Gāluega 12
12
Kua Fakaātili te Lahi o nā Fakahāuāga
1E tuha pe ko te vāitaimi tēnei, te na kāmata ai nā fakahāuāga a te Tupu ko Helota,#12.1 tupu ko Helota Helota Akalipa 1, te tupu o Palehetina ki ni tino o te Ekalehia. 2Na ia fakatonua ke tāmate i te pelu, ia Iakopo te uho o Ioane. 3I te ia kiteaga ko nā tino Iutaia nae fiafia ki te mea tēnei, oi na fakatonu ai foki e ia ke puke ia Petelu. (Na tupu te mea tēnei i te taimi o te Kaiga Fakamanatu o nā Falaoa hē Fakafefetea.) 4Na uma te puke o Petelu, oi na kave ai ki te falepuipui, ma na tukulima atu ai ke leoleo e ni vāega fitafita tau toka fa. Na fuafua e Helota ke fai te fakamahinoga o Petelu i mua o tagata, kāfai e uma te Pāheka.#Eho 12.1-27 5Oi na tāofi ai lava ia Petelu i te falepuipui; kae ko tagata o te Ekalehia nae tatalo fakatauānau lava ki te Atua mo Petelu.
Kua Tatala ia Petelu mai te Falepuipui
6I te pō lava na tonu ai ia Helota ke kave ia Petelu ki mua o tagata, ko Petelu nae moe i te vā o ni fitafita e toka lua. Nae hāihai nā lima i ni filifili e lua, ma nae iei nā fitafita nae leoleoa te faitotoka ki te falepuipui. 7Kae nā lava e teki ko he āgelu a te Aliki kua tū mai, ma he mālama kua huhulu i loto o te potu nae iei ia Petelu. Na paki atu te āgelu ki te takuau o Petelu, oi na ala ai ia Petelu, ma kua lea vē atu te āgelu ki ei, “Fai vave! Tū loa ki luga!” Ko te taimi lava tēnā na pakukū kehe ai nā filifili nae i ona lima. 8Oi na lea atu ai te āgelu, “Fai tō fuhipaku, ma nonoa nā taka o koe.” Na vēnā lava ona fai e Petelu, oi na lea vē atu ai te āgelu kia te ia, “Fai tō kofuloloa, oi hau ai tā olo.” 9Ma na mulimuli ai ia Petelu ki te āgelu ki fafo o te falepuipui, ma te hē ia iloa pe ko te mea a te āgelu na fai e moni; na vēake lava ia ko he fakaaliga te na ia kiteagia. 10Kua fakahao e kilāua te vāega muamua o nā leoleo vēnā ma tona lua, oi na tau atu ai loa ki te faitotoka ukamea nae kui ai ki loto o te kakai. Na matala te faitotoka mo kilāua kae nae hēki tatalā e he tino, ma na olo ai kilāua ki fafo. Ka koi hāvavali atu kilāua i te auala, kae nā lava e teki ko te āgelu kua fano kehe ma Petelu.
11Na hāfia loa e Petelu te mea kua tupu, oi na lea vē ai, “Kua kō iloa i te taimi nei ko te mea na pa au ki ei, na tupu moni lava! Na uga mai e te Atua tana āgelu ke lāveaki au mai te pule a Helota,#12.11 Helota Akalipa 1, te tupu o Palehetina ma mai nā mea uma na vēake ia tagata Iutaia e tutupu.”
12Na hāfia loa e Petelu te mea kua tupu, oi na fano ai ki te fale o Malia, te mātua o Ioane Maleko. E tokalahi nā tino nae māopōpo i kinā ma nae fai talohaga ai. 13Na tukituki e Petelu te faitotoka pito ki fafo, ma na hau ai te kaukauna nae igoa kia Loha ke kikila pe ko ai. 14Na ia matea te leo o Petelu, oi na toe vili ai ki lotofale i tona fiafia lahi kae kua hē tatala e ia te faitotoka, ma na lea vē atu ai, “Ko Petelu e tū i fafo.” 15Kae na lea vē mai kilātou ki ei, “Ko tō māfaufau e vē e hē lelei!” Kae na viga lava te kaukauna ko he mea moni te na lea ake ai ia. Oi na tali vē atu ai kilātou kia te ia, “Ko te āgelu nei a ia!”
16I te taimi tēnā, nae tukituki lava te faitotoka e Petelu, ma na tatala ai loa e kilātou te faitotoka. Na ofo lele kilātou i te kiteaga e kilātou o Petelu. 17Na tautala lima atu ia Petelu kia te kilātou ke nahe piha, ma na fakamatala ai e ia kia te kilātou te tatalaga o ia e te Atua mai te falepuipui. Ma na lea vē atu ai, “Taku kō la te mea tēnei kia Iakopo ma iētahi uho Kelihiano,” ma na fano kehe ai loa ia mai kinā, kua fano ki hētahi koga.
18I te aho alafaki, na matuā hē hāfia lava e nā leoleo i te falepuipui, pe ko heā te na tupu kia Petelu. 19Na fakatonu ai e Helota#12.19 Helota Akalipa 1, te tupu o Palehetina ke hakili ia Petelu, kae hēki kilātou maua. Oi na hukehuke ai e ia nā leoleo i te falepuipui ma na fakatonu ai e ia ke tāmate kilātou.
Na uma atu te mea tēnā, oi na fano kehe ai ia Helota mai Iutea, ma kua fano oi nofo i Kaihaleia mo he vāitaimi.
Ko te Mate o Helota
20Na ita lahi lele ia Helota ki tagata o Tulo ma Haitonu, ma ko te mea ia na olo fakatahi ai nā hui mai nā nuku iēnei oi kikila ia Helota. Na kilātou mua fakakupua ia Palahito, te kaukauna pule i te fale o te tupu, ke fehoahoani ake kia te kilātou. Oi na olo ai kia Helota ma fakatagi ki ei mo he fakaleleiga, ona ko to lātou fenua nae fakalagolago ki te mālō o te tupu mo nā hapalai meakai. 21Na maua te avanoa o kilātou, ma i te aho tēnā na kofu ia Helota i ona kofu tau tupu, ma na nofo ai i tona nofoāliki ma lāuga atu ki tagata. 22Na taukālalaga vē mai ai ia tagata, “E hē ko he tino te tautala kae ko he atua!” 23Ko te taimi lava tēnā na fakatauale ai ia Helota e te āgelu, ona kua hē ia kavea he vīkiga ki te Atua; na kai tona tino e anufe ma na mate ai lava.
24I te taimi tēnā ko te kupu a te Atua kua halalau pea lava ma tupu olaola.
25Kua uma te fakatino e Panapa ma Haulo te mea na ala ai ona olo ki Ieluhalema, oi na toe olo kehe ai ma kave e kilāua ia Ioane Maleko.
Bible Society New Zealand Charitable Trust