Kintaŋ 25

Wír veé Israyi tínsín Nyùy e Peor

1Wáa dzə e ghan sin, a kiláʼáy ké wìr veé Isray ki dzə̀ é Shittim, vilum veé Israyi nèn lò, a dù, a jàŋ vikìy veé Moav. 2Vikìy víne lo, á wàa bi áwune é ŋkàʼ se á yí, cu anyùy vév shó. Wùn áwune nèn a yinín, a ghvəm anyùy vee shooy. 3Á bèy, wír veé Israyi ku nèn a tatí ŋgoo wìr ve á ghvə́m *Baal woo nyùy wìr veé Peor. Nyùy Tàr nèn shwìíy kilòŋ bìʼ Isray, 4e sùúy e Mooser jii, «Lì wír ve á tíy mbìy e kinyò fène, e sə̀ŋ áwune é ŋgèŋgèr e Nyùy Tǎr si, é dòʼshwíiy wom tsəʼ wún fo wír veé Israyí wùn.» 5Mooser nèn yòŋ e vé saʼ veé Israyi jii, «Wìr mòʼón mòʼón fo vèn kér fó yuyrí vilum vee wun sar ve á duùn, e tàtí ŋgoo, a ghvəm Baal woó Peor.»

6Kù mo wír veé Israyi dzəə́ tóŋnin e shùu *kibàn ké ntàsín, lùmèn woó Isray wùmòʼ ku nèn lì wiíy woó Midian wùmòʼ, e wìy sho e wun tàv, kù e Mooser wùn à màŋgòŋ si. 7A Finehas woo wan Eleasar dzə́ fo, a wù dzə̀ wan Aaron woo taà cù. Wù yén kinyo kìn, nèn màʼtì kintatì, e dù, e lì kòŋ, 8e jùmrì lumèn və̀y wùn wiíy, e nə̀ə́ e tàv fó mvəm, e tàŋ áwune e kòŋ ye wù‑uù kéríi. Á bèy, kifə̀ʼ ke kí‑iì sí tee wír veé Isray ki nèn mày. 9A wír ve kifə̀ʼ kìn ki‑iì yuyriné‑eè dzə̀ nsə̀kì nshòv sikweè e mbaà (24,000).

10 Nyùy Tàr lò, e yòŋ e Mooser jii, 11«Finehas feyì, wun woo wan Eleasar, wo tàr wov dzəə̀n Aaron woo taà cù, wù yiì ne, la kilòŋ kí yòʼ dzə́ə a shwiíy mo kùm wír veé Isray. Kinyo ke Isray yii ki dzə̀ a kí bír wun réŋréŋ mo kí bír mo. Wù nen sə̀r, bìʼ fo wù‑uù kér shií fo wír veé Israyi réŋréŋ moo mo. Kí nen yiì, la m yòʼ dzəə laàr áwune é mvə̀m dòʼshwiíy. 12Bo kí dzə̀ jii, à yoŋ á sho ji m sí gwar *mensaŋ vèr wun, a dzə̀ me vijùŋ vee jeéy. 13A mè dzə̀ jii, wùn à rám rəə́ kù wíy a dzə atàá cù, e wìy dù, e mày, bìʼ fo wù‑uù dìnèn shií ji á ghvə́m a dzə̀ á Nyùy və. Á bèy, wù nèn lì kilíŋ, e màn jay wìr veé Isray.»

14Finehas‑iì yùyrí wír woó Isray wùn wiíy woó Midian bèy, a yír ŋgaàŋe dzə̀ Simri woo wan Salu, a yì‑iì dzə̀ kilìmbìy keé ram Simeon. 15Yír wiíy woó Midian və̀yi‑iì dzə̀ Kosbi, a dzə̀ wan Tsur woo taà kfəə wùmòʼ e wír veé Midiané mvəm.

16 Nyùy Tàr lò, e yòŋ e Mooser jii, 17«Dù, e tòn wír veé Midiane, e laàr áwune. 18Áwune‑eè lòvtí e vèn moo aŋgàa vibàn é Peor. Vé‑eè bòʼtí ven, bo kifə̀ʼ ki nəə́ ven, e kfə̀n lèvtí ven e wiíy woo Kosbi woo wan ntoʼ wov, bo á yúyrí wun e ghan see shooy.»

Currently Selected:

Kintaŋ 25: LNB

Highlight

Copy