2 Kolinito 12
12
Ko nā Fakaaliga na Kitea e Paulo
1Ko au e tatau ke fāfia, e ui lava e hēai hona aogā. Kae ko au ka tautala atu e uiga ki nā mea na fakailoa mai e te Aliki kia te au, e ala i ni miti ma ni fakaaliga. 2E iei he tino Kelihiano e iloa e au, na hikitia ake ki te lagi e hili te maualuga, e tuha kua hefulu fa tauhaga taluai (e hē iloa e au pe ko te mea tēnei na tupu moni, pe ko he mea na fakailoa ki ei i he miti—nā ko te Atua oioti te ia iloa). 3-4Ko au e toe lea atu, e iloa e au ko te tino tēnei na hikitia ake ki Palataiho (ma e vē oi lea atu au, e hē iloa e au pe ko te mea tēnei na tupu moni pe ko he mea e vē he fakaaliga—nā ko te Atua oioti te ia iloa), ma i kinā, na ia lagona ai nā mea e hē mafai ke fakakupu i ni kupu, ma e hē mafai ke tautala ai he tino. 5Ko au la ka fāfia ona ko te tino tēnei; kae ko au ka hē fāfia mo au lava, vaganā ai nā mea e kitea ai toku vāivai. 6Kāfai au e fofou ke fakaali hoku fāfia, e hē vēakē ko au e valea, auā ko au e tautala lava i te meamoni. Kae ka hē fakaalia hoku fāfia, auā e hē fofou au ke fakatāua au e he tino o koutou, ona ko nā mea kua kitea e koutou e fai e au, ma kua lagona e koutou e lea ai au.
7Kae ke tāofiofi ai au ke nahe hona fāfia ona ko te lahi o nā mea mānanaia na kitea e au, na tuku mai ai ki toku tino he tauale tīgāina,#12.7 ki toku tino he tauale tīgāina I te gagana Eleni e lea mai: he lākau mātuitui ki te tino na tuku mai kia te au. E ui e tokalahi nā tino hukehuke ki te Tuhi Paia e talitonu ko te mea tēnei e fakatatau ki nā tīgāina o te tino e ala i he tauale, ko te fakakupuga tēnei a Paulo e ono fakatatau foki ki nā fakahāuāga ma nā faiga a nā tino e teteke ake kia te ia ke galue e vē he kavefekau a Hatani, ke fai ma fakahoehā ma ke nahe hona fāfia ai au. 8E fakatolu lava ona tatalo au ki te Aliki e uiga ki te mea tēnei, ma fakatagi atu ki ei ke kave kehe tēnei mea ma au. 9Kae na tali vē mai, “Ko toku alofa tūnoa e lava mo koe, auā ko toku mana e kātoatoa te mālohi i nā taimi e vāivai ai koe.” Ko au la e fiafia lahi ke fāfia i oku vāivaiga, kae ke ia te au ai te puipuiga a te mana o Keliho. 10E kō taliagia la oku vāivaiga, nā kupu tau fakakino, nā fakafītāuli, nā fakahāuāga ma nā fakalavelave tutupu, ona ko Keliho. Auā kāfai au e vāivai, oi e mālohi ai au.
Ko Popōlega o Paulo ki te Ekalehia i Kolinito
11Ko au e vē he vale i aku mea e fai—kae ko koutou te kua māfua ai oi vēnei au, ona na tatau lava ke fakailoa e koutou ko au kua talia e koutou. Auā e tuha lava pe ko au he tino e hēai he aogā, e hēai lele he mea e hili atu ai nā tino fakapitoa iēnei e takua e koutou ni “apohitolo,” i lo ia te au. 12Ko te lahi o nā fakailoga ma nā mea ofōfogia e fakamāonia ai ko au ko he apohitolo, nae kō fakatinoa i te mea nae iei ai koutou, ma toku onohai lahi. 13Heā nei he mea na fai e au kia te koutou e hēki kō faia ki iētahi Ekalehia? Oioti lava te mea, ko koutou e hēki fakafītatā lele e au i ni fehoahoani tau tupe? Fakamāgalo mai au kāfai kua hē fetaui taku mea kua fai.
14Ko te fakatolu tēnei o taimi kua hāuni ai au ke āhiahi atu kia te koutou—ma e hē kō faia lele he mea ke fakafītatā ai koutou. Ko koutou te hakili e au, kae hē ko nā tupe a koutou. Auā e hē tatau nā tamaiti ke tuku kehe e kilātou he hēleni mo te lumanaki o nā mātua, kae e tuku kehe e nā mātua mo nā tamaiti. 15E fiafia lahi lele au oi fakafano uma aku mea vēnā ma toku tagata kātoa, ke fehoahoani atu kia te koutou. Kāfai nei e ātili lahi toku alofa kia te koutou, ka ātili taigole ai nei te koutou alolofa mai kia te au?
16E koutou iloa lelei lava ko au e hēki fakafītā atu kia te koutou. Kae e lea koutou ko au e faitogafiti, ma kua kō māileia koutou i nā tala pepelo. 17Vēhea? Na kō fakavalea nei koutou e ala i he tino o nā kavefekau na uga atu e au kia te koutou? 18Na tauānau e au ia Tito ke fanatu, ma na uga atu ai fakatahi ma tētahi uho o kimātou. Na fakavalea nei koutou e Tito? Nae hē tutuha nei la o mā loto, ma nā mea nae fai e kimāua?
19Ātonu pe ko koutou e vēakē ko kimātou e fīnau atu mo kimātou lava. Hēai! Ko kimātou e tautatala lava e vē ko te mea e fofou ia Keliho ke tautatala ai kimātou i mua o te Atua, ma ko nā mea uma e kimātou faia, e mo te atiakega o koutou a mātou uō pele. 20Ko au e popole nā ia au e pa atu kua kehe te tūlaga kua iei ai koutou i lo te mea e fofou au ki ei, ma ka koutou kitea foki kua kehe te tūlaga kua iei au i lo te mea e fofou koutou ki ei. Ko au e popole nā ia au e pa atu ko koutou e tauai miha ma maua i te loto kino, te loto ita ma te manatu fakapito; e tau fakakino ma faitatala, e mimita ma hē pūlea. 21Ko au e popole auā ia au i nā fakamāhiahia e toku Atua i mua o koutou kāfai au e toe pa atu, ma ono tagi ai au ma te fakanoanoa mo nā tino e tokalahi na agahala i te taimi kua teka, kae e hēki halamō ia lātou āmio mātagā nae fai—nā tuinanauga kino ki te tino.
Currently Selected:
2 Kolinito 12: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
