2 Kolinito 11
11
Ko Paulo ma nā Pelofeta Pepelo
1Ko au te fofou ke maua koutou i te onohai i nā mea ka lea atu ai au, e tuha lava pe kāfai au e vē e tamā fāvalevalea. 2E lagona e au te fuā kia te koutou, e vē ona fuā te Atua; auā ko koutou e vē ko he tāupou e lelei kātoatoa, ka tuku atu e au ke fakaipoipo ki he tamāloa e fokotahi oioti lava, ko Keliho tēnā. 3Ko au e popole nā ia koutou e fakavalea, e vē ko te fakavaleaga o Eva e te gata tau fakahehē, ma takitaki kehe ai koutou mai te koutou tāpuaki kia Keliho, i te agaga kātoatoa ma te fakamāoni.#Ken 3.1-5, 13 4Auā kua fiafia koutou oi fakataga ho he tino e fanatu oi folafola atu e uiga ki he Iehu kehe, e kehe ma te Iehu na folafola atu e kimātou; ma talia e koutou he agaga ma he tala lelei e kehe mai te Agaga ma te tala lelei na maua e koutou mai ia te kimātou!
5E manatu au, e hēai lele he mea e hili atu ai nā tino fakapitoa iēnei e takua e koutou “ni apohitolo”#11.5 “ni apohitolo” Ni apohitolo e hēki uga maia e te Atua i lo ia te au. 6E ui lava ko taku tautala e hē matuā lelei e vē ko kilātou, kae e hē vēake ai ka hili atu to lātou popoto i lo au; kua uma te kimātou fakamālamalama lelei atua o nā mea uma lele kia te koutou.
7E hēki lea atu au ki hoku totogi i te kō folafola atuga o te Tala Lelei a te Atua kia te koutou; na kō tukua au ki lalo kae ke fakatāua ai koutou? E hehē nei taku mea na fai? 8I te taimi na galue ai au mo koutou, ko au nae totogi e iētahi Ekalehia. 9Ma i te taimi tēnā, e hēki fakafītā lele atu au kia te koutou, kāfai au e fofou ki he tupe; ko nā mea uma lele na manakomia e au, na kaumai e nā uho Kelihiano i Maketonia. E hēki fakafītā atu au kia te koutou i te taimi kua teka, e vēnā foki oi hē fakafītā au kia te koutou i te lumanaki. #Fil 4.15-18 10E ala i te meamoni e uiga kia Keliho i loto ia te au, e takutino atu ai e au, e hēai he tino i Akaia kātoa e ia mafaia oi tāofi toku fāfia. 11Ko au nei e lea vēnei ona ko au e hē alofa atu kia te koutou? E iloa e te Atua ko au e alofa kia te koutou!
12Ko nā mea nae fai e au ka fai pea lava e au, kae ke nahe maua ai e nā tino iēnei e lea koutou ni “apohitolo,” he avanoa ke fai ai ni o lātou fāfifia, ko a lātou gāluega e tutuha lava ma a mātou gāluega e fai. 13Ko nā tino iēnā e hē ni apohitolo moni—ni apohitolo pepelo, e kilātou pelogia ia tagata e uiga kia lātou gāluega e fai, ma taumafai ke vē kilātou ni apohitolo moni lava e a Keliho. 14Ma e hetioa, auā e pa foki lava kia Hatani, e ia fakahehēa ia tagata ke vēakē, ko ia ko he āgelu o te mālama! 15Ko te mea ia, e hē he mea fōu te taumafai o nā kaukauna a ia ke vē kilātou ni kaukauna e o te āmiotonu. I te ikuga, ka maua e kilātou te taui e tuha ai ma a lātou gāluega kua fai.
