Thodŏpho 16

Timò̆theo Lekô Păulu kî Cĭlas akă

1Păulu lepôd́ŏgè d́ŏ Dè̆rbe kî Lĭstra u tòcò abu nu. D́ŏ Listra u abu nu bōhmubicè ami ḿî Timò̆theo ògè dèbwè. Zo mo ḿî Jŭdamo kî zî phî̆htagè ab́udè dèbwè. Barasă ca pa ḿî Grĭspho. 2Thè̆buthè̆we aò d́ŏ Lĭstra kî Ikò̆nia u bu tòcò d́òi thoŏthèè zî wî cè kè̆. 3Păulu thaè hè joigè Timò̆theo acab́ô̆ zò khò̆golō nu d́ō, zô hô̆rîkî̆gè lōwa. Ajo ḿî Jŭdapho aò d́ŏnu tòcò akhoacè̆, manè̄ bija gŏ abwè thîhè̆ htè ca pa ḿî Grĭspho nu. 4B́ĕ cè tòcò hèpôd́ŏ tu u hwă tu u nu, ci ilagè ab́udè tòcò dèthôdèthò̆ htè bōhmubicè kî anedothabwe aò d́ŏ Jerŭsalèm u bu laglagè tòcò nu, kî hmèla cè tòcò agè̄ lôkômèkô acab́ô̆ dèhtulahmèla cè tòcò adĕ nu. 5Dèòplo dohtagè d́ŏ dèb́u ahmeaglo abu, kî d́ŏ dèòplopho òèòcara hta abu nu.

Dèlenī d́ŏ Macedŏnia nu

6Cè tòcò hèpôd́ŏ hwă d́ŏ Phrĭgia kî Galătiage tòcò nu d́ō, Spirito Tcahtĭ d́ò cè agē le d́ò̆htôla d́ŏ Asĭa nu. 7B́ĕ zo dole d́ŏ Mĭsia akŭhtî nu, zo gomogè agū kŭwè̄ d́ŏ Bithĭniage nu, barasă Jezŭ aSpirito Tcahtĭ ti igè cè tòcò akhwè ńò. 8Acè̆ d́ō, za hwădū hwă Mĭsia d́ō gelagè d́ŏ Trŏas u nu. 9Anu dènè nu Păulu nib́ègè dètcahtî dèdè̆, Macedŏnia upho dèbwè pòhtahtî cè kî damògè cè gōjo, “Leb́abò̄ d́ŏ Macedŏniage jo kî mèzobò̄ wa tîkî,” cò d́ò lōwa do. 10Ca tcahtî hwă dètcahtî ajo taplakhă lò ca pradòlògè agē le d́ŏ Macedŏniage nu. Manè̄, zi thîhè̆ danā htè Kib́ĭcè jo cè agē le d́òŭsaŭ cè tòcò Vanzĕlō nu.

Lî̆dia Phî̆hta Ab́udè b́ĕ Philippiăno u nu

11Wò ò hwă Trŏas u, wò d́òledanāgè thè̆bò d́ŏ Samothrăce ge nu. Alekă dini we le d́ŏ Neăpolîs, 12mèhwă we legè d́ŏ Philippiăno u nu, d́ŏnu ḿî Rŏma adèŭi abu Macedŏniage u ado tu u. Wò ò hwă d́ŏ u bu munimuthè̆ tîkîpho lò. 13B́ĕ Munisòd́è̆ nu, wa hèhta u akhlŏ kî legè d́ŏ lò̄wē, htè wo gomo ḿî Jŭdapho tòcò ladēplo thub́uthèb́è̆ ale kò ò dalālā akhoacè̆ nu. Wa sanălăò hwă dòdò̄htîgè amihmu aladēplo b́ĕnu tòcò nu. 14D́ŏ amihmu tòcò nu aklè̆ ami ḿî Lî̆dia ògè dèbwè, zî ḿî amihmu aòi dèthub́uthèb́è̆ kî abwîasè̆i dihwihtĭ alîhlo d́ŏ Thiatĭra u bu dèbwè nu. Zò sòkhĕńe wè dèd́ò̆htô kî Kib́ĭcè b́ahlî̆hta ca tha agî̄ phîni Păulu adèd́ò tòcò nu. 15Alekă cè kî zo pho zi li thèd́è̆gumu khagè dèŭsab́ăhtĭ, mèhwă zô htulahmèlagè wa, “Thĭ gō gomo b́eḿĕ ma jè acab́ô̆ ab́udè dèbwè nu d́ō, le kî òkôbò̄ wa kă,” cò d́ò do. Zo jogè wa htô̆ we lehtîb́è cè lò.

