2 Kolinito 10
10
Ko te Gāluega a Paulo mo Keliho
1Ko au ko Paulo, e fakatalohaga atu kia te koutou i te igoa o Keliho, tē e agamalū ma agaalofa. Ko au, tē e lea nā tino e matamuli ma loto maulalo kāfai e fakatahi ma koutou, kae loto hāuā kāfai e i hētahi mea. 2Ko au e talohaga atu, ke nahe faia lele e koutou he mea ke fakaali ai toku loto hāuā kāfai au e fanatu; auā ko au kua hāuni ke fakakikila ki toku loto fakahāuā, nā tino e lea ko a mātou mea e fai e fakavae i nā lagona faka-te-lalolagi. 3E hako ko kimātou ni tino e ola i te lalolagi, kae e hē tau e kimātou he taua e vē ona fai e tagata i te lalolagi. 4Ko nā meatau e fakaaogā e kimātou e hē ni meatau o te lalolagi, kae ko nā meatau mālolohi a te Atua, e mafai ai e kimātou oi talepe nā olo mālolohi. E fakahēaogā e kimātou nā talitonuga hehē; 5e talepe ki lalo e kimātou nā mea uma e fakatutū ke fai ma lave ki te mālamalama o tagata, e uiga ki te Atua. E puke fakamālohi e kimātou ia manatu tau toka tahi uma, ma fakamālohia ke uhitaki kia Keliho. 6Ma kāfai kua fakamāonia te kātoatoa o te uhitaki o koutou, ka hāuni kimātou ke fakahala ho he tino e hē fia uhitaki.
7Ko koutou e kikila ki te tino mai o nā mea i te kikila atu ki ei i fafo. E iei nei ni tino i kinā e kilātou mautinoa ko kilātou e ia Keliho? E tatau ke toe māfaufau lelei kilātou e uiga kia te kilātou, auā ko kimātou e a Keliho, e vē foki lava ko kilātou. 8Auā ko au e hē mā, e tuha lava pe kua hona fāfia ātili au ona ko te pule kua tuku mai e te Aliki kia te kimātou—te pule ke ati ai ki luga te fakatuatua o koutou, kae hē ke togi ai koutou ki lalo. 9Ko au e hē taumafai ke fakamataku koutou i aku tuhi. 10Auā ko iētahi o koutou e lea vē, “Te loloto ma te mālolohi o nā tuhi a Paulo, kae kāfai e i kinei ma kitātou, te vāivai lele ma te hēai o he uiga o ana kupu!” 11Ke mālamalama nā tino vēnei, e hēai lele he mea e kehekehe ai nā mea e tuhi atu ai kimātou i nā tuhi, ma nā mea e fai e kimātou kāfai kimātou e fakatahi ma koutou i kinā.
12E hē vē ko kimātou e taumafai ke fakatuhatuha kimātou ki nā tino e manatu ko kilātou lava te hili ona lelei. Kai te vālelea ātili o iēnei tino! E fakatuhatuha kilātou kia te kilātou lava. 13Kae e vē la kia te mātou, ko to mātou fāfifia e fakatuākoi; e hē hili atu i nā tuākoi o te gāluega kua tuku mai e te Atua mo kimātou, ma e aofia ai to mātou gālulue ma koutou. 14Ma e ona ko koutou e i loto o nā tuākoi iēnei, e hēki hili atu foki ki tua a mātou gāluega nae fai, i te oatuga o kimātou oi kavatu te Tala Lelei kia Keliho. 15Ko kimātou la e hē fāfifia i nā gāluega kua fai e iētahi tino i tua atu o nā tuākoi kua tuku mai e te Atua mo kimātou. Ka ko kimātou e fakamoemoe ka tuputupu pea te koutou fakatuatua, ma mafai ai ke fakaopōpo te tokalahi o nā tino ka aofia ia mātou gāluega i te mea e iei koutou, i loto lava o nā tuākoi kua tuku mai e te Atua. 16Oi mafai ai ke folafola atu te Tala Lelei e kimātou ki iētahi atunuku i tua atu o koutou, e aunoa ma ho mātou fāfifia i ni gāluega kua uma te fai i he fātoaga a hētahi tino.
17Kae e vē oi leamai te tuhituhiga paia, “Ko ai lava e fia fakaali hona fāfia, e tatau ke fāfia i te mea kua fai e te Aliki.” #Iel 9.24 18Auā, ko kitātou e talia oioti e te Aliki pe kāfai kitātou e lelei i tana kikila, kae hē ona ko ho tātou manatu ko kitātou e lelei.
Currently Selected:
2 Kolinito 10: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
