2 Kolinito 7
7
1Te kau uho pele, ko nā folafolaga iēnei kua uma te fai e te Atua mo kitātou. Ko te mea ia, fakamamā loa kitātou mai nā mea uma e hē mamā ai o tātou tino ma o tātou agaga, ma ke paia kātoatoa kitātou e ala i te mataku i te Atua.
Kua Fiafia ia Paulo ona ko te Ekalehia
2Tatala mai kō outou loto kia te kimātou. E hēki kimātou fakahehēa lele he tino; e hēki fai kino lele kimātou ki he tino, ma e hēki fakavalea lele e kimātou he tino. 3Ko taku lea atu vēnei e hē ko he fāitioga, auā kua uma lava toku lea atu ko koutou e pele lele i o mātou loto i taimi uma, pe ola kimātou pe oti. 4Ko au e talitonu kātoatoa kia te koutou; e lahi toku fāfia ona ko koutou. E ui i te lahi o nā fakafītāuli e feagai ma kimātou, ko au e loto tele pea lava; ko au e fakatumulia i te fiafia.
5Ke pa lava ki te taimi na taunuku ai kimātou ki Maketonia, na hēki maua lele he mātou mālōlōga. Na maua kimātou i nā fakafītāuli kehekehe; nae tauai kupu ma iētahi tino, ma lagona te mataku i o mātou loto.#2 Kol 2.13 6Kae ko te Atua, tē e maua ai te mālohi e kilātou kua tau hēai he fakamoemoe, na fakamālohi mai kia te kimātou, i te hauga o Tito. 7E hē nā ko te hau o Tito te na ala ai to mātou fiafia, kae na vēnā foki to mātou fiafia i tana līpoti ko koutou nae fakamālohi ake kia te ia. Na taku mai e ia e uiga ki te koutou naunau lahi ke feiloaki ma au; te halamō o koutou ki te mea na tupu; te naunau o koutou ke lagolago mai kia te au; ma ko te mea ia kua hili atu ai toku fiafia i te taimi nei.
8Auā e ui lava na maua koutou i te loto fakanoanoa ona ko taku tuhi na kavatu, ko au e fiafia ko au na tuhi atu. Na kō lagona te popole i te kō iloaga ko koutou nae hē fiafia, i he vāitaimi. 9Kae ko au e fiafia i te taimi nei; e hē ona ko koutou na maua i te loto fakanoanoa, kae ona na fakaaogā e te Atua te loto fakanoanoa o koutou, ke maua ai he hūiga i nā olaga o koutou. E hēki iei la he mea na āfāina ai koutou ona ko kimātou. 10Auā ko te fakanoanoa e fakaaogā e te Atua, ke maua ai te loto halamō, ma ke takitaki ai ki te fakaolataga. E hēai la he mea e tatau ke hē fiafia tauānoa ai, i he mea vēnei. Kae ko te fakanoanoa tēia e fakaaogā e te lalolagi, e maua ai te oti. 11Kikila ki te mea na fai e te Atua ki te loto fakanoanoa tēnei o koutou; ki te lahi lele o te loto naunau kua tupu ake ia te koutou, ma te fofou vave o koutou ke fakamāonia e hēai he hehē o koutou! Te lahi o te koutou hē fiafia, te popole, te atuatuvale, ma te naunau ke fakahala mo nā mea hehē. Kua koutou fakaalia te hako o koutou, i te mea kātoa tēnei.
12Ko te mea ia, e ui na kō tuhia te tuhi, e hēki kō tuhiagia ona ko te tino na faia te mea hehē, pe ko te tino na āfāina ona ko te mea hehē tēnei. Na kō tuhia ke fakamanino atu kia te koutou i mua o te Atua, te mālohi o te koutou lagolago mai kia te au. 13Ko te mea ia kua kavea ai tēnei mea ma fakamālohiaga kia te kimātou.
E hē gata i te kua fakamālohi mai kia te kimātou, kae kua fakafiafiagia lahi foki kimātou e Tito, i te kua kimātou iloa nae fehoahoani koutou uma kia te ia. 14Na fakaali toku fāfia kia Tito ona ko koutou, ma e hēki koutou faia lele he mea ke hui ai toku lagona tēnei. Ko kimātou e tautatala lava kia te koutou i te meamoni, ma e vēnā foki to mātou fāfifia na fai kia Tito, ko tēia kua hako foki lava. 15E alofa lahi lele atu ia Tito kia te koutou uma, kae maihe lava kāfai e ia manatua te uhitaki o koutou uma ki nā mea nae lea atu ai ia, vēnā ma te gatete ma te mātataku o koutou, i te taimi na feiloaki ai koutou. 16Kai au te fiafia, ona e kātoatoa toku fakamoemoe atu kia te koutou!
Currently Selected:
2 Kolinito 7: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
