2 Kolinito 6
6
1Ko kimātou e kau fakatahi ma te Atua, oi e aioi atu ai kimātou kia te koutou iēnā kua taliagia te alofa tūnoa o te Atua, ke nahe fakamāumaua e koutou. 2Fakalogo ki te vāgana a te Atua,
“I te taimi tatau, na lagona ai e au koutou.
I te aho o te fakaolataga, na fehoahoani au kia te koutou.” #Iha 49.8
Kikila, ko tēnei te taimi tatau; kikila, ko tēnei te aho o te fakaolataga!
3Ko kimātou e hē fofou ke fāitio he tino kia mātou gāluega, oi e hē fāitiogia foki la e kimātou he gāluega a he tino. 4Kae ko nā mea uma e kimātou faia, e kitea ai ko kimātou ni kaukauna e a te Atua. Ko kimātou e onohai pea lava, e ui lava e maua kimātou i te lahi o puapuagā, fakafītāuli ma mea faigatā. 5Ko kimātou e kini, e falepuipui ma komahia i te nunu mai o tagata; e gālulue fītatā ma tau hē maua he moe, ma fia kakaia. #Gāl 16.23 6Ko te loto mamā, te mālamalama, te onohai ma te agalelei o kimātou, kua fakaalia ai ko kimātou ni kaukauna e a te Atua—e ala i te Agaga Paia, ma e ala i to mātou alolofa moni. 7E tālaki e kimātou ma te fakamāoni te meamoni e uiga ki te mana o te Atua. E fakaaogā e kimātou ia kaukupega o te āmiotonu i te lima taumatau ma i te lima tauagavale. 8Ko kimātou e tautua ki te Atua e tuha lava pe taku leleia kimātou e tagata pe inohia, pe fai kupu kino mai kilātou, pe fakavikiviki mai kia te kimātou. Ko faiga a tagata e fai mai kia te kimātou e vē ai kimātou ni tino talapepelo, oi ka ko kimātou e tautatala lava i te meamoni. 9E ui lava ko kimātou e iloa e tagata, kae e hēai he tino e fia tokaga mai; e ui lava ko kimātou kua tāli mamate, kae e vē oi koutou kitea, ko kimātou e ola lava. E ui lava e kini kimātou, kae e hē mamate ai kimātou. 10E ui lava ko kimātou e fakanoanoa, kae e fiafia pea lava kimātou i taimi uma; e ui lava e mātitiva, kae e tokalahi kua tamaokāiga ia te kimātou; e ui lava e hēai ni a mātou meatōtino, kae ko nā mea uma lele e a kimātou.
11Te kau uho pele i Kolinito, ko nā kupu kua tautatala atu ai kimātou e moni lava; ko kimātou e alolofa lahi atu kia te koutou. 12E hē ko kimātou te kua tapuni o mātou loto kia te koutou, kae ko koutou te kua tapuni outou loto kia te kimātou. 13Ko au e tautala atu e vē lava koutou ni fānau moni e āku; tatala lahi kō outou loto, ma alolofa mai foki kia te kimātou e vē oi alolofa atu kimātou kia te koutou.
Fakaetēte i nā Uiga Fakapaupau
14Koutou nahe taumafai ke gālulue kau fakatahi ma nā tino hē talitonu, auā e hē mafai he mea vēnā ke fai. E vēhea ona mafai ke fai mea fakatahi te āmiotonu ma te āmiokino? E vēhea ona mafai ke nonofo fakatahi te mālama ma te pōuli? 15E vēhea ona mafai ke maua he tahi ia Keliho ma Hatani? Niā ni mea e tutuha ai te tino kua talitonu ma te tino hē talitonu? 16E vēhea ona mafai ke talia nā tupua i loto o te mālumalu o te Atua? Auā ko kitātou ko te mālumalu ia o te Atua e ola! E vē oi vāgana te Atua,
“Ka mau fakatahi au ma oku tagata
ma havali fakatahi ma kilātou.
Ka fai au ma o lātou Atua,
ma ka kavea kilātou ma oku tagata.” #Lev 26.12; Ehk 37.27; 1 Kol 3.16; 6.19
17Kua vāgana foki te Aliki, #Iha 52.11
“Olo kehe ma kilātou,
nahe koutou toe nonofo fakatahi.
Koutou nahe paki atu ki te mea e hē mamā,
oi talia ai koutou e au.
18Ka kavea au ma outou tamana,
ma ka kavea koutou ma oku ataliki ma oku afafine,
kua vāgana ai te Aliki Mālohihilihili.” #2 Ham 7.14; 1 NT 17.13; Iha 43.6; Iel 31.9
Currently Selected:
2 Kolinito 6: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
