Gāluega 11
11
Ko te Līpoti a Petelu ki te Ekalehia i Ieluhalema
1Kua lagona e te kau apohitolo ma nā tino i Iutea kātoa kua talitonu ki te Aliki, kua talia e tagata nukukehe te kupu a te Atua. 2I te fanoga la o Petelu ki Ieluhalema, na fakaheā ki ei nā tino nae manatu ko tagata nukukehe e tatau ke pelitome. Na lea vē kilātou, 3“Ko koe nae nofo i te kāiga o ni tino nukukehe ko hēki pelitomeagia, ma kakai fakatahi ma kilātou!” 4Oi na fakamatala ai loa e Petelu kia te kilātou te mea na tupu i te kāmataga lava:
5“Ko au nae tatalo i te kakai ko Iopa, ma na kō kitea ai he fakaaliga. Na kitea e au he mea na fanaifo mai te lagi e vē he kiekafu lahi lele, e tukutuku ifo i ona pito e fa, ma na fanaifo ai ki oku tafa. 6Na kikila fakalelei au ki loto, oi na kō kitea ai ni manu tauhi ma ni manu tāvao, ni manu fetolofi ma ni manulele. 7Oi na lagona ai e au he leo na lea vē mai kia te au, ‘Petelu, tū ki luga oi tāmate, ma kai!’ 8Kae na lea vē atu au, ‘E hē kō faia he mea vēnā, te Aliki. Ko au e hēki kai lele ki he mea e hē mamā i nā tu tau tāpuakiga, pe hē tatau ke kai au ki ei.’ 9Na toe lea vē mai te leo mai te lagi, ‘Ho he mea kua fakailoa mai e te Atua e mamā, e hē tatau ke lea koe e hē mamā.’ 10Na fakatolu lava ona fakatonu vēnei ia Petelu e te Atua, oi na toe kavake ai te mea kātoa tēnei ki te lagi. 11Ko te taimi tonu lava tēnā na taunuku ifo ai ni tāulelea e toka tolu mai Kaihaleia, ki te fale nae nofo ai au.#11.11 nofo ai au ko iētahi tuhituhiga e lea mai nonofo ai kimātou 12Ma na lea mai te Agaga Paia kia te au ko au nahe fakalotolotolua kae ke olo loa ma nā tāulelea. Na olo fakatahi kimātou ki Kaihaleia ma ni tino kua talitonu e toka ono mai Iopa, ma na olo uma foki kimātou ki te fale o Konelio. 13Na fakamatala mai e Konelio kia te kimātou te ia kiteaga o he āgelu nae tū i loto o tona fale, ma na lea vē ake ai, ‘Uga he tino ki Iopa, ke lea ki he taulealea e igoa kia Himona Petelu ke hau. 14Ka tautala atu ia kia te koe i nā kupu e fakaola ai koe, vēnā ma tō kaukāiga kātoa.’ 15Ma i te kāmataga oi tautala au ki ei, kae na fanaifo te Agaga Paia ki o lātou luga, e vē foki lava ko te fanaifoga ki luga o kimātou, i te kāmataga. 16Oi na kō manatua ai te vāgana a te Aliki, ‘Na papatiho e Ioane i te vai, kae ka papatiho koutou i te Agaga Paia.’#Gāl 1.5 17E manino lele na fōki e te Atua ki nā tino nukukehe iēnā te meālofa lava e tahi tēia na ia fōki maia kia te kitātou, ina kua talitonu kitātou ki te Aliki ko Iehu Keliho; ko ai nei la au, ke kō tāofia ai te mea e fofou ki ei te Atua!”
18I te fakalogoga o kilātou ki te mea tēnei, oi na uma ai foki to lātou fakaheā, kae kua viviki ake ki te Atua, ma lea vēia “Kua tuku atu foki la e te Atua te avanoa ki tagata nukukehe ke halamō, ma ke maua ai e kilātou te ola.”
Ko te Ekalehia i Anitioka
19Ko iētahi o nā tino kua talitonu na halalau ona ko nā fakahāuāga na pa ki ei i te tāmatega o Hetefano, na pa lele ki Foenihia, Kupulona, ma Anitioka, ma na kilātou tālakia te fekau ki tagata Iutaia oioti.#Gāl 8.1-4 20Kae ko iētahi o kilātou, ni tino mai Kupulona ma Kulene, na olo ki Anitioka ma folafola te fekau ki tagata nukukehe,#11.20 ki tagata nukukehe ko iētahi tuhituhiga e lea mai ki nā tino e tautatala i te gagana Eleni ma e uiga ki te Tala Lelei ki te Aliki ko Iehu. 21Na fehoahoani lahi te Atua kia te kilātou ma na tokalahi lele nā tino na talitonu ma liliu ki te Aliki.
22Kua pa te tala tēnei ki te Ekalehia i Ieluhalema, oi na uga ai e kilātou ia Panapa ki Anitioka. 23I te pa atuga o ia ki ei, ma ia kiteagia nā fakamanuiaga a te Atua ki tagata, na lagona e ia te fiafia, ma na fakamālohi atu ai ia kia te kilātou uma, ke fakamāoni ma ke pipiki mau ki te Aliki ma te loto kātoatoa. 24Ko Panapa ko he tino lelei, nae tumu i te Agaga Paia ma te fakatuatua, ma e tokalahi ia tagata na kaumai ki te Aliki.
25Oi na fano ai ia Panapa ki Taheha oi hakili ia Haulo. 26I te ia mauaga, oi na kave ai e ia ki Anitioka, ma mo he tauhaga kātoa, nae māfuta kilāua ma nā tino o te Ekalehia, ma na ki lā akoakoa he vāega e tokalahi. Ko kinā i Anitioka te na muamua fakaigoa ai nā tino kua talitonu kia Iehu, ni Kelihiano.
27I te taimi tēnā, na ōifo ai ni pelofeta mai Ieluhalema ki Anitioka. 28Ko tētahi o kilātou iēnei ko Akapo, na tū ki luga ma fai tana vāloaga e ala i te mana o te Agaga Paia, ko he oge lahi e tuku e pa mai ki te lalolagi kātoa. (Na tupu te oge tēnei i nā aho o te pūlega a te Kaihala Kalautioho.)#Gāl 21.10 29Na tonu i te kau hoko, ko heā lava he mea e maua e kilātou tau toka tahi, ke kave ke fehoahoani ki te kau uho Kelihiano nae nonofo i Iutea. 30Na vēnā lava ona fai e kilātou, ma na momoli ai te tupe e Panapa ma Haulo, ki nā toeaina o te Ekalehia.
Bible Society New Zealand Charitable Trust