ki Anitioka, oi na fakapotopoto ai e kilāua ia tagata o te Ekalehia, ma na fakamatala ai ki ei nā mea na fai e te Atua kia te kilāua, ma te auala na ia hāuniagia ke mafai ai ia tagata nukukehe ke talitonu. 28Na mataloa te taimi na nonofo ai kilāua ma te kau Kelihiano i kinā.
Bible Society New Zealand Charitable Trust