Kintaŋ 24
24
1Mo Balaam yenen ji Nyùy Tàr taʼ, e səə̀vì a Isray sə́əvin, la wù yòʼ kfə̀n dzə́ə a dù ji wun du, e tàr a kinyo moó ghan símóʼ sí. Wù tiím fó, e lò, e bìnkìr, a kìʼ wóʼ, 2e lòo nàn sí, e yèn a wír veé Israyi tám é vilaʼáy mo rám sév sí dzə̀kìn. Kiyoy ke Nyùy ki nèn wìy e Balaam wùn, 3wù wáa tiisí ntum Nyùy, a suúy jii:
«Ntum Balaam woo wan Beor,
ntum ŋgaà wo wù yén virə́ʼ.
4Dzə̀ ntum ŋgaà wo wù yú jí se Nyùy,
ntum wìr wo Ŋgaà Vitaàví Vidzə̀m ghemen ndzə e wun.
Wù gbu e nsay, wù wàa yen vinyo.
5Jakov, yén búʼú mo vibàn vé vi boŋkìrì.
Isray, ku lèéy búʼú kirə́ʼ ké ke dzə ki.
6Kí dzə̀ moo mboʼ ye yì neèmèn, e dù,
a dzə moo kiboó keé mbuŋ ndzə̀v.
Kí dzə̀ moo vicí vee *alo, ve bìyìn Nyùy Tàr,
a dzə moo vicí vee *sidar, ve ví teʼ e ghaa ndzəv.
7Kirə́ʼ, a wuú sə́y fo ji shàm,
aá wáy ŋgoòy, a nsay rə ji tòʼ.
Fòn woo fó wíy a ker vitaáví, e shaà Agag,
é sáʼ rəə́ wáa dzə e yúʼnín.
8Nyùy fə̀ə́r ne áwune fó wòŋ Ejiv,
á máʼ rə́r sév e vitaáví vé nyar vi.
Áwune laar vitúm vee aŋgaà vév vibàn,
béʼti vighvə́r vé aŋgaàŋ e vimbeʼ vimbeʼ,
taŋ aŋwérín e mvən si.
9Áwune lo, á boòtí wún, a neŋ moo mànyàm bvərə̀ʼ,
a neŋ moo yeè nyàm bvərə̀ʼ. A dzə̀ jùm la?
Kisəəvì kí kú a dzə fo wìr wo wù səəvì áwune,
é lòné ku shòv wír wo wù shóv áwune.»
10Balak yú vinyo vìn, kilòŋ kí shwiíy wun e ŋàŋ, wù wáa nə̀r kóy, a saʼ Balaam jii, «Bó m bèn jàŋ wò ji à wiy, e shòv vém vé vibàné, à wíy, e kfə̀n səə̀vì áwune sə́əvin ben akàŋ ataár a? 11Ké lèn ki, wò‑óò du dúun e věn wòŋ mo m yòŋèn ben. Mò‑oò yòŋ ji m yíi ghvəmsín a wò, yii bèy, Nyùy Tàr kìm ne ghvə́msín yee shooy.»
12Balaam bìnèr e Balak jii, «Kí à kì kinyo ke mò‑oò suuyin e wír ve wò‑oò tumen ji á yén moó. 13Mò‑oò sùúy ji a Balak fə̀m fò mo lav, a *kisha ke mbàm ke baar kí wùn à ke fəvír kí rún shó, bo yòʼ dzə̀ m yàʼáy á kinyo ke Nyùy Tàr yòŋèn, e yiì kinyo fo mǒ kitu, kìn dzə̀ ke juŋ ki, kìn ke bi kí. Kinyo ke Nyùy Tàr yíi a yòŋ ki dzə̀ á kíwun ke m yíi a suúy.»
Balaam tiísí ntum Nyùy ye bàm
14Balaam lò, e sùúy e Balak jii, «Bo mo‑óò du, e yèn wír vém. Yii bèy, wìy ó, m lo, e yiì, áà kiíy kinyo ke wír vìne lo, e yiì e vèn é vishiíy ve ví wiyì.» 15Balaam nèn shaà fo mbìy, a suúy jii:
«Ntum Balaam woo wan Beor,
ntum ŋgaà wo wù yén virə́ʼ.
16Ntum ŋgaà wo wù yú kisúŋnìn ke Nyùy,
wo wù kiiy vinyo ve Ŋgaà woo Taà Vitu,
yén vinyo ve Ŋgaà Vitaàví Vidzə̀m ghemen ndzə e wun.
Wù gbu fo nsay, wù wàa yen vinyo.
17M yén ŋgaàŋ, a bó wù yòʼ sì lèn.
M màʼ sí, a m yén wun ntàmda.
Fòn wíy lò fo Jakov ram mo lò sàŋ,
kitoómé ké vifòn ki wíy koʼ e Isray.
Wù wíy bvəʼtí vitú ve wìr veé Moav,
e teè wónlě vilum veé Shet.
18Wù wíy tòn Edom woo ŋgaà vibàn və,
e laàr Seir, e yòv nsay rə,
é Isray kú a kuy kfə́ kuyín.
19Ŋgaà saʼ kù wíy fəə fo rám Jakov,
a wù wíy laàr wir dzə̀m wo wù tuùtìn, e bòy e ŋkàlaʼ.»
20Balaam nèn màʼ sí, e lèéy nsay Amalek, a tin kàʼ və jii,
«Amalek‑iì dzə̀ kitúm ke mbìy ki e vitúm ví mvəm,
yii bèy, a kimaysì kév kí wíy a dzə ji á laar áwune.»
21Wù kfən màʼ sí, e lèéy nsay Ken, a tin kàʼ və jii,
«Kirə́ʼ ké ke dzə ki dzə̀ kikiŋsìn,
à bàʼrì láʼ yé, a dzə̀ é mvə̀m vilála.
22Yii bèy, ven vee wír veé Ken, á wíy səʼsí ven fó wòŋ.
Asshur wíy a ker ven ji akwàn, e dù, e meé e le?»
23Balaam kú a tiisí ntum rə, a suúy jii:
«Éè mò, a dzə̀ wìy tìím la é ghan se Nyùy wíy yiì vinyo vìn.
24Vikóŋ vi wíy a wìy fo Kittim,
a wìy, a shwivír Asshur wùn Eber,
é wun woo ŋgaà laàr, é wù ku mày sa.»
25Á bèy, Balaam nèn lò, a kfən e wun wòŋ, Balak wáa dù sa du rə́.
Currently Selected:
Kintaŋ 24: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
