2 Kolinito 5
5
1Ko o tātou tino e vē ni falekie e nonofo ai kitātou i kinei i te lalolagi. Kae kāfai nā falekie iēnei e fakakino, e iloa e kitātou ka fōki mai e te Atua kia te kitātou ni mea ke nonofo ai kitātou. Ko nā fale iēnei e ia faia, ma e tūmau ke pa ki te fakavavau. 2Ka koi i te lalolagi kitātou, ko kitātou e ōi i to tātou naunau ko to tātou fale e hau mai te lagi, ke i na tuku ifo loa ki luga o kitātou; 3ma kāfai kitātou e kokofu ai e vē ni kie, ka hē mafai ke maua mai kitātou e hē lavalavā.
4Ko nā falekie iēnei e nonofo ai nei kitātou e vē he kavega mamafa, ma e ōi ai kitātou. Kae e hē faia e kitātou ona ko kitātou e fofou ke olokehe ma o tātou tino e fano e oti. Kae ona ko kitātou e fofou ke hui ki ni tino e hē oti lele. 5Ko te Atua lava te kua tāpenagia kitātou mo te hūiga tēnei, ma kua ia tuku maia kia te kitātou tona Agaga, ke fakamāonia ai nā mea uma kua ia hāunia mo kitātou.
6Tātou loto tetele la i taimi uma. E iloa e kitātou, kāfai kitātou e i te fale i te tino, ko kitātou e hē i te fale ma te Aliki. 7Auā ko kitātou e ola e ala i te fakatuatua, kae hē ala i nā mea e kitea i nā mata. 8Ko kitātou e tatau ke loto tetele, auā e hili atu to tātou naunau ke tukua o tātou fale i te tino, kae fakatahi i te fale ma te Aliki. 9Kae e hili atu i lo ho hētahi lava mea, to kitātou fofou ke fai te mea e fiafia ai te Aliki, pe i to tātou fale i kinei, pe i te fale ma te Aliki. 10Auā ko kitātou uma e tatau ke tutū i mua o Keliho, ke fakamahino e ia. Ka maua e te tino tona lava taui, fua ki ana gāluega na fai, pe nae lelei, pe nae kino, ka koi ola ai kitātou i o tātou tino iēnei.#Lom 14.10
Ko te Vā Lelei ma te Atua e Ala ia Keliho
11E iloa e kimātou te mea e takua ko te mataku i te Aliki, ma ko te mea ia e fakamālohi atu ai kimātou kia te koutou uma, ke liliu kia te ia. E iloa kātoatoa kimātou e te Atua, ma ko au e fakamoemoe ka vēnā foki oi iloa kimātou i nā loto o koutou. 12Ko kimātou e hē taumafai ke toe fakavikiviki lava kimātou e kimātou kia te koutou; kae ko kimātou e taumafai ke fai he mea ke fāfifia ai koutou ona ko kimātou, kae ke mafai ai e koutou oi tali atu ki nā tino e fāfifia ona ko te tūlaga kua iei he tino, kae hē ona ko nā mea i tona loto. 13Kāfai e fōliga kua hē lelei o mātou māfaufau, ko he mea tēnā e i te vā lava o te Atua ma kimātou. Kae kāfai o mātou māfaufau e lelei, ko he mea tēnā e mo te lelei o koutou. 14Ko kimātou e pūlea e te alofa o Keliho, ona kua mautinoa e kimātou, kāfai na oti he toka tahi mo tagata uma, ko kitātou uma foki la na oti. 15Ma ko Keliho na oti mo tagata uma, kae ke nahe toe ola ai nā tino e ola mo kilātou lava, kae ola oioti mo tē na oti ma toe fakatū mai ki te ola, mo kilātou.
16Ko te mea ia, e kāmata atu nei, e hē toe kitātou fakamahinoa he tino, i te kikilaga faka-te-tagata. E ui lava na iei te taimi na kitātou fakamahinoa ai ia Keliho i te kikila faka-te-tagata, kae kua hē toe fai vēnā e kitātou nei. 17Ho he tino kua ia te ia te hokotaga ma Keliho, ko he tino fōu ia; kua teka atu te mea tuai, kae kua hau te mea fōu. 18Ko te mea kātoa tēnei na fai e te Atua. Na ia fakaleleia to tātou vā ma ia e ala ia Keliho, ma tuku mai e ia kia te kimātou te gāluega ko te fakaleleia o te vā o ia ma iētahi tino. 19Ko te uiga o ta mātou lea atu, kua fakalelei e te Atua te vā o ia ma te lalolagi e ala ia Keliho. E hēki ia faitaua ia agahala a tagata, ma kua tuku mai e ia te fekau kia te mātou, e mafai ai ke fakalelei te vā o ia ma tagata.
20Ko kimātou la na uga mai ke tautatala mo Keliho, ma ko te Atua e fakatagi atu ko koutou ke fakalogo ki te fekau e kavatu e kimātou. Ko kimātou e tautatala i te igoa o Keliho ma aioi atu i te agaga moni, ke fakalelei te vā o koutou ma te Atua. 21E hēki iei lele he agahala a Keliho, kae mo to tātou lelei, na fai ai e te Atua ke agahala fakatahi ia ma kitātou, kae ke kavea ai te fakaleleia o kitātou ma Keliho, ma mea e talia ai kitātou e te Atua.
Currently Selected:
2 Kolinito 5: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