Păulu kî Cĭlas Ladēnī Dèkî̆dî̄ abu

16Dinidèthè̆ b́ĕ we le thèb́è̆ akhî nu, wè htèglè̄ni zômo dèbwè, htè hnè òwè̄ alò kî ai cè dèd́òdòlò ahlò̆mò̄ anikhĭ nu. Zè mènigè ci B́ĭcè hô̆ pwĕdimi d́ŏ zè dèd́òdòlòi bija dèò ahlò̆mò̄ anikhĭ acè̆ nu. 17Amihmupho ajo dèbwè lôkô Păulu kî wa alewe tòcò alekă kî kèwo, cò d́ò, “Ajo ḿî Kib́ĭcè Ahtajîgudŭ azôabwè tòcò, ze le d́ò̆sa thĭ akè b́è mèhlô̆htage cadè̄ nu!” cò d́ò do. 18Zè mè gōjo gŏ ani lò d́ō, Păulu atha dôzô be ńò, ca b́adîrî ze ne kî d́ògè hnè gōjo, “D́ŏ Jezŭ Krĭstu ami, jè hmèla nè agè̄ hèhta amihmupho alò!” cò d́ò lōwa do. B́ĕnu lò, hnè hèhtakè̆gè Zò lò. 19B́ĕ ci B́ĭcè kèhtî zè dè mèni kèhta be lōwa hô̆ ńò d́ō, cè tòcò phò hwă Păulu kî Cĭlas d́ō zi cwidôhôlegè lōwa d́ŏ aŭidè khone tòcò ò u ad́ŏdaglā nu. 20Ze lei lōwa d́ŏ Rŏmapho akhoane tòcò ahlò̆mò̄ kî za jāsò lōwa, “Bija ajo dalā ḿî Jŭdapho tòcò, zè mè gòthò̆gòrò dè d́ŏ wu u bu nu. 21Cè tòcò thèhlô̆ bija dènudèd́ò̆ ahtad́ĕd́ò wè dèthôdèthò̆ htè wa Rŏmapho tòcò dô lôkô za kî mèkô za akă ńò tòcò nu,” cò d́ò do. 22Bija aboahò tòcò mèkô tòthotòhô cè tòcò akă d́ŏ dèd́è̆lî̄ dèthèhtè Păulu kî Cĭlas nu.

Akhoane tòcò phehtèlèkè̆ zi scid́ŏ kî hna bija hlîplè̆gè cè tòcò. 23Klĭpho tòcò hlîplè̆ cè tòcò pwĕdimi hwă zî htînīgè lōwa dèkî̆dî̄ abu, mèhwă za hna atcai dèkî̆dî̄ akho agô̄ dôihme lōwa. 24Acab́ô̆ zè dèhtulahmèla adĕ nu, bija htînī cè dèkî̆dî̄ ad́o abu kî glòglogè za khakhò.

25B́ĕnu dènè klăḿè̆lumu nu Păulu kî Cĭlas thèb́è̆hta kî thăbô̄ htăhtaigè Kib́ĭcè, kî ab́èd́owè̄glo alewe tòcò sòkhĕńegè. 26Gôlô̄gele dèbo thĕbwethîlî̆ dèdè̆ htogleglāgè dèkî̆dî̄ akhahtu. Gajă khaglè̄ tòcò htèẃa tab́ă lōgè. Ab́èd́owè̄glo lŏcăcè tòcò alò htaĺabi ladēplôkè̆ lōgè. 27B́ĕ dèkî̆dî̄ akhoane dèbwè phôthèńèhta kî tcahtîgè khaglè̄ tòcò ò tab́ăhwĭ d́ō, ce b́ehta d́asĕ agè̄ mèthĭlage ane, zo gomo ḿî dèkî̆dî̄pho tòcò sèphlòhta lōgè. 28Barasă Păulu kèwo htŏhta ze lē, cò d́ò, “Mèb́èd́ô̆bò̄ ḿè ne ne ḿè. Wò ò lŏ tèpwè jo,” cò d́ò lōwa do.

29Dèkî̆dî̄ akhoane da bija hmîsè, kî cwènīgè abu. Za ganādîzî kî dōhnŏlagè d́ŏ Păulu kî Cĭlas akhahtî nu. 30Mèhwă zè hèhtaihŭ lōwa tòcò akhlŏ kî cò d́ò, “Sara tòcò, cab́ô̆htè ji gī nib́è dèhlô̆htage nu, jò mò mè danè̄?” cè d́è̆ lōwa do.