Ko nā Puapuagā o Paulo mo Keliho
16Ko au e toe lea vēnei atu, nahe iei he tino o koutou e manatu ko au e valea. Kae kāfai lava la e manatu koutou ko au e valea, tuku vē la au ke vē he tino e valea kae ke iei ai hoku tamā fāfia. 17E ui lava ko taku lea atu vēnei e hē ko te mea ia e fofou te Aliki ke lea atu ai au; kae e tuha ai ma te matākupu tēnei ko te fāfia, ko au e vē moni lava he tino valea i aku tala e fai 18Kae ona e tokalahi lele ia tagata e fāfifia i nā mea faka-te-tagata, ko au foki la ka fāfia. 19Ko te lahi o te koutou mālamalama, kua koutou mafaia ai oi onohai i nā mea a nā vale e fai. 20E onohai koutou kāfai koutou e fakapologa e he tino, pe fakavalea, pe honafai, pe manatu fakatauvā kia te koutou, pe fai ni ona uiga hē māfaufau kia te koutou. 21Ko au e mā oi taku hako atu, ko kimātou nae matamumuli oi fai ni mea vēnā!
Kae kāfai e iei he tino e ia mafaia oi fāfia e uiga ki ho mea—e mafai foki e au. (Ko aku tala iēnei e vē ni tala a he tino valea.) 22Ni tino Epelu nei kilātou? E vēnā foki au. Ni tino Ihalaelu nei kilātou? E vēnā foki au. Ni lāpuna nei kilātou e o Apelaamo? E vēnā foki au. 23Ni kaukauna nei kilātou e a Keliho? Ko au e vē he vale—kae ko au he kaukauna e hili lele atu ia te kilātou! E hili atu toku galue mālohi, e lahi atu nā taimi nae i te falepuipui ai au, e lahi atu nā taimi na kini ai au, ma e lahi atu nā taimi na mea e mate ai au. #Gāl 16.23 24Kua fakalima oi kini au taki tolu hefulu iva ia ta, i lima o nā tino Iutaia; #Teu 25.3 25kua fakatolu oi kini au i nā lākau e nā tino Loma, ma kua fakafokotahi oi fetogi au i nā fatu. Kua fakatolu te iei o oku i luga o nā vaka e gōgoto, ma e fokotahi te taimi na opeopea ai au i te moana mo he luahefulufa itūlā. #Gāl 16.22; 14.19 26I te lahi o aku malaga, nae lamatia toku ola i nā lolovai, nā tino fāomea, mai oku tagata tōtino ma tagata nukukehe; nae lamatia i nā kakai lalahi, i te vaomatua, i te moana, vēnā foki mai nā uō pepelo. #Gāl 9.23; 14.5 27Ko au nae galue ma te fītā; e lahi nā pō nae hē maua haku moe; nae fia kaia ma fia inua; e lahi nā taimi nae hē maua ai haku mea ke kai, he mea ke fakamalu ki ei, pe ni kofu ke fakamāfanafana ai. 28Ma e hē gata i iētahi mea kua hē tākua, ko au e fītā i aho uma lava i toku popole ki nā Ekalehia uma. 29Kāfai he tino e vāivai, oi e lagona foki e au te vāivai; kāfai he tino e takitakia ma e pakū ki te agahala, ko au e tumu i te fakanoanoa.
30Kāfai au e tatau ke fāfia, ko au e fāfia i nā mea e kitea ai toku vāivai. 31Ko te Atua ma te Tamana o te Aliki ko Iehu—ke fakamanuia tona igoa ke pa ki te fakavavau—e ia iloa ko au e hē pepelo. 32Ka koi iei au i Tamaheko, na fakatonu nā fitafita e te kōvana i lalo o te Tupu ko Aleta, ke leoleo nā faitotoka ki te kakai, kae ke kilātou pukea ai au. #Gāl 9.23-25 33Kae ko au na tukutuku ki lalo i he polapola mai he pū i te pāpuipui o te kakai, ma na hola kehe ai au mai ia te ia.
Currently Selected:
2 Kolinito 11: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