31Cè tòcò d́ò, “B́ubò̄ B́ĭcè Jezŭ, d́ō ni gī nib́èkò̆ dèhlô̆htage ploplo kî ni hiphophăpho thèd́è̆gumu,” cò d́ò lōwa do. 32Mèhwă cè tòcò d́ò̆htôlani lōwa B́ĭcè alēahwè d́ŏ cè kî thèd́è̆gumu nu. 33Anu dènè nu kî b́ĕ anu akhî lô nu, cu ŭsab́ă hwă Păulu kî Cĭlas abulebukle d́ō za khagè dèŭsab́ăhtĭ, cè thèd́è̆gumu d́o. 34Alekă ze gejoigè Păulu kî Cĭlas d́ŏ zi hi kî b́oab́oò̆gè lōwa tòcò kî thalōthalaigè. Cè kî zi hiphophăpho ò pĕhtagè dèthalōthala d́ŏ zi nib́è dèb́u d́ŏ Kib́ĭcè ò akhoacè̆ nu.

35B́ĕ dèhlî̆hta nu, Rŏmapho acirradè tòcò ilagè dèhmèla d́ŏ klĭ akhoane tòcò ò, cò d́ò, “B́ahlô̆kè̆ bija anu dalā nu,” cò d́ò do.

36Mègōnu d́ō, dèkî̆dî̄ akhoane d́ò̆sa thîhè̆gè Păulu gōjo, “Acirradè tòcò hmèla d́ŏ bija ka b́ahlô̆ nè kî Cĭlas. Thĭ hè za htŏ tèpwè. Ge mòmòbò̄!” cò d́ò lōwa do.

37Păulu d́òge cè, “Danè̄! Zô dô htôtcad́è̆tca ŭsu Rŏmapho tòcò ńò, ḿî de bo hwă wa, b́è̆nī wa dèkî̆dî̄ abu. Kî khŏnujo ca thaè hna hèhta huzò wa lò! Zo gomo ḿî wò kò òzòlò ā? Rŏmapho akhoane thè̆ne gē le thè̆htakè̆ b́è wa d́ŏ dèkî̆dî̄ abu nu,” cò d́ò̆sagè lōwa do.

38Klĭpho akhoane tòcò d́ò̆sab́age acirradè; d́ō b́ĕ zî thîhè̆b́è bija ajo dalā ḿî Rŏmapho d́ō, ca thaphuthaganā lōgè. 39Cè tòcò le kî damò lōwa tòcò agè̄ hèhtakè̆ d́ŏ cu u bu nu. 40Păulu kî Cĭlas hèhta hwă dèkî̆dî̄ abu d́ō, ze legè d́ŏ Lî̆dia ahi nu, d́ŏnu zè htèglè̄nigè ab́udè tòcò, ci ikhoiă lōwa tòcò hwă zè hèhtakè̆gè d́ŏ u bu nu.

Currently Selected:

Thodŏpho 16: GRNT21

Highlight

Copy

Compare

Want to have your highlights saved across all your devices? Sign up or sign in

Geba Roman New Testament © Bible Society of Myanmar, 2021.

Learn More About Geba Roman New Testament

Popular Bible Verses from
Thodŏpho 16

Videos for Thodŏpho 16

Acts 13-20

BibleProject

Second Missionary Journey - Part One: The Book of Acts

Eyewitness Bible Series

Timothy: The Book of Acts

Eyewitness Bible Series

Prominent Women of Acts: The Book of Acts

Eyewitness Bible Series

Thodŏpho 16

Popular Bible Verses from
Thodŏpho 16

Videos for Thodŏpho 16

Acts 13-20

Second Missionary Journey - Part One: The Book of Acts

Timothy: The Book of Acts

Prominent Women of Acts: The Book of Acts

Bible:

Karen, Geba

Version: Geba Roman New Testament - GRNT21

Thodŏpho 16

Thodŏpho 16

Popular Bible Verses from Thodŏpho 16

Videos for Thodŏpho 16

Acts 13-20

Second Missionary Journey - Part One: The Book of Acts

Timothy: The Book of Acts

Prominent Women of Acts: The Book of Acts

Bible:

Karen, Geba

Version: Geba Roman New Testament - GRNT21

Thodŏpho 16

Popular Bible Verses from
Thodŏpho 16